الجزء الاول من الفصل الرابع والعشرون لولا الغرام روز أمين
-متقولش كِده يا حبيبي، زي ما دليلة بنتي وتهمني مصلحتها، أنت كمان ابني .
ثم استطرد بنبرة بدأت تكتسي بالجدية:
-خلينا في المهم، فيه بعض النقات اللي لازم نتكلم فيها من الأول علشان نكون على نور، ولا قدر الله ما يحصلش أي مشاكل فيما بعد.
انطلقت الكلمات من أعماقه، تفيض بالحب، والرغبة في الإرضاء:
-إن شاء الله مش هنختلف على أي حاجة ، أنا تحت أمرك في كل طلباتك، الفرش والشبكة وكل حاجة حضرتك أو دليلة هتأمروا بيها، أنا هنفذها في الحال.
قاطعه بصوت هادئ، لكنه يحمل وقار الآشخاص الذين يزنون الرجال بمعادنها لا بأموالهم:
-يا حبيبي أنا ولا يهمني أي حاجة من اللي أنت ذكرتها دي، أنا بختار راجل لبنتي يا أشرف، بختار لها ضهر وسند وأمان تتحامى فيه من بعدي.
رد بلهفة صادقة، يقطع على نفسه وعداً مقدساً:
-اطمن يا خالي، عهد عليا لأكون لها الشمس والهوى والنفس اللي بتتنفسه، ولأشيلها جوة رموش عيوني وأقفل عليها.
أطلق زفيرًا طويلاً، تداخلت فيه مشاعر الراحة مع السكينة وهو يقول:
-وأنا متأكد من كدا، وده اللي خلاني أحاول بكل قوتي مع دليلة.
ثم أردف بصرامة لا تقبل اللين:
– الموضوع المهم اللي عاوزك فيه يخص تعليمها، دليلة مش هتتجوز غير بعد ما تخلص دراستها يا أشرف.
وقع الخبر على مسامعه كالصاعقة، فتبدلت ملامحه إلى مصدومة وهتف مستنكراً:
-هو حضرتك عاوزني أستنى أربع سنين بحالهم يا خالي؟!
أكد على موقفه بصلابة ، وعقب بعقلانية:
-العقل والمنطق كمان بيقولوا كِده يا أشرف، أنت الحمدلله شغلك مستقر في السعودية، ومستحيل هتسيب مكانك هناك إلا بعد عشرين سنة، ده على الأقل.
ثم تابع بلهجة قاطعة تحمل رفضاً مطلقاً:
-وأنا أكيد مش هسمح إنك تتجوز بنتي لمدة شهر وبعدين تسافر تشوف شغلك وهي تستناك هنا لحد ما تنزلها شهر كل سنة، وتبقى لا هي اللي حصلت متجوزة، ولا مطلقة.
وتابع مستنكرًا الفكرة:
-ده غير لو حصل حمل وهي بتدرس، ولا ولادة وهي في أيام الامتحانات.
واستأنف برفضٍ قاطع:
– أنا مش هحمل بنتي فوق طاقتها وأعرضها للشتات ده مهما حصل.
حاول استعطافه وراح يفتش عن حلول وسطى تقيه شر الإنتظار، فقال بنبرة ملؤها الرجاء:
-أوعدك إني هحاول آخد إجازات على قد ما أقدر وانزل لها، أو ممكن نحولها انتساب وتسافر معايا وتبقى تنزل وقت الامتحانات، وبالنسبة لموضوع الحمل أنا هاخد كل الاحتياطات.
