وخنع القلب لعمياء الجزء الرابع
قال يحيى بإمتنان:-
– دا أنا إللي بحمد ربنا إن وقفلنا ولاد حلال زيكم وناس محترمة، ربنا يجازيكم خير على إللي عملتوه معانا ومع بنتنا…
عاتبه حسين بلطف:-
– عيب يا يحيى إحنا خلاص بقينا أهل ورِفقة بنتنا…
قال يامن بمرح:-
– وهو أنا مليش في الحب جانب ولا كله لسي يعقوب…
يعني أنا غلطان إن روحت بنفسي أزفلكم الخبر السعيد يا توتو إنتِ وسحس، ولا مكونتش عارف لو قولتلكم في الموبايل سحس باشا كان جاب الطريق إزاي وعمل كام حادثة..
زجرته والدته قائلة:-
– ما عيب يا ولد … وأيوا كله ليعقوب ولا عندك إعتراض..
أردف حسين بغضب مصطنع:-
– وأنت بالذات متتكلمش على الحوادث…
وعمّ الغرفة جو من المرح حتى جاء الطاقم طبي وتم نقل يعقوب لغرفة أخرى وفحصه فحص شامل…
ساعدته رِفقة في إرتداء ملابسه لتقول له بمرح:-
– إنت خاسس أووي يا يعقوب باشا ومش عاجبني، دي بقاا مهمتي لما نرجع البيت أطبق عليك وصفات نادية السيد كلها…
قال بمزاح وهو يسير بصحبتها في أرجاء الغرفة:-
– طب ربنا يستر بقاا .. شكل مستشفى بدران هتكسب من ورانا كتير أووي الفترة الجايه..
صاحت بامتعاض وهي تلكزه:-
– قصدك أيه بكلامك ده..
سارع يتراجع نافيًا بتلقائية:-
– لا لا مقصدش حاجة وحشة … أنا بقول يعني علشان خاطري يعني هحتاج متابعة..
وإنتِ كمان لما تولدي..
رددت بعدم فهم:-
– أولد .. أولد أيه..!
قال بدون تفكير:-
– هتولدي أرانب يعني هتولدي أيه..
أسرع يقول متداركًا:-
– أقصد في المستقبل وكدا … أنا شكل الغيبوبة دي أثرت على دماغي … أما أنام أحسنلي..
يلا تعالي نامي شوية..
دعمته حتى تمدد على الفراش ثم هتفت بحنان:-
– إرتاح إنت شوية وأنا هشوف ماما وبابا وأرجعلك تاني..
كانت تنوي الخروج والبحث عن لبيبة التي اختفت عن الأنظار لكن وهي تعدل من وضع الوسادة خلف يعقوب اصتدمت يدها ببعض الأوراق … سحبتها بتعجب وهي تتسائل:-
– أيه ده يا يعقوب!!
أخذه يعقوب يتفحص الأوراق فحدّق به بأعين شاخصة وامتقع وجهه بالألم ثم سحب هاتفه يتفحص شيئًا ما .. وكما توقع…
استفهمت رِفقة بقلق وهي ترى تعابير وجهه التي تتراوح بين الحزن والدهشة:-
– أيه إللي حصل يا يعقوب، أيه ده!!
قال بشرود:-
– لبيبة بدران.. نقلت كل أملاكها وإدارة الشركات ليا وبعضها ليامن ولأبويا..
وهي إللي متكفلة بالعملية بتاعتك لأن الفلوس رجعت لحسابي وفي رسالة من البنك ومن الدكتور بتأكد كدا…
غير ملكية المطاعم الخاصة بيا إللي بعتهم نقلتهم ليا..
هي ليه عملت كدا..!!
