عشق الزين الجزء الأول والتاني مروة البطراوي

اخفضت خلود راسها وكتمت ضحكاتها وتناولت الغذاء في صمت كما يفعل زين…انتهي زين من طعامه فحملت خلود بقايا الطعام لتضعه في المطبخ ففتح لها زين الباب حتي لا تتعثر به وسالها قائلا

=هتعملي ايه بعد كده.

التفت اليه وقالت

=هسقي حوض الورد وهقعد هناك لغايه ما تخلص شغلك هطلع انام .

ابتسم لها وقال

=ماشي …خلي بالك من الورد …وخصوصا البنفسج …عشان انا بحبه اوى ..وغمز لها بعينيه الساحرة.

خجلت خلود من تلميحه لان معناها ان تدير بالها علي نفسها …كانت حجه خلود في الذهاب الي حوض الورد ان تهاتف والدتها بدون ان يسمعها احد وبالفعل هاتفتها واجابت عليها ولكن خلود لم تمهلها الفرصه في الرد فقد سارعت بدون سلام وقالت

=ايه يا ماما مش ناويه تعتذرى لمدام ياسمين .

=انتي ناسيه انها ام جوزى ومقامها من مقامه.

ردت عليها هاجر بحقد

الظاهر معرفتش اربيكي …هيا دي ازيك ياماما وحشتيني …وسيادتك قافله تليفونك بقالك تلات ايام …انا قلت موتوكي وخلصوا منك.

رد خلود بنفس الحقد قائله

=ايوه معرفتيش تربيني…ولولا زين كان زماني نسخه مصغرة منك.

واكملت حديثها قائله

=زين خلاني انسانه محترم واجبرني احترمه واحترم كل اللي حواليا.

ثم نهضت من مكانها وضربت قدميها في الارض وقالت

=صحيح مدام ياسمين ست قاسيه …بس في الاول وفي الاخر ام جوزى …وليها احترامها.

ثم تابعت بغيظ قائله

=وبعدين انا مشتكش لحضرتك ومكنتش حابه تشوفي جسمي لان دي حاجه خاصه بيا ..انتي مش فضحتيهم ..انتي فضحتي بنتك .

وبكت وتعالت شهقاتها قائله

=ده انتي حتي روحتي قلتلها علي القلم اللي ادتهولي عشان رفضته …حرام عليكي …انتي اكيد مش امي ..منتظرة يعاملوني ازاي؟

كانت هاجر تستمع لها بحقد وغل وسخط عليها وعلي زين وياسمين واخيرا ردت قائله

=انا مش هعتذر لحد …انتي المفروض تجبريهم يعتذروا ليا …يحمدوا ربنا اني رضيت اجوزك المعاق …مش ده كلامك بردو يا خلود؟

اغمضت خلود عينيها وعزمت امرها علي البوح بتهديد زين والذي كانت تخشي ان تبوح به حتي لايمرض والدها زفرت حانقه وقالت

=طب اسمعيني بقا يا ماما…انتي كنت مفكرة اني الفرخه اللي هتبيضلك بيضه دهب …للاسف تخمينك غلط …زين قالي لو مامتك ما اعتذرتش من امي اعتبرى ابوكي مفصول من الشغل …وهياخد مني الفيزا كارد …وبكده مش هيبقا معاكي ولا مليم ..انا مش شايلك همك …انا شايله هم بابا …انا قلت اللي عندي …سلام يا ماما.