وخنع القلب لعمياء الجزء الرابع
ضحك يحيى وهو يحرك رأسه بلا فائدة، استقام وهو يرفع صوته قائلًا:-
– تعالي يا رِفقة شوفي جوزك …يعقوب باشا أبو دماغ ناشف..
جاءت رِفقة المبستمة ببهوت وانصرف والدها، استقام يعقوب وأعينه مثبتة عليها بشوق، سحب كفها يطبع قبلة بباطنه وهو يضع باقة الأقحوان بين يديها هامسًا:-
– وحشتيني يا أرنوبي..
اقتربت تطبع قبلة رقيقة فوق لحيته وقالت برِقة رغم حزن المتجلي بأعينها:-
– وإنت أكتر يا أوب..
جذبها تجلس بجانبه لتظل تنظر إلى الزهور وتتحسسها بحب وهمست:-
– وحشني أووي شكل الأقحوان..
مسد فوق وجنتها المنتفخة وقال بحنان:-
– حضري دفتر أمنياتك علشان هنحققها واحدة ورا التانية يا رِفقة، هعوضك على كل السنين دي ومش هسيب أمنية أقدر عليها ألا ما أحققهالك…
قالت بنبرة كاسفة:-
– قولتلك على أول أمنية ليا يا يعقوب، ترجع تيتا لبيبة..
قال يعقوب بصدق:-
– وأنا وعدتك إنها هتحضر فرحنا..
رددت بقلق:-
– فرحنا باقي عليه يومين وإنت قلبت الدنيا ومش لاقيها يا يعقوب..
– أنا وعدتك يا رِفقة .. بس المهم قوليلي الفستان وصلك..!!
فور أن تذكرت ابتهج وجهها وصاحت بحماس:-
– وصلي يا يعقوب متتخيلش رهيب قد أيه، ومتعرفش فرحتي قد أيه إن فستان فرحي من تصميم غصون الحُصري…
بجد أنا كنت بتفرج على تصاميمها وإنتاج شركتهم بانبهار مكونتش متوقعة إن هلبس من تصميمها…
ويبقى أيه تصميم مخصص ليا بس، حقيقي طلعت إنسانة رقيقة وخلوقة أووي ومبدعة…
طبع يعقوب لثمة حانية فوق جبينها وقال:-
– دا أقل حاجة في حق رِفقة..
يعقوب في خدمة أمنيات رِفقة..
وبصراحة زوجها بردوه وصاحب الشركة عُدي الحُصري شخص ذوق ومحترم لأبعد الحدود، وأحلى من كدا إننا بقينا مِعرفة وعزمتهم على فرحنا..
قالت بفرحة:-
– بجد … شكرًا بجد يا أوب …يسلملي قلبك..
– طب مش ناوية تفرجيني على الفستان..
هتفت بنفي:-
– لا طبعًا … أنا قولت سيبها مفاجأة يا يعقوب مش تضعط عليا بقاا..
_______بقلم/سارة نيل________
يوم الزفاف…
صاحت نهال بضجر:-
– معقول مش هتحطي ميكب خالص يا ست رِفقة..
ابتسمت غادة مخطوبة يامن شقيق يعقوب وقالت وهي تضع على وجه رِفقة بعض المرطبات الطبيعية:-
– سيبيها براحتها يا نهال طالما هي مش يتحبه..
أيدتها رِفقة وهي تُقبل غادة من وجنتها:-
– الله ينصرك يا غدغوده …أيوا بصراحة أنا مش بحبه خالص ومش ببقى حلوة فيه..
بحب طبيعتي ومفيش داعي إن أخبيها بالألوان يا نهال، أنا بحب نفسي كدا وأنا في عيني جميلة، كفاية أنا بعمل روتين لبشرتي وبهتم بيها ودا حلو أووي..
