قاتل القلوب امينة الريحاني

المقدمة تفتح كارما عينيها ببطئ لتجد نفسها مقيدة على كرسى فى مكان مظلم اشبه بالمخزن يدخله بصيص من الضوء من شباك صغير اعلى الحائط محاوط بالحديد . بدأت تشعر بالألم من رأسها وحاولت ان تتذكر ما حدث لها وبدأ الذعر والخوف يدخل الى قلبها حينما تذكرت ما حدث وكيف أتت إلى هذا المكان ولكن تساءلت من هؤلاء الذين اختطفوها وماذا يريدون منها ولماذا اتوا بها الى هذا المكان .قطع تفكيرها دخول شخصين عليها يبدو عليهم الشر فازداد الخوف فى قلبها ولكن حاولت ان تتظاهر بالقوة الشخص الاول: الحق القطة شكلها صحيت كارما: انا فين وانتوا مين وعايزين منى ايه؟ الشخص الثانى: هتعرفى كل حاجة فى وقتها يا قطة كارما: افتكرتك انت الى خطفتنى وجبتنى هنا اوعوا تكونوا فاكرين انكم هتقدروا تعملوا معايا اى حاجة انتوا مش عارفين انا مين وجوزى يبقى مين الشخص الاول: طب حيلك علينا بس وكفياكى تهديد على الفاضى انتى مش شايفة نفسك فين ومتكتفة ازاى يعنى انتى تحت ايدينا دلوقتى وبعدين هو فين جوزك الى بتخوفينا بيه دلوقتى شكلك اتسندى على حيطة مايلة كارما: اخرس يا حيوان جوزى مش هيسكت وهيربيكم على الى بتعملوه معايا الشخص الثانى : دا لو عرفلك طريق اصلا الشخص الاول: سيبك منها دلوقتى وتعالى نشوف البوص هيأمر نعمل معاها ايه يخرج الشخصين تاركين كارما تبكى من شدة خوفها كارما ببكاء: انت فين يا شهاب تعالى الحقنى تستند كارما برأسها على الكرسى المقيدة به وتعود بذاكراتها الى الوراء بضع سنوات الفصل الأول تفتح كارما عينيها ببطء لتجد نفسها مقيدة على كرسي في مكان مظلم أشبه بالمخزن، يدخله بصيص من الضوء من شباك صغير أعلى الحائط محاط بالحديد. بدأت تشعر بالألم في رأسها، وحاولت أن تتذكر ما حدث لها، وبدأ الذعر والخوف يدخلان إلى قلبها حينما تذكرت ما حدث وكيف أتت إلى هذا المكان، ولكنها تساءلت: من هؤلاء الذين اختطفوها؟ وماذا يريدون منها؟ ولماذا أتوا بها إلى هذا المكان؟ قطع تفكيرها دخول شخصين عليها، يبدو عليهما الشر، فازداد الخوف في قلبها، ولكنها حاولت أن تتظاهر بالقوة. الشخص الأول: الحق القطة شكلها صحيت. كارما: أنا فين؟ وإنتوا مين؟ وعايزين مني إيه؟ الشخص الثاني: هتعرفي كل حاجة في وقتها يا قطة. كارما: افتكرتك إنت اللي خطفتني وجبتني هنا. أوعوا تكونوا فاكرين إنكم هتقدروا تعملوا معايا أي حاجة. إنتوا مش عارفين أنا مين وجوزي يبقى مين. الشخص الأول: طب حيلك علينا بس، وكفاية تهديد على الفاضي. إنتِ مش شايفة نفسك فين ومتكتفة إزاي؟ يعني إنتِ تحت إيدينا دلوقتي. وبعدين هو فين جوزك اللي بتخوفينا بيه دلوقتي؟ شكلك اتسندي على حيطة مايلة. كارما: اخرس يا حيوان، جوزي مش هيسكت وهيربيكم على اللي بتعملوه معايا. الشخص الثاني: ده لو عرفلك طريق أصلًا. الشخص الأول: سيبك منها دلوقتي وتعالى نشوف البوص هيأمر نعمل معاها إيه. يخرج الشخصان تاركين كارما تبكي من شدة خوفها. كارما ببكاء: إنت فين يا شهاب؟ تعالى الحقني. تستند كارما برأسها على الكرسي المقيدة به وتعود بذكرياتها إلى الوراء بضع سنوات. فـــــــــــــــــلاش بـــــــــــــاك في فيلا الصفدي: تدخل كارما الفيلا بعد أن عادت من الجامعة وهي سعيدة، وتسلم على المربية رحمة وتسألها عن أبيها، فتخبرها رحمة أنه في غرفة الطعام يتناول الإفطار. تذهب كارما إلى والدها حسين الصفدي، تسلم عليه وتقبله. (حسين الصفدي من أكبر رجال المقاولات في مصر، يبلغ من العمر 65 عامًا، صعيدي الأصل. جاء إلى القاهرة مع أخيه إبراهيم الصفدي ليعملا، واستطاعا أن ينشئا مجموعة شركات للمقاولات من أكبر الشركات في مصر، ولكن أخاه إبراهيم الصفدي توفاه الله هو وزوجته في حادث سيارة، وتركا ولدًا وبنتًا رباهما عمهما حسين الصفدي وعاملهما كأبنائه. فكان الابن الأكبر شهاب الصفدي، وهو بطل روايتنا، والمسؤول عن مجموعة شركات الصفدي. يبلغ من العمر 25 عامًا، متخرج من كلية الهندسة بتقدير امتياز، وهو شخص ناجح جدًا في عمله وجاد جدًا، وهو أيضًا كبير عائلة الصفدي بعد عمه.) كارما تقبل والدها: صباح الخير يا بابا. حسين: صباح النور يا كارما. ها، عملتي إيه في الامتحان؟ كارما: عيب يا باشا تسأل السؤال ده، زي باقي الامتحانات امتياز طبعًا إن شاء الله. حسين: الله ينور عليكي يا بنتي. ياريت أخوكي كان طلع زيك بدل ما هو مغلبني. المهم، دي كانت آخر مادة مش كده؟ كارما: آآآآآه، خلاص معدش في امتحانات تاني. حسين: طب اطلعي بقى حضري شنطتك. كارما بمرح: ليه يا باشا؟ هو عندكم اللي بيخلص امتحانات بتطردوه من البيت؟ حسين: يا بت بطلي لماضة. لا يا ستي، عشان نسافر كلنا فيلا مطروح بما إنك خلصتي امتحانات، أهو نقضيلنا كام يوم هناك. كارما: أيووووووووه بقى يا صفدي يا كبييييير، هو ده الكلام. يعيش حسين بيه يا يعيش يا يعيش. حسين: طب يا بكاشة الحقي وضبي شنطتك قبل ما ولاد عمك يجوا. كارما بفرح: إيه ده؟ هما ولاد عمي هيجوا معانا؟ حسين: طبعًا يا بنتي. هو إحنا من إمتى روحنا مكان من غيرهم؟ من ساعة ما أبوهم وأمهم الله يرحمهم ماتوا في الحادثة إياها وأنا خدتهم وربيتهم معاكم، وهما بالنسبة لي زيكم بالظبط. كارما: وأنا كمان يا بابا بعتبر لبنى زي أختي بالظبط ويمكن أكتر كمان. حسين بخبث: لبنى بس يا بت؟ طب وشهاب؟ كارما بخجل: بابا، هي ماما وكريم فين؟ حسين لم يرد أن يزيد من خجلها: أمك فوق بتوضب الشنط، وكريم أخوكي زي عوايده هيسافر مع صحابه. كارما: طب تمام، عن إذن حضرتك. تذهب كارما إلى غرفتها لتجهز حقيبتها للسفر، وبعد قليل تدخل عليها لبنى ابنة عمها. لبنى هي ابنة عم كارما وأخت شهاب الصغرى، وهي في نفس عمر كارما والأقرب إلى قلبها. لبنى: إزيك يا كارما؟ كارما: خلاص يا لبنى، خدنا أفرااااااااج وهنسافر. لبنى: آه، أنا فرحانة أوي. أخيرًا السنة دي، أصلها كانت تقيلة أوي. كارما بمرح: ها، جبتي شنطتك؟ أوعي تكوني نسيتي المايوه. لبنى: مايووووه يا بنت الصفدي! مسمعكيش عمي كان هدر دمك. كارما: الله، بهزر معاكي. لبنى: طب يالا انجزي عشان منتأخرش. كارما بتردد: هو إنتِ جيتي لوحدك يعني؟ لبنى: لا طبعًا مجتش لوحدي.. السواق هو اللي جابني. تغير وجه كارما وبان عليها الضيق. لبنى: بطلي لف ودوران وقولي إنك بتسألي على شهاب. كارما: شهاب! وأنا هسأل على شهاب ليه يعني؟ لبنى: عليا برضه يا بنت عمي. كارما بتخبطها على دماغها: طب بطلي خبث بقى وقوليلي هو فين؟ لبنى: عنده شغل هيعمله وزمانه جاي. كارما: هيتأخر يعني؟ لبنى: متقلقيش يا ست شادية، زمانه جاي. تنهدت كارما بحب وابتسمت. تنزل كارما ولبنى بعد أن جهزت كارما حقيبتها للسفر لتقابل ليلى والدتها. (ليلى الصفدي زوجة حسين الصفدي ووالدة كارما، وهي تبلغ من العمر 50 عامًا، وهي أيضًا بمثابة الأم لكل من لبنى وشهاب.) تخبر ليلى كلًا من لبنى وكارما بوصول شهاب ومناقشته لبعض المواضيع الخاصة بالشركة مع حسين في غرفة المكتب، فتذهب كارما إلى والدها مشاكسة شهاب. كارما: إنت جيت يا شهاب؟ شهاب: إنتِ شايفة إيه؟ كارما: طب خلاص يا عم متزوقش. بابا، إنت لو فضلت مسلم دماغك لشهاب اليوم هيضيع مننا ومش هنسافر النهارده. شهاب: ليه إن شاء الله؟ شايفاني بدلع مع عمي؟ مش بنخلص شغل؟ كارما: هو ده وقت شغل وإحنا مسافرين؟ شهاب: أمال نسافر ونسيب الدنيا بايظة عشان يعجب جنابك؟ حسين: بسسسسسس، خلاص يا شهاب، خلاص يا كارما يا حبيبتي. إحنا خلصنا، يالا بينا. يتحرك الجميع في طريقهم إلى مرسى مطروح... يتحرك الجميع في طريقهم إلى مرسى مطروح؛ حسين وليلى ومعهم الخدم في سيارة، والسيارة الأخرى يقودها شهاب، وتركب معه لبنى وكارما بعد إصرار كارما أن تركب معهم لكي تكون مع لبنى. وفي أثناء الطريق تتحدث كارما مع لبنى، ولكن نظراتها كلها ملاحقة لشهاب الذي لم يتحدث بأي كلمة طوال الطريق، ولكن يكفي كارما أنه أمامها. وفجأة يوقف شهاب السيارة. كارما: إيه يا شهاب؟ وقفت ليييييه؟؟؟؟؟ شهاب: هجيب حاجة من الاستراحة وجاي. لبنى: طب ما ننزل معاك بدل قعدة العربية دي اللي وقفت رجلينا. شهاب: إنتِ بتهزري؟ تروحي فين؟ دي استراحة على الطريق ولامة من كل الأشكال. دقايق وجاي، استنوني هنا ومتتحركوش. تركهم شهاب في السيارة وذهب إلى الاستراحة. كارما بغيظ: إيه يا بنتي المخلوق العجيب ده؟ بقالنا أكتر من ساعتين ونص في الطريق ومنطقش كلمة واحدة. لبنى: ما إنتِ عارفة يا كوكي، شهاب كلامه قليل. كارما: عارفة يا أختي عارفة، الله يكون في عوني. يعود شهاب إلى السيارة ليستأنفوا الطريق إلى مرسى مطروح. وبعد أن وصلوا جميعًا إلى الفيلا، استأذن شهاب لكي يذهب لشراء بعض المستلزمات الخاصة بإقامتهم. أصرت كارما أن تذهب معه، ومع إصرارها وافق والدها على ذهابها معه. وفي السيارة، في طريقهم إلى السوبر ماركت: كارما: هو إنت هتفضل ساكت كتير؟ شهاب: يعني عايزاني أقول إيه؟ كارما: يا أخي قول أي حاجة، إن شاء الله "إزيك". شهاب: بس كده؟ بسيطة.. إزيك. كارما: يا ساتر عليك. طب ممكن أسألك سؤال؟ شهاب: قولي. كارما: هو إنت زعلان إني جيت معاك؟ شهاب بابتسامة: لا، مش زعلان طبعًا. كارما: إيه ده! ده إنت بتبتسم زي الناس أهو. طب ممكن أعرف مكنتش عايزني أجي معاك ليه؟ شهاب: مكنتش عايز أتعبك بس. كارما: يا سلام! يعني خايف على تعبي؟ شهاب: طبعًا، مش بنت عمي؟ كارما: بنت عمك بس؟ شهاب: أحم.. يالا انزلي، وصلنا خلاص. كارما في نفسها: صبرني يا رب. دخل كل من شهاب وكارما إلى السوبر ماركت، وبعد أن انتهوا من شراء ما يلزمهم ترك شهاب كارما وذهب ليدفع المال مقابل المشتريات. وفي هذه الأثناء جاء أحد الرجال ليسأل كارما عن شيء وأخذ يتحدث معها. الشخص: لو سمحت يا مدام، ممكن تساعديني؟ متعرفيش أنهي نوع بامبرز من دول أحسن؟ كارما: أنا آسفة، بس بصراحة معرفش. أنا لسه آنسة ومتجوزتش يعني، ومعرفش في موضوع البامبرز ده. الشخص: أنا آسف، أنا لما شفت الأستاذ معاكي افتكرته جوزك. كارما: حصل خير. كان شهاب ينظر لما يحدث من بعيد في غضب، وبعد أن انتهى من دفع المال ذهب إلى كارما. شهاب بغضب: في حاجة يا كارما؟ كارما: لا يا شهاب، ده الأستاذ كان بيسأل على حاجة. شهاب: ويسألك ليه؟ كنتِ بتبيعي في المحل؟ اتفضل حضرتك اسأل البياع على اللي إنت عايزه. كارما: محصلش حاجة يعني يا شهاب. شهاب: اتفضلي يا هانم قدامي. خرج كل من كارما وشهاب من السوبر ماركت في غضب من شهاب، وفي أثناء طريقهم إلى الفيلا: كارما: ممكن أعرف إنت مضايق ليه دلوقتي؟ محصلش حاجة يا شهاب لكل ده. شهاب: إزاي تسمحي لواحد غريب يكلمك؟ كارما: كان بيسألني على حاجة عادي يعني، متكبرش الموضوع. شهاب: ماشي يا كارما، بس أحسنلك متكرريش ده تاني. كارما: يعني لو حد جه يكلمني مردش عليه؟ نظر لها شهاب بنظرة نارية أربكتها. كارما: خلاص يا بشمهندس، بلاش بصتك دي. كارما: شهاب! شهاب: أفندم! كارما: هتفضل زعلان كتير؟ خلاص بقى، ميبقاش دمك تقيل. أوعدك لو حد جه يكلمني تاني هقوله: "لو سمحت خد الإذن من ابن عمي الأول قبل ما تكلمني"، خلاص بقى. كتم شهاب ابتسامته. كارما: هو إنت اتضايقت ليه لما الشخص ده كلمني؟ شهاب: إنتِ بتهزري؟ يعني إيه اتضايقت ليه؟ كارما: يعني إنت اتضايقت عشان إنت ابن عمي ومش عايز حد غريب يكلمني، ولا في سبب تاني؟ نظر لها شهاب وسرح في نظراتها له، ولكنه سريعًا ما انتبه أنه يقود السيارة. شهاب بتردد: ممكن تبطلي رغي بقى وتسيبيني أسوق بدل ما أعمل بيكي حادثة؟ وصل كل من شهاب وكارما إلى الفيلا، ولكن كارما طلبت من شهاب أن تذهب لشراء آيس كريم من محل خليل الموجود أمام الفيلا؛ لأنها تعودت أن تذهب إليه وتشتري منه منذ أن كانت صغيرة. وافق شهاب، ولكنه طلب منها ألا تتأخر. فذهبت إلى المحل، وهناك قابلت خليل وابنه حسن. (حسن خليل، وهو البطل الثاني لروايتنا، يبلغ من العمر 22 عامًا، متخرج من كلية التجارة ويبحث عن عمل. وهو شاب متوسط الحال من أسرة فقيرة، أبوه خليل صاحب محل بقالة صغيرة، وأمه متوفاة، وهو يحب كارما ومتعلق بها منذ أن كانت صغيرة.) كارما: إزيك يا عم خليل؟ خليل: إزيك يا ست البنات كلها؟ حمدًا لله على السلامة، مطروح نورت. كارما: شكرًا يا عم خليل. وهنا يقاطع حديثهم حسن. حسن: حمدًا لله على السلامة يا ست كارما، والله وليكوا وحشة. كارما: الله يسلمك يا حسن. فين بقى الآيس كريم بتاعي؟ أوعى تقولّي مش موجود. حسن: لا طبعًا موجود. ده أنا أول ما شفتكم جيتوا، رحت جبتهولك مخصوص. كارما: شكرًا يا حسن. عن إذنكم. تركتهم كارما وذهبت، ولكن كانت عينا حسن معلقتين بها. خليل: ياه على الأيام، بتجري بسرعة. أهي ست كارما دي امبارح بس كانت عيلة بضفيرتين بتشب عشان تطول الترابيزة وتاخد الآيس كريم، وأهي دلوقتي كبرت وبقت ما شاء الله عروسة. حسن بشرود: هي فعلًا كبرت وبقت أحلى عروسة. الفصل الثاني في الصباح كان جميعهم على الشاطئ، وكانت كارما تلعب الكرة مع لبنى وهي سعيدة، وعندما رأت شهاب قادمًا ذهبت إليه في مرح. كارما: ما تيجي تلعب معانا يا شهاب؟ شهاب: ألعب! ألعب إيه؟ هو أنا عيل عشان ألعب؟ كارما: يا سلام! هي العيال بس هي اللي بتلعب؟ شهاب: آه طبعًا، اللعب اللي بتلعبوه ده اسمه لعب عيال، وبعدين وإنتِ زعلانة ليه؟ ما إنتِ لسه عيلة. كارما: أنا عيلة يا شهاب؟ طب على العموم شكرًا. تركت كارما شهاب وهي في قمة غضبها، وعادت إلى لبنى التي لاحظت تغيرها. لبنى: مالك يا كوكي؟ كارما: أنا خلاص زهقت وجبت آخري من برود أخوكي ده. لبنى: برضه مش عايز ينطق؟ كارما: هو بس مش عايز ينطق؟ ده أسلوبه في الكلام معايا وحش أوي. أنا بدأت أحس إني أنا بس اللي بحبه. لبنى: بطلي هبل. إنتِ عارفة إن شهاب بيحبك من زمان. كارما: ما هو باين أوي الحب. لبنى: اسمعي يا كارما، إنتِ عارفة إننا أصلنا صعايدة، يعني متنتظريش من شهاب أي كلام حب ودلع من بتوع الشباب. وبعدين متنسيش كمان إن شهاب شال المسؤولية بدري بعد وفاة بابا وماما، وكمان عمي مسكه مسؤولية شركات الصفدي كلها، يعني أسلوبه الحاد والجدية اللي فيه دول طبيعيين جدًا، بس إنتِ عارفة إنه من جواه طيب أوي وبيحبك وبيخاف عليكي. كارما: أيوه يا لبنى، إحنا صحيح صعايدة، بس بابا وعمي سابوا الصعيد من زمان أوي، من قبل حتى ما نتولد، لما جم يشتغلوا في القاهرة. يعني إحنا اتولدنا واتربينا في القاهرة مش في الصعيد. لبنى: بس العرق الصعيدي بيجري في دم شهاب يا كارما، ومتنسيش إنه أكبرنا وأقرب واحد لعمي، يعني خد من بابا وعمي الطبع الصعيدي. كارما: طب يعني أفقد الأمل في أخوكي من الآخر ولا أعمل إيه؟ لبنى بتفكير: أمممم... يعني إنتِ عايزة الجبل ينطق؟ كارما: أها. لبنى: لقيتها... إنتِ مش قولتيلي إنه امبارح لما شاف واحد بيكلمك الدم ضرب في دماغه وكان باين عليه الغيرة؟ كارما: آه حصل. لبنى: لازم نستفز شهاب ونخليه يغير عليكي ويتجنن، يقوم ينطق على طول. كارما: أيوه، بس أخليه يغير إزاي ومن مين؟ لبنى: نفكر. بعد أن انتهوا من الشاطئ عادوا جميعًا إلى الفيلا، ولكن كارما أوقفت شهاب وطلبت منه أن تذهب إلى محل خليل لشراء آيس كريم. نظر شهاب في اتجاه المحل، وعندما رأى حسن داخل المحل بان عليه الضيق، ولاحظت لبنى هذا. كارما: شهاب، هروح أجيب حاجة من محل عم خليل بسرعة. شهاب بغضب: إنتِ إيه حكايتك؟ كل شوية عايزة تجيبي حاجة من عم خليل. كارما: ودي فيها إيه؟ شهاب: ابقي قوليلي عايزة إيه وأنا أبقى أجيبهولك. كارما: على إيه؟ ده أنا هجيب آيس كريم، مش مستاهلة يعني. شهاب بضيق: طب بسرعة ومتتأخريش. بعد أن تركهم شهاب... لبنى: لقيت الشخص اللي هيحرك شهاب ويخليه يغير. كارما: وده مين ده بقى؟ حركت لبنى رأس كارما في اتجاه محل خليل لتنظر إلى حسن الواقف بداخل المحل. كارما: إنتِ قصدك مين؟ لبنى: حسن ابن عم خليل. كارما بسخرية وضحك: إنتِ بتهزري يا لبنى؟ بقى شهاب الصفدي هيغير من حسن ابن عم خليل؟ لبنى: إنتِ مشوفتيش كان مضايق إزاي لما قولتي إنك رايحة تجيبي حاجة من هناك؟ كارما: أيوه، بس ده مش معناه إنه غيران، وبعدين بالعقل كده، يعني شهاب هيصدق إن كارما الصفدي تبص لواحد زي حسن؟ لبنى: يا ستي نجرب، مش هنخسر حاجة. يمكن الصنم يتحرك. كارما: طب إنتِ عايزاني أعمل إيه؟ لبنى: هقولك. وفي أثناء تناولهم لوجبة الغذاء تعمدت كارما أن تطلب من والدها أن تذهب إلى محل خليل لتثير غيرة شهاب وغضبه. كارما: بابا، ممكن أنزل بعد ما ناكل أجيب حاجة من محل عم خليل؟ حسين: ماشي يا حبيبتي، بس خدي بالك من نفسك. كارما: حاضر يا بابا. شهاب: إيه حكاية عم خليل؟ هو كل شوية عايزة تجيبي حاجة من عنده؟ كارما: ودي فيها إيه دي يا شهاب؟ شهاب: أصلها مش صورة يعني، كل شوية داخلة خارجة. كارما: داخلة خارجة إيه؟ ده المحل قصاد الفيلا. شهاب: برضه، ابقي قوليلي اللي إنتِ عايزاه وأنا أبقى أجيبهولك. كارما بسخرية: مش هتعرف تجيبلي اللي أنا عايزاه. شهاب بغضب: ليه إن شاء الله؟ حسين: بس بقى يا ولاد، كفاية خناق. إنتوا على طول كده زي الديوك. خلاص يا شهاب، مفيهاش حاجة لما تروح تجيب اللي هي عايزاه من عم خليل، ده زي أبوها وهي متعودة عليه. شهاب في نفسه: المصيبة لتكون متعودة عليه هو وابنه. نظرت كارما إلى لبنى التي غمزت لها بإحدى عينيها، وعلمت كارما أن خطة لبنى ستجعل شهاب يتحرك ويبوح بما يخفيه لها من مشاعر. ذهبت كارما إلى محل خليل وتعمدت أن تفتح حديثًا مع حسن، خاصة عندما رأت شهاب وهو يراقبها من خلف شباك الفيلا. كانت كارما تنظر لشهاب نظرات متقطعة، وكلما رأته يزداد غيظًا وغيرة، ازدادت هي في الضحك مع حسن. ولم تكن تعلم أن هذه الضحكة لم تثر غيرة شهاب فحسب، بل كانت بالنسبة لحسن سحرًا ينقله إلى عالم آخر. فهو يحبها منذ أن كانت طفلة، وهي الآن شابة جميلة، وحبه لها يزداد داخل قلبه، فهو لم يستطع أن يرى غيرها طوال السنين الماضية. قطع شهاب حديث كارما وحسن بصوته الغاضب. شهاب: إنتِ هتفضلي ترغي كتير كده؟ مش جبتي الحاجة اللي عايزاها؟ واقفة ليه عندك؟ كارما بخبث: أنا... لا، أنا خلاص خلصت. شهاب: طب يلا على فوق. كارما: حاضر. ذهب شهاب وكارما وتركا حسن في عالم آخر، هائمًا في كارما وسحر عينيها وحبه لها. كارما: شهاب، هو إنت إيه اللي نزلك؟ شهاب بتردد: إيه... اتأخرتِ، نزلت أطمن عليكي. كارما: بجد! لا، كتر خيرك. ومضايق ليه دلوقتي؟ شهاب: مش مضايق، بس بعد كده تاخدي اللي إنتِ عايزاه وتمشي على طول، مش تقعدي تقضيها رغي مع حسن. كارما: ودي فيها إيه اللي يضايقك؟ شهاب بتردد: إيه اللي يضايقني؟!... إنتِ!... قصدي إنتِ مش بنت عمي وأخاف عليكي وعلى سمعتك؟ كارما: بنت عمك! طيب تصبح على خير... يا ابن عمي. مرت الأيام، وكانت كارما تتعمد أن تذهب إلى محل حسن كثيرًا وتتحدث معه وتضحك معه لتثير غيرة شهاب، ولم تكن تعلم أن ما تفعله يزيد من حب وتعلق حسن بها، فحبه لها زاد إلى درجة الجنون، وحديثها معه بعث في نفسه الأمل أن تبادله نفس المشاعر. في إحدى المرات التي كانت فيها كارما في محل خليل، عزم حسن أمره أن يبدأ معها الحديث ليعرف حقيقة مشاعرها تجاهه. كارما: مالك يا حسن؟ شكلك مضايق؟ حسن: هو إنتوا صحيح مسافرين بكرة الصبح؟ كارما: آه يا حسن، خلاص الإجازة خلصت ولازم نرجع القاهرة. حسن: ملحقتوش تقعدوا. كارما: معلش بقى، عشان بابا وشهاب كمان عندهم شغل مهم، وعشان أستعد للدراسة. حسن: ربنا يوفقك يا ست البنات. كارما: مش هتقولي بقى مالك؟ حسن: مفيش حاجة. كارما: أمممم... شكلك بتحب يا حسن. حسن: إيه ده! وأنا شكلي باين عليه أوي كده؟ كارما: باين أوي أوي. قولي بقى مين سعيدة الحظ دي؟ حسن: بنت زي البدر في تمامه، عينيها سحر رباني، جمالها بياخد اللي قدامها لعالم تاني، كلها على بعضها لوحة ربانية أبدع الخالق في رسمها. كارما: إيه ده يا حسن! إنت بقيت شاعر؟ يا بختها بيك وبحبك. حسن: بجد يا ست البنات؟ كارما: طبعًا، وهي ترفضك ليه؟ شاب متعلم وليك مستقبل ومؤدب، وأخلاقك عالية وجدع. حسن: وإيه الفايدة؟ كارما: يعني إيه وإيه الفايدة؟ هي مبتحبكش؟ حسن: معرفش. ساعات بحس من اهتمامها إنها بتحبني ومشدودة ليا، وهي معايا بتحاول تفتح كلام عشان الوقت بينا ميخلصش أبدًا، وبتعمل أي حجة عشان تيجي وتشوفني. كارما: ولسه بتسأل؟ تبقى أكيد بتحبك. كل اللي بتقوله ده معناه حاجة واحدة، إنها بتحبك. حسن: معقولة يا ست كارما ممكن تكون بتحبني فعلًا؟ ده يبقى حلم. كارما: وإيه اللي يمنع يا حسن؟ حسن: الفرق بينا عالي أوي. كارما: مش عيب واحد متعلم زيك يقول كده. الكلام ده كان زمان، وهي لو بتحبك فعلًا هتسيب الدنيا كلها علشان تبقى معاك. حسن: كلامك حلو أوي ويدخل القلب. كارما: خلاص يبقى اسمع كلامي واتشجع وكلمها. حسن: ممكن أسألك سؤال يا ست كارما؟ كارما: اسأل يا حسن. حسن: هو إنتِ يعني بتحبي؟ مرتبطة يعني بحد؟ كارما: أيوه يا حسن، بحب واحد أوي أوي أوي، وكل منايا يحس بحبي ليه. اعتقد حسن أن كارما تتحدث عنه، ولم يكن يعلم أنها تتحدث عن شهاب، وأنها تحب ابن عمها منذ صغرها. حسن: وافرضي إنه عرف وحس بحبك، المفروض يعمل إيه؟ كارما: المفروض يكلم بابا ويتجوزني. كان حديث كارما مع حسن بمثابة الأمل له، فقد عزم أمره أن يتشجع ويدخل التحدي لتكون كارما من نصيبه، وأن يعرض الموضوع على شهاب أولًا. فانتظر أمام الفيلا إلى أن وجد شهاب عائدًا. حسن: بشمهندس شهاب. شهاب: خير يا حسن؟ حسن: معلش، كنت عايز حضرتك في موضوع مهم. شهاب: طب قول، أنا سامعك. حسن: معلش، مينفعش في الشارع، أصله موضوع حساس شوية. شهاب: آه... طب تعالى ندخل نتكلم جوا. دخل كل من شهاب وحسن إلى الفيلا، وعندما رأتهما لبنى ركضت إلى كارما لتعلمها بما رأت، فتعجبت كارما، ولكنهما قررتا أن تراقبا حديث حسن مع شهاب دون أن يراهما أحد. شهاب: خير يا حسن؟ عايزني في إيه؟ حسن: بصراحة أنا مكسوف من حضرتك يا بشمهندس. شهاب: قول يا حسن، متتكسفش. إنت أخويا الصغير. تحب أشوفلك شغل؟ أنا عرفت من عم خليل إنك اتخرجت من كلية التجارة. حسن: لا، ربنا يخليك. أنا الحمد لله قدمت على وظيفة كويسة أوي في شركة كبيرة عندكم في القاهرة واتقبلت، وقريب أوي هستلم الشغل. شهاب: طب عظيم، أمال عايزني في إيه؟ حسن: يعني بصراحة كده يا بشمهندس، نويت أكمل نص ديني. شهاب: ياه! بالسرعة دي؟ طب اصبر حتى لما تثبت رجليك في الشغل، وبعدين فكر في الجواز. حسن: لا، ما أنا بفكر أخطب دلوقتي وأستنى شوية لحد ما أقف على رجلي، وبعدين نتجوز. شهاب: شكلك مستعجل أوي. حسن: بصراحة مستعجل أوي يا بشمهندس، ونفسي تبقى معايا النهاردة قبل بكرة. لبنى بهمس لكارما: ده قصده على مين ده؟ وإيه علاقة شهاب؟ كارما: مش عارفة، اصبري واسمعي. شهاب: عظيم، وطبعًا عايزني أجي معاك، مش كده؟ حسن: مش بالضبط كده، بس الموضوع تقريبًا في إيد حضرتك. نظرت كارما إلى لبنى بتعجب. شهاب باستفهام: في إيدي أنا؟ إزاي؟ مش فاهم. حسن: بصراحة أنا كنت عايز أطلب من حضرتك إيد الأنسة كارما. وضعت كارما يدها على فمها لتكتم ضحكتها. كارما: يا خبر أسود! ده شهاب هيظبطه. لبنى بضحك: وقع في إيد الوحش. شهاب بغضب: إنت اتجننت ولا شارب حاجة؟ إنت جاي لحد عندي تطلب إيد كارما، ومني أنا؟ حسن: وفيها إيه يا بشمهندس؟ وهنا ازداد غضب شهاب. شهاب: إنت مجنون؟ إنت عارف إنت بتكلمني عن مين؟ ازداد خوف كارما ولبنى من غضب شهاب، وركضتا إلى غرفتهما. لبنى: إنتِ يا بت عملتي إيه في الواد حسن؟ خليتيه ييجي يطلب إيدك، لا وما شاء الله نبيه، جاي يطلبها من شهاب. كارما: مش أفكارك يا أختي؟ قعدت أتكلم وأهزر معاه زي ما قولتيلي عشان أخلي الباشا أخوكي يغير. لبنى: بس الظاهر تقلتي العيار حبتين. ده الواد وقع على بوزه وجاي يخطبك. كارما: سيبك منه دلوقتي. المهم تفتكري شهاب هيعمل معايا إيه؟ وفجأة انفجر الاثنان من الضحك على هذا الموقف. نزل حسين عندما سمع صراخ شهاب على حسن، وركض مفزوعًا إلى غرفة الضيوف ليرى ما يحدث، فوجد شهاب ممسكًا بقميص حسن ويتشاجر معه. حسين: في إيه يا شهاب؟ ماسك في حسن كده ليه؟ شهاب: اسأل البيه، شوف جاي يطلب مني إيه. حسين: في إيه يا حسن يا ابني؟ حسن: أنا معرفش يا حسين بيه، طلبي عصب البشمهندس في إيه. شهاب: بطل تستفزني يا حيوان. حسن: يا بشمهندس، بعد إذنك، كفاية إهانات لحد كده. حسين: خلاص يا شهاب، اهدى. إنت اطلع فوق، وأنا هتكلم مع حسن وأشوف عايز إيه. شهاب بغضب: حاضر يا عمي. حسين: في إيه يا حسن؟ ماله شهاب بيتخانق معاك ليه؟ حسن: أنا معرفش هو ماله يا حسين بيه. أنا لسه بقوله إني طالب إيد الأنسة كارما، لقيته... حسين مقاطعًا: إيه! إنت طلبت منه إيد كارما بنتي ومستغرب عمل فيك كده ليه؟ ده الحمد لله إنه مقتلكش. حسن: مش للدرجة يا حسين بيه. أنا عارف طبعًا إني مش قد المقام، بس... حسين: مقام إيه يا ابني؟ مش حكاية مقامات. حكاية إنك رحت تطلب كارما من خطيبها. حسن في صدمة: إيه؟ خطيبها؟ الفصل الثالث تجلس كارما مع لبنى في غرفتهما، وهي خائفة مما سيفعله شهاب معها. وفجأة يدخل شهاب وهو غاضب منهما، ويشير بيده إلى لبنى دون أي كلام، فتخرج لبنى سريعًا وتتركه مع كارما. تقف كارما، وهي مولية ظهرها لشهاب، محاولة ألا تُظهر خوفها منه، وتتظاهر بالقوة أمامه. شهاب بغضب: ممكن أعرف يا هانم إيه اللي حصل ده؟ كارما متظاهرة بعدم الخوف: إيه يا شهاب؟ إيه اللي حصل؟ شهاب: يعني مش عارفة؟! إزاي يا هانم يوصل بيكي إن واحد يجيلي عشان يخطبك مني؟ وإيه العلاقة اللي بينك وبينه عشان ييجي لحد هنا ويطلب إيدك؟ كارما: وأنا مالي؟ أنا ماليش علاقة بحد، هو عمل كده من نفسه. وبعدين هو إنت مضايق نفسك ليه دلوقتي؟ هو أنا فارقة معاك في إيه؟ شهاب بغضب: إنتِ اتجننتي يا كارما؟ إنتِ مش عارفة إنتِ فارقة معايا في إيه؟ كارما: لا، مش عارفة يا شهاب. شهاب بصراخ: فارقة معايا عشان بحبك يا غبية! فاهمة ولا أفهمك تاني؟ بحبك! التفتت كارما إليه في صدمة مما سمعته، فهو أخيرًا باح لها بما يكنه لها من مشاعر. أخيرًا اعترف بحبه لها، وسمعت منه ما تمنت أن تسمعه طوال حياتها. فهو حب الطفولة والشباب، وحب عمرها كله. شهاب: بقولك بحبك، وعمري ما حبيت ولا هحب غيرك. كارما: يااااااه... أخيرًا يا أخي نطقتها، أخيرًا سمعتها منك. شهاب: يا سلاااااام! هو أنا يعني لازم أقولها؟ يعني إنتِ مش حاسة من زمان أوي إني بحبك؟ كارما: وهحس إزاي بقى إن شاء الله؟ وإنت طول الوقت مصدرلي الوش الخشب، وأسلوبك ناشف معايا. عمرك ما فكرت تقولي كلمة حلوة، ولا كنت بتعاملني على إني حبيبتك. شهاب: أمال خطبتك ليه لو مكنتش بحبك؟ كارما: معرفش يا شهاب. للحظة فكرت إنك خطبتني عشان تحافظ على فلوس العيلة ومتطلعش برة. شهاب: تبقي عبيطة يا كارما لو فكرتي كده. يا كارما، أنا بحبك من زمان أوي، من أول ما عيني فتحت عليكي وإنتِ بتكبري قدامي يوم ورا يوم. بحسك حتة مني، حاجة تخصني لوحدي. كنت مستني اليوم اللي نتجوز فيه وتبقي مراتي حلالي، وساعتها كنتِ هتحسي أنا قد إيه بحبك. كارما: كان فين الكلام الحلو ده بس من زمان؟ شهاب: يا حبيبتي، لازم تعرفي إني غصب عني مبعرفش أقول كلام الحب والدلع بتاع الشباب ده. مش طبعي يا كارما، ومتعودتش أقوله. لكن إنتِ المفروض تحسي بحبي من تصرفاتي معاكي، من اهتمامي بيكي وخوفي عليكي. كارما: كفاية عليا إني أخيرًا سمعت منك إني حبيبتك. في اليوم التالي، استعد الجميع للعودة إلى القاهرة. وفي أثناء ذلك رأت كارما حسن واقفًا داخل محله، فاستغلت عدم وجود شهاب الذي ذهب لشراء بعض المشتريات، وذهبت إلى حسن لكي تعتذر له عما حدث منها دون قصد. كارما: حسن! عامل إيه دلوقتي؟ حسن بحزن: الحمد لله. كارما: حسن! أنا بجد آسفة أوي عن اللي حصل معاك امبارح، واللي عمله معاك شهاب. حسن: متتأسفيش يا ست البنات، ده مش ذنبك ولا ذنبي. كارما: مش فاهمة قصدك إيه؟ حسن: يعني أنا عارف إنكم صعايدة، وأكيد والدك أجبرك تتخطبي للبشمهندس عشان مينفعش تتجوزي من برة، وفلوس العيلة متخرجش برة وكده. كارما: مين اللي قالك الكلام ده؟ بابا صحيح صعيدي، بس عمره ما فكر كده، ولا عمره أجبرني على حاجة. حسن: أمال يعني هيكون إيه اللي خلاكي توافقي على خطوبتك من ابن عمك بعد اللي حصل بينا؟ كارما: اللي حصل بينا؟! هو إيه اللي بينا؟ مش واخدة بالي! حسن: إنتِ مش فاهمة يا كارما إيه اللي بينا؟ كارما: اللي بينا إيه؟ هو أنا عشان وقفت اتكلمت معاك شوية وسألتك عن أحوالك بقيت بحبك؟ حسن: لا، مش بس كده. اهتمامك بيا وكلامك معايا وكل تصرفاتك معايا بتقول إنك بتحبيني. مش فاكرة لما قولتيلي إنك بتحبي واحد وهو مش حاسس بيكي؟ كارما: آآآآآه... وإنت بقى بذكائك فسرتها إني بحبك إنت؟ حسن: أمال كنتِ تقصدي مين؟ كارما: يا حسن، ما تفوق بقى من الوهم اللي إنت فيه. أنا محدش جبرني على خطوبتي من شهاب ابن عمي، لأني ببساطة بحبه وهو كمان بيحبني. وهو نفسه الشخص اللي كلمتك عنه وقلتلك إني بحبه. شهاب مش بس ابن عمي... شهاب كمان حبيبي وخطيبي. حسن: حرام عليكي! إنتِ ليه عملتي فيا كده؟ ليه رفعتيني لسابع سما وبعدها وقعتيني على جدور رقبتي؟ كارما: إنت اللي عشت حلم مش بتاعك، وده مش ذنبي. وأنا مش كل ما هتكلم مع حد أبقى بحبه يعني. فوق يا حسن واعرف أنا مين وإنت مين. أنا كارما الصفدي، خطيبة المهندس شهاب الصفدي، فاهمني؟ وأرجوك فوق لنفسك بقى، وحاول تنسى اللي حصل. حسن: حاضر يا كارما هانم... يا بنت الصفدي. أوعدك إني هفوق لنفسي. تمر السنين، وتتزوج كارما من شهاب، ويعيشان حياة سعيدة يتخللها الحب والتفاهم. في منزل شهاب الصفدي: تنزل كارما إلى الصورة المعلقة على الحائط، وهي صورة زفافها من شهاب، وتبتسم محدثة نفسها. كارما: ياه يا شهاب، أربع سنين دلوقتي عدوا على جوازنا. صحيح الأيام الحلوة بتعدي بسرعة أوي. ربنا يخليك ليا يا حبيبي، وتفضل معايا العمر كله. في شركة الصفدي: يجلس شهاب على مكتبه يراجع بعض الأوراق الخاصة بالشركة، ويدخل عليه كريم. (كريم الصفدي هو الأخ الأكبر لكارما، وابن عم شهاب، ويصغر شهاب بعامين. شاب مستهتر، دائم السهر ليلًا، ولا يعتمد عليه. متخرج من كلية السياسة والاقتصاد.) شهاب: أهلًا يا بيه، متأخر زي عوايدك. كريم بكسل: مش المهم إني جيت. يلا اطلبلي قهوة بقى عشان أعرف أركز معاك. شهاب: يا كريم، مش كده. مش كل يوم سهر للصبح. حتى الشغل مش مركز فيه. كريم: آه، دي ليلى هانم موصياك عليا على الصبح بقى؟ شهاب: ومن غير طنط ليلى ما تكلمني، ما أنا شايف قدامي كل يوم بتيجي الشغل متأخر ومش مركز في حاجة يا كريم. متنساش إن عمي الله يرحمه موصيني عليك قبل ما يموت. كريم: ماشي يا كبير عيلة الصفدي. ممكن نكمل الأسطوانة بتاعة كل يوم، بس بعد ما أشرب القهوة وأفوق؟ ويلا نتكلم في الشغل. شهاب: شغل إيه بمنظرك ده؟ لما تبقى تشرب القهوة. المهم اعمل حسابك متتسرمحش في حتة النهارده. كريم: ليه؟ خير؟ نويت تيجي تسهر معايا؟ شهاب: أعوذ بالله عليك يا أخي! إنت إيه؟ إنت ناسي إني متجوز أختك؟ المهم متنساش اللي اتفقنا عليه، ولا ده كمان نسيته؟ كريم: آه آه، افتكرت خلاص يا عم. كنت ناسي. شهاب: طب يا أخويا، على الله بالليل متكونش نسيت تاني. كريم: صحيح، هي كارما عاملة إيه؟ شهاب: كويسة الحمد لله. نفسها تفتكر إن ليها أخ وييجي يزورها. كريم: صباح تلقيح الكلام على الصبح! حاضر يا شهاب، هبقى أزورها. أنا رايح أشرب قهوتي في مكتبي. سلام. شهاب: سلام. يترك كريم شهاب، وبعدها يمسك شهاب هاتفه متحدثًا مع كارما. شهاب: صباح الخير على حب عمري كله. كارما: صباح النور يا حبيب عمري. زعلانة منك، مشيت من غير ما أشوفك النهارده. شهاب: حبيبتي، لقيتك نايمة ومرضتش أصحيكي. المهم عايز أرجع من الشغل ألاقيكي جاهزة وعلى سنجة عشرة. كارما: إشمعنى يعني؟ شهاب: يعني زي ما تقولي كده... هنخرج نسهر برة النهارده. كارما: ماشي يا حبيبي، هستناك. بس على الله إنت اللي متتأخرش عليا زي عوايدك. مع حلول الليل، تستعد كارما للخروج مع شهاب، أما شهاب فيقف أسفل العمارة في انتظار نزولها. وعندما تنزل كارما، ينبهر شهاب بجمالها، فقد كانت كالأميرة في رقتها وجمالها. شهاب: يا خبر أبيض عليا وعلى سنيني! كارما بابتسامة: إيه يا شهاب؟ مالك؟ شهاب: مالي إيه بس؟ هخرج بيكي إزاي كده؟ كارما: إيه؟ شكلي وحش؟ شهاب: وحش إيه بس! ده أنا شايف الشمس اتكرمت ونزلت تسهر معايا. لا لا، أنا غيرت رأيي، مش هنروح نسهر برة. يلا على فوق. كارما: يلا يا شهاب، بلاش غلاسة بقى. شهاب: هخرج على مسؤوليتك، بس لو طخيتلي كام واحد على الماشي عشان بصوا لك متبقيش تزعلي، وأنا صعيدي ومخي مقفول. كارما: لا وعلى إيه الطيب، أحسن. شهاب بضحك: طب يلا يا قمري. كارما: قولي بقى، هنروح فين؟ شهاب: دلوقتي تعرفي. ركب كل من شهاب وكارما السيارة متجهين إلى فيلا الصفدي. شهاب: يلا انزلي. كارما: أنزل فين؟ إحنا إيه اللي جابنا الفيلا هنا؟ إنت مش قولت هنسهر؟ شهاب: انزلي بس. يتوجه شهاب وكارما إلى داخل الفيلا، وعندما يفتح الباب تتفاجأ كارما بأن شهاب أعد لها حفلًا كبيرًا، ودعا فيه جميع الأقارب والأصدقاء بمناسبة عيد زواجهما. كارما بفرحة: إيه المفاجأة دي يا شهاب؟ إنت عملت كل ده إمتى؟ يخرج شهاب من جيبه خاتمًا ويلبسه لكارما، ثم يقبل يدها. شهاب: كل عيد جواز وإنتِ معايا يا حبيبتي. لم تصدق كارما ما يحدث حولها، وشعرت وكأنه حلم جميل، فاحتضنت شهاب بشدة ودموع الفرحة في عينيها. كارما: بحبك يا شهاب... بحبك يا ابن عمي. بعد انتهاء الحفل، ذهب شهاب وكارما إلى منزلهما، وبعد أن بدلا ثيابهما جلس شهاب بجوار كارما على السرير ممسكًا بيدها، ونظر لها بحب. كارما: أنا مش مصدقة إنك عملت كل ده علشاني. ربنا يخليك ليا يا شهاب. شهاب: لو معملتش كل ده علشانك يا كارما، هعمله علشان مين؟ ده إنتِ حبيبتي ومراتي وبنت عمي. لسه برضه مش شايفاني رومانسي؟ تمسك كارما بطنها وتتحدث بتعب. كارما: ياه... إنت لسه فاكر؟ شهاب: مالك يا كارما؟ كارما: معرفش يا شهاب، مغص جامد أوي. شهاب: ده عندك من إمتى؟ كارما: عندي من الصبح، بس كنت بلهي نفسي. بس مكنش جامد كده. يزداد تعب كارما. شهاب: طب هطلب لك الدكتور. كارما بألم: لا يا شهاب، وديني المستشفى أحسن. أنا مش مستحملة الوجع خالص. شهاب: طب اسندي عليا وتعالي أوديكي المستشفى. تسندت كارما على شهاب لتذهب إلى المستشفى، لكنهما تفاجآ بنزول دم غزير منها. كارما بصراخ: الحق يا شهاب!!!!! صُدم شهاب عندما رأى الدم، فحمل كارما وذهب بها سريعًا إلى المستشفى. الفصل الرابع يقف شهاب أمام غرفة الكشف في انتظار خروج الطبيب ليطمئنه على كارما. شهاب: خير يا دكتور؟ طمني. الدكتور: للأسف... حالة إجهاض. شهاب بوجع: تااااني؟ الدكتور: أنا آسف يا بشمهندس، بس أنا سبق وقلت لكم إن المشكلة إن أنت والمدام ولاد عم، وده مأثر على موضوع الحمل ومخلي كل حمل يحصلها يتعرض للإجهاض. المشكلة إن الرحم عندها اجهد من كتر الإجهاض، ولازم تاخد وسيلة تمنع الحمل في الوقت الحالي لحد ما الرحم يرتاح شوية. شهاب: أنا قولتلها يا دكتور، بس هي رفضت. قالتلي: إزاي أمنع الحمل بإيدي؟ هي نفسها تبقى أم. الدكتور: أيوة، بس هي كده بتعرض نفسها للخطر، لأن كل حمل بيحصل ما بيكملش، وكل ده إجهاد على الرحم. شهاب: أنا هحاول أتكلم معاها تاني، ويارب المرة دي تقتنع. الدكتور: على العموم، إحنا عملنا اللازم، وممكن تفضل معانا للصبح نطمن عليها، وبعد كده تروحوا. شهاب: متشكر يا دكتور. الدكتور: شد حيلك يا ابني. يدخل شهاب على كارما ليجدها نائمة على السرير، معلقة لها بعض المحاليل، ووجهها باهت ومتعب. يجلس بجوارها ويمسد على شعرها ممسكًا يدها، فتفتح كارما عينيها ببطء عندما تشعر به. كارما بضعف: شفت يا شهاب؟ ابننا راح... المرة دي كمان سقط زي كل مرة. شهاب: هششش... متفكريش في أي حاجة دلوقتي. أهم حاجة عندي إنك تقوميلي بالسلامة. كارما: بس أنا نفسي أوي أجيب ابن منك نفرح بيه يا شهاب. شهاب: حبيبتي، ده نصيب، وإحنا لازم نرضى بيه. وصدقيني يا كارما، أنا مستكفي بيكي عن الدنيا كلها. كارما: خليك جنبي يا شهاب... أنا تعبانة أوي. شهاب: أنا جنبك يا حبيبتي، وعمري ما هبعد عنك. بعد قليل يدخل كل من كريم وليلى للاطمئنان على كارما. ليلى: إيه اللي حصل يا شهاب؟ كارما مالها؟ شهاب: الحمد لله، عدت على خير. يذهب كريم إلى كارما ويقبل رأسها. كريم: سلامتك يا كارما، ألف سلامة عليكي يا حبيبتي. كارما بضعف: الله يسلمك يا كريم. متقلقيش يا ماما، أنا كويسة. شهاب: كريم... تعالى، أنا عايزك. كريم: حاضر. يخرج كريم مع شهاب، ويتركان ليلى بجوار كارما تحتضنها. يقص شهاب على كريم ما قاله الطبيب. كريم: يا حبيبتي يا كارما... إجهاض تاني! دي تعبت أوي يا شهاب كده. شهاب: المشكلة يا كريم إن الدكتور قال لازم تاخد مانع حمل، لأن الرحم اجهد من تكرار الإجهاض، وده مش كويس علشانها. كريم: مستحيل هتوافق. دي أختي وأنا عارفها، صعيدية ودماغها ناشفة. شهاب: أيوة، بس المرة دي بتخاطر بحياتها، وأنا مستحيل أسمح بده. كريم: بص يا شهاب، الوحيد اللي يقدر يقنعها بحاجة زي دي هو أنت. مش بس لأنك جوزها، لأنك كمان حبيبها وأقرب واحد ليها من زمان. أنت الوحيد اللي ليك قدرة على إقناعها. شهاب: تفتكر هقدر أقنعها المرة دي؟ كريم: جرب. منزل شهاب يعود شهاب مع كارما إلى المنزل بعد أن سمح لها الطبيب بمغادرة المستشفى. تستقبلهما انتصار الخادمة. انتصار: حمدًا لله على السلامة يا هانم. كارما: الله يسلمك يا انتصار. شهاب: حضري الأكل يا انتصار لكارما ودخليه جوه الأوضة. انتصار: حاضر يا بيه. كارما: مليش نفس يا شهاب. شهاب: مفيش الكلام ده، أنا هفتح نفسك. يدخل شهاب كارما إلى غرفتهما، ويريحها على السرير، ويحاول معها أن تأكل. كارما: خلاص يا شهاب، مش قادرة. عشان خاطري يا شهاب متغصبش عليا. شهاب: خلاص يا ستي... بالهنا والشفا. كارما: ربنا يخليك ليا يا شهاب. شهاب (مقبلًا يديها): ويخليكي ليا يا حبيبتي. ثم يتردد قليلًا قبل أن يقول: شهاب: كارما... في موضوع عايز أكلمك فيه. كارما: موضوع إيه؟ شركة الصفدي يدخل كريم مكتب شهاب ليراجع بعض الملفات، فتدخل عليه نيفين السكرتيرة. نيفين: كريم بيه، هو شهاب بيه مش هييجي النهاردة؟ كريم: لا يا نيفين، كارما تعبانة شوية وهيفضل جنبها النهاردة. نيفين: ألف سلامة عليها. كريم: لو في حاجة مهمة بلغيني. نيفين: حاضر يا فندم. صحيح، في واحد سأل على بشمهندس شهاب. كريم: حد مين؟ اسمه إيه يعني؟ نيفين: مرضيش يقول اسمه. كريم: طب كان عايز شهاب في إيه يعني؟ نيفين: بيقول موضوع شخصي. كريم: موضوع شخصي؟! طب لو جه تاني ابقي دخليهولي. نيفين: حاضر يا فندم. العودة إلى منزل شهاب يستأنف شهاب حديثه مع كارما لإقناعها بأخذ وسيلة تمنع الحمل في الوقت الحالي. كارما: أنت بتقول إيه يا شهاب؟ أنت عايزني أمنع الحمل بإيدي؟ عايزني أقتل الأمل اللي عايشة عليه إن حملي يتم وأبقى أم؟ عايزني أقتل بإيدي حلم الأمومة عندي؟ لا أكيد أنت بتهزر. شهاب: يا حبيبتي، أنا ما قلتش هتمنعيه على طول. فترة مؤقتة لحد ما الرحم يرتاح شوية، وإنتي تستردي صحتك. كارما حبيبتي، إحنا ناس مؤمنة وراضيين باللي جايبهولنا ربنا، وعارفين إن مفيش حمل لينا بيتم. كارما: أيوة، بس أنا عمري ما هفقد الأمل، وعندي إحساس إن ربنا هيعوض صبري خير ويحققلي أمنيتي وأبقى أم. شهاب: يا كارما، إنتي كده بتخاطري بحياتك. كارما: أنت لسه قايل إننا ناس مؤمنة، وأنا راضية باللي كاتبهولي ربنا. شهاب (محتضنًا إياها): عشان خاطري يا كارما، أنا خايف عليكي أوي، ومش متخيل الحياة من غيرك. كارما: يا سيدي، أنت شوفتني حملت خلاص. مش يمكن الحمل يتأخر لوحده؟ شهاب: ولو حصل؟ كارما: ساعتها يبقى يحلها ربنا. شهاب: دماغك ناشفة يا بنت عمي. كارما: خليك جنبي بس يا شهاب. وجودك جنبي هو اللي هيديني القوة أستحمل أي حاجة مهما كانت صعبة. شهاب (مقبلًا رأسها): أنا جنبك على طول يا كارما. بعد مرور يومين في منزل شهاب بدأت كارما تستعيد قوتها وصحتها، وأصبحت تتحرك داخل المنزل. كارما: انتصار، اعمليلي نسكافيه. انتصار: حاضر يا هانم. يدق جرس الباب، فتذهب انتصار لتفتح الباب، لتجد عاملًا من محل ورد يحمل باقة ورد لكارما. كارما: مين يا انتصار؟ انتصار: ده واحد جايب بوكيه الورد ده لحضرتك. كارما: ليا أنا؟! ما قالش من مين؟ انتصار: لا يا هانم. كارما: طب هاتيه كده. تمسك كارما بباقة الورد وتقرأ الكارت الموجود معها، فتجد مكتوبًا فيه: "ألف سلامة عليكي يا ست البنات." كارما: معلهوش اسم... بس أكيد من شهاب. هيكون من مين يعني؟ يعود شهاب من عمله إلى المنزل ليلًا، ليجد كارما في انتظاره. شهاب: إيه القمر ده؟ هو كل اللي بيتعبوا بيحلوا كده؟ كارما: يا سلام! ده بكش بقى. شهاب: مين قال إن ده بكش؟ ده واحد شايف مراته في عينه على طول حلوة وزي القمر. كارما: طب ممكن تغير هدومك عشان نتعشى سوا؟ مجاليش نفس آكل طول اليوم من غيرك. شهاب: حاااااضر. ثم نظر إلى باقة الورد الموضوعة بالخارج وقال: شهاب: قوليلي صحيح، مين اللي جاب بوكيه الورد اللي برة؟ كارما باستغراب: إيه ده؟ أنا افتكرتك أنت اللي بعته. شهاب: لا، أنا ما بعتش ورد. هو ما كانش عليه كارت؟ كارما: كان عليه، بس مش مكتوب عليه اسم. كل اللي كان مكتوب عليه: "ألف سلامة عليكي". شهاب: غريبة دي. كارما: على العموم، يمكن يكون حد من صحابنا أو قرايبنا عرف بتعبي وبعته، ونسي يكتب اسمه عليه. شهاب: يمكن. بعد مرور عدة أيام في منزل شهاب تجلس كارما على الأريكة تشاهد التلفاز، فإذا بهاتف المنزل يرن. تذهب وترد. كارما: ألو. الشخص: إزيك يا حبيبتي؟ كارما: أفندم؟! حبيبتي؟! مين معايا؟ الشخص: أنا حبيبك. كارما: الظاهر حضرتك طلبت رقم غلط. تغلق كارما الهاتف، لكنه يعاود الاتصال من جديد، فترد مرة أخرى. كارما: ألو. الشخص: كده تقفلي السكة في وشي بدل ما تقوليلي وحشتني؟ كارما: لا، الظاهر إنك فاضي وبتتسلى وتعاكس، وأحسنلك تقفل ومتتصلش هنا تاني. الشخص: عندك حق، الكلام في التليفون مالوش لزمة. أنا هاجي بنفسي عشان أشوفك... أصلك وحشاني أووووي. كارما: لا، ده أنت إنسان مش محترم بقى، والظاهر إنك مش عارف أنت طالب مين. الشخص: لا، عارف كويس يا مدام كارما أنا طالب مين. على العموم، استنيني الأيام الجاية. آه، وسلامي لبشمهندس شهاب. يعود شهاب إلى المنزل بعد إنهاء عمله. يدخل باحثًا عن كارما، ليجدها واقفة في الشرفة، ناظرة إلى النيل وشاردة. يقترب منها ويحتضنها من الخلف. كارما: شهاب! أخس عليك، خضتني. شهاب: حبيبي سرحان في إيه؟ التفتت كارما إليه ونظرت له، لكن نظراتها كانت مليئة بالقلق والخوف. شهاب: مالك يا كارما؟ في إيه يا حبيبتي؟ كارما: حاسة إني مخنوقة أوي يا شهاب... وقلبي مقبوض. احتضنها شهاب أكثر. شهاب: ده بس عشان اللي حصلك، لكن مفيش حاجة تخليكي تقلقي. أنا معاكي وجنبك. ازدادت كارما تعلقًا به واحتضانًا له لتشعر بالأمان. لكن قلبها ظل قلقًا وخائفًا من شيء لا تعرفه. الفصل الخامس بعد مرور شهرين شركة الصفدي يجلس شهاب في مكتبه يراجع بعض الملفات، فتدخل عليه نيفين. شهاب: خير يا نيفين؟ في حاجة؟ نيفين: في واحد عايز حضرتك برة. شهاب: واحد مين ده؟ نيفين: هو كان جه لحضرتك قبل كده لما كانت مدام كارما تعبانة، بس مرضيش يقول اسمه. شهاب: ليه يعني؟ جنابه اللهو الخفي؟! أقولك دخليه نشوف إيه حكايته. نيفين: حاضر يا فندم. يدخل الشخص إلى مكتب شهاب. فيتفاجأ شهاب بوجوده، وتتغير ملامح وجهه إلى الضيق والاستياء. شهاب: أنت! هو أنت بقى اللي عايز تقابلني ومش راضي تقول اسمك؟ حسن: أيوة أنا يا بشمهندس. يا ترى فاكرني ولا السنين خلتك نسيتني؟ شهاب: لا للأسف، فاكرك. خير؟ جاي تخطب مين المرة دي يا حسن؟ حسن: ما تستعجلش يا بشمهندس، هتعرف أنا عايز إيه. شهاب: طب اقعد وقول عايز إيه، بس بسرعة عشان مشغول. حسن: أنا مش هاخد من وقتك كتير، هما كلمتين هقولهم وأمشي. شهاب: وإيه هما الكلمتين؟ حسن: أنا جاي النهاردة أطلب منك تعمل موقف نبيل، وتسيب اتنين بيحبوا بعض يرجعوا لبعض، وترحمهم من العذاب اللي عايشينه وهما بعيد عن بعض. وأنا واثق إنك مش هترضى تبني سعادتك على حساب تعاسة غيرك. تجهم وجه شهاب. شهاب: أنت بتقول إيه؟ أنا مش فاهم منك حاجة. هما مين الاتنين اللي عايزني أرجعهم لبعض؟ وأنا دخلي إيه أصلًا بالكلام ده؟ حسن: لا، دخلك يا بشمهندس. لأن الاتنين اللي بكلمك عليهم هما أنا وكارما مراتك. شهاب بعصبية: أنت بتقول إيه يا حيوان؟! إزاي تجرؤ تجيب سيرة كارما مراتي على لسانك؟! الظاهر إن علقة المرة اللي فاتت ما علمتكش الأدب، ولا شكلك شاربلك حاجة! حسن: اهدى بس يا بشمهندس، وحاول تفهم الموضوع صح، وياريت بلاش تهور. شهاب: موضوع إيه اللي أفهمه؟ حسن: أنا مقدر طبعًا إن الموضوع بالنسبة ليك صدمة، بس هي دي الحقيقة اللي لازم تتعايش معاها. أنا وكارما بنحب بعض من زمان، ولولا إن حسين بيه الله يرحمه جبرها إنها تتخطبلك وتتجوزك، كان زماني أنا وهي متجوزين دلوقتي. وسكت لحظة ثم أكمل: حسن: وعلى فكرة، ده كلام كارما مش كلامي. هي كل ما تقابلني تأكدلي إنها لسه بتحبني، وإنها عمرها ما حبت ولا هتحب حد غيري، وإنها كانت مجبرة تتجوزك عشان تنفذ رغبة والدها... مش أكتر. اندفع شهاب نحوه وأمسكه من قميصه بعنف. شهاب: أنت اتجننت يا كلب؟! إزاي تتكلم كده عن مراتي؟! مراتي أنا بتروح تقابلك من ورايا أنت؟! وتقولك الكلام ده؟ في هذه اللحظة دخل كريم إلى المكتب بعدما سمع صوت شهاب المرتفع. كريم: مالك يا شهاب؟ بتزعق ليه؟ ومين الشخص ده؟ شهاب: البيه جاي يقولي إن كارما بتحبه وبتروح تقابله من ورايا. التفت كريم إلى حسن بغضب. كريم: أنت بتقول إيه يا بني آدم؟! أنت إزاي تجرؤ تجيب سيرة كارما على لسانك؟ حسن: أنا غلطان إني جيت أطلب منك تنسحب بهدوء من حياتنا، بدل ما تفضل عايش طول عمرك زوج مراته بتستغفله. وهنا لم يستطع شهاب أن يتمالك أعصابه. ذهب إلى درج مكتبه، وأخرج منه مسدسه، وهمّ أن يطلق النار على حسن، لولا أن أمسك كريم يده بسرعة. كريم: هتعمل إيه يا مجنون؟! شهاب: هقتله! أمال هسيبه عايش بعد الكلام اللي قاله على كارما؟ نظر كريم إلى حسن بغضب شديد. كريم: غور أنت من وشه دلوقتي ليقتلك! وقسمًا بالله لأدفعك تمن كل كلمة قلتها على أختي. وقف حسن متماسكًا وقال: حسن: على العموم، أنا هرجعلك تاني لما تهدى. يمكن تبقى حابب تعرف أكتر عن حقيقة اللي بيني وبينها. ثم ابتسم ابتسامة مستفزة وأضاف: حسن: آه... وابقى بلغها إني هبقى معاها في أقرب وقت، فمفيش داعي تبقى قلقانة كده وقلبها مقبوض. كريم: اطلع برة يا حيوان! برة... لاطلبلك الأمن! خرج حسن من المكتب تاركًا خلفه صدمة ثقيلة، وصمتًا خانقًا. جلس شهاب على مقعده واضعًا يده على رأسه. كريم: إيه يا شهاب؟ مالك؟ رفع شهاب رأسه ونظر إليه. كريم: أنت بتبصلي كده ليه؟ المفروض ما تبقاش في الحالة دي أصلًا، ولا الكلام يفرق معاك. ده واحد مجنون وبيقول كلام مجانين، محدش يصدقه. لم ينطق شهاب بأي كلمة، وكأن الكلام تجمد على لسانه. كريم: أنا كنت متخيل في موقف زي ده إني المفروض أنا اللي أثور، وأنت اللي تحاول تهديني. شهاب: إشمعنى؟ كريم: عشان أنت عارف كارما أكتر مني يا شهاب. أنا صحيح أخوها الشقيق، لكن أنت بالنسبة لها كل حاجة في حياتها. أنت ابن عمها اللي رباها، وكانت بالنسبة ليك أختك وبنتك وحبيبتك، ودلوقتي مراتك. ثم أكمل بثقة: كريم: أنت تعرف كارما أكتر من نفسك. أوعى تقولي إنك صدقت حرف واحد من كلام الواد ده. لا، ده أنت تبقى بتهزر. ده أنتوا قصة حبكم كانت معروفة في العيلة كلها. إزاي تصدق ولو مجرد شك إنها ممكن تفكر في غيرك؟ تنهد شهاب بعمق. شهاب: أنا عارف كل الكلام اللي أنت بتقوله كويس أوي. وزي ما أنت قولت، كارما تبقى حبيبتي قبل ما تبقى مراتي وبنت عمي... عشان كده مش متخيل إن ممكن الكلب زي ده يقول كلمة واحدة عليها. كريم: خلاص، يبقى تنسى كل اللي حصل واتقال. شهاب: هحاول يا كريم... بس ممكن كارما ما تعرفش حاجة عن اللي حصل ده. هي فيها اللي مكفيها. كريم: ماشي يا ابن عمي. عاد شهاب إلى منزله وهو في حالة غير طبيعية من أثر كلام حسن عليه. كان الشرود واضحًا على وجهه. وجد كارما في انتظاره. وما إن رأته حتى جرت نحوه وارتمت بين أحضانه. لكن هذه المرة لم يتجاوب معها شهاب، ولم يبادلها مشاعرها المعتادة، بل ابتعد عنها وجلس على السرير. شعرت كارما بالدهشة والقلق. جلست أمامه على ركبتيها، وأمسكت بيديه. كارما: مالك يا شهاب؟ لم يجبها. ظل ينظر إليها في صمت. كانت الأفكار تتصارع داخل رأسه. هل يمكن أن يكون ما يراه أمامه من حب طوال هذه السنوات مجرد تمثيل؟ هل يمكن أن تخدعه كارما كل هذه السنين، ويعيش على وهم كبير اسمه الحب؟ لا... لا يمكن. فهذه هي كارما... حبيبته التي رباها على يديه. كبرت أمام عينيه، وكبرت في قلبه. لا يمكن أن يكون حبهما وهمًا أو لعبة. ولا يمكن لكارما أن تخدعه أبدًا. لكن كلمات حسن عادت ترن في أذنه: "وابقى بلغها إني هبقى معاها قريب... فبلاش تبقى قلقانة كده وقلبها مقبوض." ازدادت حيرته، وبدأت تظهر بوضوح على ملامحه. وأفاق من شروده على صوت كارما. كارما: إيه يا شهاب؟ بكلمك من ساعة ما جيت وما بتردش عليا. أنت مش سامعني؟ شهاب بضيق: معلش... سرحت شوية. كنتِ بتقولي إيه؟ كارما: بقولك مالك يا حبيبي؟ شكلك مضايق. شهاب: إنتِ لسه قلبك مقبوض وقلقانة؟ استغربت من سؤاله. كارما: ليه بتسأل السؤال ده؟ شهاب: مفيش... بطمن عليكي. كارما: لا يا حبيبي، طول ما أنت معايا أنا ببقى مطمنة وبنسى كل القلق. ابتعد عنها شهاب متجهًا إلى خزانة الملابس ليبدل ملابسه، بينما كانت هي تراقبه باستغراب. كارما: طب أنا هروح أحضرلك العشا على ما تغير هدومك. شهاب: لا... أنا هنام على طول. كارما: ليه يا شهاب؟ مش هتتعشى؟ شهاب: مليش نفس... تصبحي على خير. وتركها ودخل لينام. أما كارما فظلت واقفة مكانها تنظر إليه في حيرة. كارما في نفسها: "هو في إيه؟... ماله؟" الفصل السادس تمر الأيام وتلاحظ كارما تغير شهاب، فقد أصبح دائمًا مهمومًا وشارد الذهن، ويتجنب الحديث معها أغلب الوقت. كان كلام حسن يتردد دائمًا في ذهنه، مما يزيد الشك بداخله ويضاعف حيرته. أما كارما فلم تعد تقدر على رؤيته بهذه الحالة دون أن تعرف السبب، فقررت أن تسأل كريم عن سبب حزن شهاب. اتصلت كارما بكريم وطلبت منه أن يأتي إليها لأمر عاجل، وبالفعل ذهب إليها. كريم يقبل رأس كارما: وحشاني يا كوكي. كارما بضيق: هو أنت فاكر أصلًا إن ليك أخت وحيدة والمفروض تسأل عليها؟ ده أنا لولا إني طلبتك تيجيلي مكنتش شوفت وش جنابك. كريم مبتسمًا: معلش يا حبيبتي، جوزك ساحلني في الشغل معاه. كارما ساخرة: أيوة... لبسها في شهاب! الشغل برضه اللي شاغلك ولا السرمحة طول الليل؟ ماما قايلالي على كل حاجة. كريم ضاحكًا: ربنا يخليكي ليا يا ليلى هانم، فضحاني في كل حتة. كارما بجدية: المهم أنا عايزاك في موضوع مهم. كريم: خير يا كوكي؟ كارما: شهاب ماله يا كريم؟ تلجلج كريم للحظة ثم قال: ماله إزاي يعني؟ كارما: بقاله كذا يوم شكله مضايق وعلى طول سرحان. كريم: آه... معلش، عندنا مشاكل كتير في الشغل اليومين دول، وإنتِ عارفة بقى جوزك حمقي وبياخد كل حاجة على أعصابه. أمسكت كارما وجه كريم ونظرت داخل عينيه مباشرة. كارما: كريم! أنا أختك وأكتر واحدة بعرفك لما بتكدب. ممكن أعرف إيه اللي مضايق شهاب؟ أنت أكيد عارف، لأنك مش بس ابن عمه وأخو مراته، أنت كمان صاحبه الوحيد. كريم مدعيًا المزاح: يا بنتي إنتِ زنانة ليه كده؟ ما قلتلك مفيش حاجة. هو جوزك مستحملك إزاي كده؟ كارما: أوك يا كريم، براحتك. بس عايزة أقولك إني هعرف، سواء منك ولا من غيرك... بس هعرف. كريم: هتعرفي إزاي؟ كارما بثقة: جرى إيه يا كريم؟ أنا برضه كارما الصفدي. ظل كريم ينظر إليها، بينما قرأت هي في عينيه الضيق والحزن. كارما بقلق: إيه اللي حصل يا كريم؟ أرجوك طمني، أنا حاسة إن في حاجة إنتوا الاتنين مخبينها عليا. تنهد كريم باستسلام: حاضر يا كارما... هقولك على كل حاجة. في شركة الصفدي: يجلس شهاب في مكتبه داخل الشركة في حالة من الضيق، ناظرًا إلى هاتفه وكأنه ينتظر مكالمة هاتفية. وعندما يئس من الانتظار، تحدث مع نيفين. شهاب: نيفين! عايز أسألك على حاجة... الشخص اللي جالي من كام يوم ومكنش راضي يقول اسمه، مجاش تاني؟ نيفين: لا يا فندم، مجاش. شهاب: ولا اتصل؟ نيفين: ولا اتصل يا فندم. أغلق شهاب الهاتف مع نيفين ليعود إلى شروده مرة أخرى، ولكن هذه المرة قطع شروده رنين هاتفه. شهاب: ألو. حسن: إزيك يا بشمهندس؟ أنا حسن خليل. شهاب بحدة: إنت جبت رقمي منين؟ حسن بسخرية: بلاش أجاوب عشان مضايقكش. حاول شهاب أن يتمالك أعصابه حتى لا يخسر ما يريد معرفته. حسن: أنا طبعًا عارف إنك مستني مكالمتي دي من ساعة ما جيتلك، وإنك هتجنن وتسمع الكلام اللي عندي. شهاب: مين اللي قالك الكلام الفارغ ده؟ ومين أصلًا فهمك إني مصدق كلمة واحدة من اللي قلته؟ حسن: عمومًا، لو تحب ممكن أكرر زيارتي تاني، بس المرة دي لازم تبقى هادي عشان تقدر تسمع وتتقبل اللي هقوله وأعصابك متفلتش منك. شهاب: قصدك الكذب اللي هتكذبه. حسن: سميها زي ما تسميها... المهم إنك هتجنن وتسمع الكذب ده وتعرف إيه دليلي عليه. شهاب: قصره... هتيجي إمتى؟ حسن: الوقت اللي تحدده، بس المرة دي أفضل أجيلك البيت. شهاب بغضب: إنت اتجننت؟ بيت إيه اللي تيجي فيه؟ محدش علمك إن البيوت ليها حرمة؟ ضحك حسن ساخرًا: مش يمكن الحرمة دي تخصني أكتر ما تخصك؟ اشتعل الغضب داخل شهاب. شهاب: قسمًا بالله لو ما احترمت نفسك واتعدلت في كلامك لأعرفك شغلك كويس. حسن: خلاص يا عم من غير تهديد. أنا عايز أجيلك البيت لأن الكلام اللي هقوله مينفعش يتقال في الشركة عندك، وفي نفس الوقت عشان تحصل مواجهة بيني وبين المدام وتتأكد إني مش بكدب عليك. شهاب: أنا هوافق، بس عشان أشوف كارما وهي بتبهدلك قدامي وتمسح بكرامتك البلاط. حسن باستفزاز: ميعادنا بكرة الساعة 8... سلام. أغلق الخط. شهاب في نفسه: وديني لأقتلك يا حسن يا خليل... بس بعد ما أحط حد لكل ظنوني وشكوكي وأرتاح. في منزل شهاب: ونعود إلى كريم الذي قرر أن يخبر أخته بحقيقة حزن شهاب خلال الفترة الماضية. كارما بصدمة: إنت بتقول إيه يا كريم؟ أنا مش قادرة أصدق اللي بسمعه. كريم: كارما يا حبيبتي، أرجوكي متضايقيش نفسك، وأنا أوعدك ورحمة بابا لأدفع الكلب ده تمن كل كلمة قالها عليكي. أنا اللي منعني عنه ساعتها إني خفت شهاب يقتله ويروح فيها. كارما: إنت فاكر إني مصدومة من الكلام اللي الزفت ده قاله؟ لا يا كريم... أنا مصدومة من رد فعل شهاب على الكلام. صمتت لحظة ثم أكملت بصوت موجوع: عايز تقولي إن شهاب متغير اليومين دول وبعيد عني بسبب الكلام اللي سمعه من حسن؟ عايز تقولي إن شهاب، جوزي وحبيبي وقبل كل ده ابن عمي، مصدق الكلام اللي اتقال عليا؟ طب إزاي يصدق إني ممكن أحب غيره؟ وإني كمان أخونه؟ هزت رأسها بعدم تصديق. أنا مش قادرة أصدق إن اللي بتتكلم عنه ده شهاب. كريم: أرجوكي اهدي يا كارما، وكل حاجة وليها حل. المهم إنتِ ناوية تعملي إيه دلوقتي؟ كارما بعد لحظات من الصمت: مش هعمل حاجة يا كريم... هستنى وأشوف رد فعل شهاب. هشوف كل السنين اللي عشتها معاه دي كنت ببني بيت متين وحياة بجد، ولا كنت ببني بيت من الرمل، أضعف موجة تيجي تهده. رفعت عينيها إليه وهي تكمل: أنا مش هعمل أي حاجة يا كريم... هتفرج وبس. عاد شهاب إلى المنزل ليلًا، ليجد كارما في انتظاره، ولكن هذه المرة لم تركض إليه كعادتها وتحتضنه، وإنما ظلت تنظر إليه في صمت، نظرات تحمل الكثير من المعاني. لاحظ شهاب نظراتها، فقال: شهاب: مالك يا كارما؟ باصة لي كده ليه؟ كارما بجمود: إيه؟ مش من حقي؟ شهاب: لا، مش الفكرة... بس حاسس إنك عايزة تقولي حاجة. كارما: ولا أي حاجة. أنا بس عايزة أفضل باصالك. عايزة أفضل باصة لابن عمي اللي فتحت عيني على حبه. عشت واتربيت معرفش حاجة غير حبه، ومبتمناش حاجة غير إنه يفضل جنبي. اختنق صوت كارما للحظة، لكنها تمالكت نفسها وأكملت: عارف يا شهاب، وأنا صغيرة كنت بتحجج إني عايزة ألعب مع لبنى أختك عشان أروح البيت عندكم وأفضل أتفرج عليك من بعيد وأنت قاعد مع عمي. كنت ساعتها عيلة صغيرة، مش عارفة أنا بعمل كده ليه، وليه كنت ببقى مبسوطة وأنا شايفاك قدامي وقريب مني. ولما دخلت المدرسة، كنت بعمل نفسي مش فاهمة الرياضة عشان عارفة إنك شاطر فيها وهتذاكرهالي. كنت لما بتشرحلي المسألة وأبقى فاهماها كويس، أعمل نفسي مش فاهمة عشان تعيدهالي تاني وتالت، كل ده عشان تفضل أطول وقت ممكن جنبي. ولما دخلت ثانوي، كنت هموت وأدخل كلية الطب وأبقى دكتورة، لكن فضلت أدخل علمي رياضة زيك عشان تفضل إنت برضه اللي تذاكرلي وتبقى قريب مني. وكانت النتيجة إني مجبتش مجموع، لأني دخلت حاجة مبحبهاش، ودخلت في الآخر كلية تجارة. بس عارف؟ رغم كل اللي حصل، مكنش بيهمني غير إزاي أبقى جنبك وقريبة منك. عارف يوم ما عرفت إنك كلمت بابا وخطبتني منه؟ كنت عاملة زي العيلة الصغيرة. قعدت أنط على السرير من الفرحة، ويومها صليت كتير أوي عشان أشكر ربنا إنه حققلي أغلى أمنية عندي. الحاجة الوحيدة اللي كنت متأكدة منها طول عمري هي حبك يا شهاب... اللي على مدار عمري كان بيكبر جوايا من غير حدود. وهنا لم تستطع كارما إكمال الحديث، وانهمرت دموعها على وجهها. لم يستطع شهاب تحمل رؤية دموعها، كما أن حديثها زلزل كيانه من الداخل. اقترب منها وأمسك بيديها. شهاب: وإنتِ كمان يا كارما، حبك اتولد في قلبي من يوم ما جيتي للحياة. كنتِ كل يوم بتكبري قدامي وأنا حاسس إنك حاجة غالية أوي تخصني. لا... أنا كنت بحسك حتة مني بتتحرك قدامي. وحتة مني رجعت جوايا يوم ما اتجوزنا وبقيتي جنبي. ممكن أعرف بقى إيه لزمة الكلام ده دلوقتي؟ وإيه اللي فكرك بيه؟ كارما بانهيار: عشان بعد كل الحب ده، وكل السنين اللي بينا، تشك فيا يا شهاب. بعد عمري اللي عشته بحلم فيه بقربك ووجودك جنبي، أعرف إنك صدقت كلام اتقال عليا من واحد حقير عايز يوقع بينا. شهاب بصدمة: إنتِ عرفتي إيه بالظبط؟ كارما: عرفت كل حاجة يا بشمهندس. عرفت الكلام اللي حسن خليل قاله عليا. بس صدقني، مش ده اللي جرحني. اللي جرحني بجد شكك فيا. كونك تتغير معايا وتبعد عني، وللحظة تفكر مجرد تفكير إن كلام زي ده ممكن يكون صح... ده قتلني، مش جرحني بس. شهاب: كارما، أنا مصدقتش كلام الزفت ده. بس أي واحد يسمع كلام زي ده عن مراته لازم يتصدم. كارما: أي واحد غيرك إنت. لأني ببساطة أنا إنت. أيوة، إحنا شخص واحد. كل صغيرة وكبيرة في حياتي تعرفها عني. أنا كبرت بين إيديك وفي حضنك. يبقى إزاي ممكن تصدق كلام زي ده؟ احتضنها شهاب بقوة وقال: شهاب: أرجوكي يا كارما، خليكي جنبي وفي حضني لحد ما نعدي الأزمة دي سوا. متبعديش عني مهما حصل. كارما بصوت مرتجف: خايفة أوي من اللي جاي يا شهاب. شهاب: طول ما إحنا مع بعض، هنعدي أي أزمات. الفصل السابع في اليوم التالي، في منزل شهاب: كان الجميع في انتظار وصول حسن. بدت علامات القلق واضحة على كارما، وعندما شعر شهاب بقلقها، اقترب منها وضمها إليه محاولًا طمأنتها. دق جرس الباب معلنًا وصول حسن خليل. ذهب كريم ليفتح الباب، خاصة أنه لم يكن هناك أي خدم بعد أن منحهم شهاب جميعًا إجازة. وعندما فتح الباب، وجد حسن خليل أمامه. دخل حسن إلى المنزل، ونظر إلى كارما التي كان شهاب يضمها إليه. التقت عيناهما في نظرة طويلة. أفاق حسن من سحر تلك النظرة سريعًا، فما زالت كارما الإنسانة الوحيدة القادرة على نقله إلى عالم آخر بنظرة واحدة من عينيها الساحرتين. حسن: إزيك يا كارما؟ شهاب ببرود: بابا، اسمها مدام كارما الصفدي، حرم المهندس شهاب الصفدي. متنساش نفسك. حسن بسخرية: ماشي يا بشمهندس، عاذرك ومقدر موقفك. لحد بس ما أخلص كل اللي عندي وعايز أقوله. كريم بضيق: ما تخلص يلا وتبخ اللي في جرابك وتخلص. حسن: تحبوا تعرفوا إيه بالظبط؟ العلاقة بيني وبينها وصلت لفين؟ ولا أقولكم إيه رأيكم أحكيلكم الحكاية من أولها؟ كارما بغضب: علاقة إيه يا حيوان؟ أنا في بيني وبينك علاقة أصلًا؟ حسن وهو ينظر إليها: خلاص يا كارما، اللي بينا مبقاش ينفع يستخبى أكتر من كده. ولا إنتِ متعبتيش من بعدك عني؟ لم يستطع شهاب أن يتمالك أعصابه، وكاد أن يقتله، لكن كريم أمسكه وأبعده عنه. شهاب بغضب: وديني لأقتلك يا ابن خليل! كريم: اهدى يا شهاب، وإنت يلا قول اللي عندك وخلص. حسن: ماشي. الحكاية بدأت يوم ما رحت أتقدم لكارما هانم وأطلب إيديها من البشمهندس، لأني مكنتش أعرف بموضوع خطوبتها منه. ساعتها البشمهندس بهدلني وضربني وأهانني بما يكفي. خرجت من عندكم وأنا يائس وضايع وكاره الدنيا باللي فيها، وقررت أسيب البلد كلها وأسافر. وفعلًا، واحد صاحبي جابلي شغل كويس في السعودية. سافرت هناك، وكنت بشتغل ليل نهار. مكنتش بنام ساعتين على بعض. كنت بحاول أنسى اللي حصلي... كنت بحاول أنساها هي شخصيًا. ورجعت بعد تلات سنين، وعرفت إنها اتجوزت شهاب بيه، وإن كمان حسين بيه اتوفى. ساعتها فكرت أروحلها القاهرة أعزيها، لكن تراجعت في آخر لحظة. قلت لنفسي لازم أخرجها من حياتي وأنساها، وأسيبها تكمل حياتها مع الإنسان اللي اختارته. لحد ما في يوم كنت قاعد في محل أبويا، وفوجئت إنها جت هي وشهاب بيه الفيلا عشان يقضوا يومين هناك. أول ما شوفتها، كل القرارات اللي خدتها بنسيانها اتلغت فورًا، وكل مشاعري اللي جوايا صحيت من تاني. كان كل اللي مغطّي على تفكيري شوقي وحنيني ليها. لكن حاولت أفوق نفسي بسرعة. هي خلاص مبقتش من حق حد يفكر فيها غير جوزها وبس. كنت بشوفها كل يوم قاعدة في تراس الفيلا، حزينة وسرحانة، وعارف قد إيه هي مكسورة بسبب وفاة والدها. كان نفسي في اللحظة دي أروحلها وأهون عليها وأخفف من وجعها، لكن مكنش في إيدي أي حاجة غير إني أبعد وأطمن عليها من بعيد. لحد ما في يوم كنت قاعد في المحل، وشفت شهاب بيه بيركب عربيته لوحده. فهمت بعدها إن جاله شغل مهم في القاهرة ولازم يرجع بسرعة، وإنه هيرجعلها تاني يوم. كنت قاعد لوحدي في المحل سرحان فيها زي عادتي، وفوجئت بيها قدامي. في الأول افتكرت نفسي بحلم بيها، زي ما على طول بشوفها قدامي في أحلامي. لكن اتأكدت إنها حقيقة، مش حلم، لما بدأت تتكلم معايا. فلاش باك كارما: إزيك يا حسن؟ حمد الله على السلامة. نظر لها حسن ولم يتفوه بأي كلمة، لأنه ظن أنها مجرد حلم. كارما: إيه يا حسن؟ مبتردش عليا ليه؟ حسن: مش مصدق إنك واقفة قدامي وبتكلميني. كارما: لا صدق يا حسن، أنا كارما اللي واقفة قدامك دلوقتي وبكلمك. قولي رجعت إمتى من السفر؟ حسن: من حوالي شهر. كارما: وليه مجتش تشوفني؟ على الأقل كنت تعالى عزيني في وفاة بابا. ولا خلاص مبقتش عايز تشوفني؟ حسن: ها... أنا آسف، بس إنتِ عارفة اللي حصل آخر مرة، والبشمهندس شهاب يعني... كارما: إنت لسه فاكر يا حسن؟ حسن: وده موقف حد ينساه؟ كارما: أنا آسفة يا حسن على اللي حصل ساعتها. حسن: وإنتِ ذنبك إيه؟ أنا اللي فهمت غلط. كارما: لا يا حسن، إنت مفهمتش غلط ولا حاجة... إنت فهمت صح. حسن بدهشة: يعني إيه؟ مش فاهم. كارما: مش ضروري تفهم دلوقتي، بس أكيد هتفهم. ممكن أطلب منك طلب؟ حسن: طبعًا، إنتِ تؤمري. كارما: أنا هكتبلك رقمي. ممكن لما تنزل القاهرة تبقى تكلمني؟ حسن: أيوة... بس ليه؟ كارما: هتعرف وتفهم كل حاجة ساعتها. عن إذنك، الوقت اتأخر ولازم أطلع. عودة للحاضر حسن: ودي كانت أول مرة نتقابل فيها بعد ما رجعت من السفر. كارما بصدمة: إنت إيه اللي بتقوله ده؟ والكلام ده جايبه منين؟ لا، مش ده الحوار اللي دار بينا. إنت كداب! نظر حسن إلى شهاب وقال: حسن: ها يا بشمهندس؟ المدام شايفاني بكدب. يا ترى إنت كمان شايفني كداب زيها؟ يعني محصلش إنك سيبت المدام ونزلت القاهرة لوحدك؟ شهاب بضيق: أيوة، حصلت مرة واحدة. وكان في ورق مهم محتاج إمضتي، وساعتها أنا سافرت ورجعت في نفس الليلة. أنا فاكر. كريم: أيوة، بس ده مش معناه إنها فعلًا كلمتك اليوم ده. ده مش دليل. حسن: عندك حق يا كريم بيه. ده مش دليل، وعشان كده خلوني أكمل كلامي وأقدملكم باقي الأدلة على صدق كلامي. كريم: كمل واخلص. حسن: منكرش إني كنت فرحان بكلامها معايا. أنا بشر برضه، ودي الإنسانة الوحيدة اللي حبيتها في حياتي. خدت الرقم وفضلت شايله معايا. في الأول اترددت أكلمها، لحد ما في يوم خدت القرار وسافرت القاهرة. كلمتها، وطلبت مني نتقابل في أي مطعم. وفعلًا... رحت وقابلتها. فلاش باك كارما: كنت مستنياك تكلمني من بدري، بس إنت اتأخرت عليا. حسن: بصراحة كنت متردد. كارما: متردد تشوفني يا حسن؟ حسن: متزعليش مني. إنتِ دلوقتي بقيتي متجوزة، وأنا بفهم في الأصول. كارما: عندك حق. على العموم أنا مش هطول عليك. أنا بس في كلام جوايا ومحتاجة أقوله. عندك استعداد تسمعني؟ حسن: طبعًا، اتفضلي قولي يا ست البنات. نظرت له كارما وابتسمت. حسن: بتضحكي على إيه؟ كارما: بقالي كتير مسمعتش الكلمة دي منك. حسن مبتسمًا: ما إنتِ هتفضلي طول عمرك ست البنات في عيني. كارما: بجد يا حسن؟ حسن: طبعًا يا ست البنات. قوليلي بقى عايزة تقولي إيه؟ كارما: فاكر يا حسن لما جيتلك من تلات سنين قبل ما أسافر، وقلتلك انساني وإني بحب شهاب ابن عمي؟ حسن بوجع: آه... لما اتريقتي عليا وعلى حبي ليكي، وقلتيلي أفوق من اللي أنا فيه وأعرف أنا مين وإنتِ مين. إنتِ كارما الصفدي، خطيبة المهندس شهاب بيه الصفدي، وإن شهاب بيه هو ابن عمك وحبيبك. كارما: أنا آسفة يا حسن إني قلتلك ساعتها كده. بجد مكنش قصدي أجرحك. حسن: آسفة على إيه؟ إنتِ قولتي الحقيقة. كارما: بس اكتشفت بعدها إن مش دي الحقيقة. حسن: يعني إيه؟ مش فاهم؟ كارما: يعني يا حسن... أنا اكتشفت إن حبي لشهاب هو اللي كان مجرد وهم. أنا طلعت لقيت شهاب قدامي طول الوقت، والعيلة كلها بتعده الكبير بعد بابا الله يرحمه، فكان طبيعي إني أتشد له وأتعلق بيه. لكن لما اتكلمت معاك، وقريت الحب اللي في عينيك، وعرفت منك إنك عندك استعداد تعمل أي حاجة وتضحي بأي حاجة عشاني، ساعتها لقيت مشاعري وإحساسي بيتغيروا وبيتحولوا ليك إنت. حسن وقد اتسعت عيناه من الصدمة: واكتشفتي الكلام ده إمتى؟ كارما: بعد ما سافرنا القاهرة بعد اللي حصل على طول. ساعتها لقيت نفسي، من غير ما أقصد، بفكر فيك باستمرار. بفتكر كل كلامنا وضحكنا مع بعض. لقيتك محتل كل تفكيري، لدرجة إن مبقاش فيه مجال لشهاب في دماغي. حسن: أمال اتجوزتي شهاب بيه ليه؟ كارما: بعد ما اتأكدت من حقيقة مشاعري ناحيتك، قررت أواجهك بالحقيقة دي. واستغليت يوم ما رحتش الجامعة وسافرت مطروح عشان أقابلك. بس ساعتها والدك قابلني وقالي إنك سافرت. ساعتها الدنيا كلها اسودت في وشي. واتأكدت إنك سبت البلد بعد اللي حصل مني. فقدت الأمل ساعتها إنك ترجعلي تاني، ومكنش قدامي غير إني أكمل جوازتي من شهاب. حسن بعدم تصديق: بس إزاي؟ وإنتِ بنفسك جيتيلي واعترفتيلي بحبك لابن عمك. كارما: خفت يا حسن. لما جيتلك ساعتها كنت خايفة. حسن: خايفة من إيه؟ كارما: شهاب لو عرف بحقيقة مشاعري ناحيتك مكنش هيسكت، ولا كان هيسيبك في حالك. ده كان ممكن يوصل بيه إنه يقتلك. وأنا عمري ما كنت هسامح نفسي لو كان جرالك حاجة بسببي. حسن بألم: كنتي قولتيلي. حرام عليكي. مكنتيش سيبتيني بتعذب من كلامك طول السنين دي. أنا كنت مستعد أتحدى أي حد عشانك. لا... أنا كنت مستعد أخدك ونهرب بعيد ونتجوز. كارما: شهاب مكنش هيسيبنا. كان هيفضل ورانا. حسن: وإنتِ بقى جاية دلوقتي عشان تحكيلي اللي حصل ساعتها؟ نظرت إليه كارما طويلًا قبل أن تهمس: أنا جاية أقولك إني لسه بحبك. الفصل الثامن كارما: لا يا حسن، أنا جاية أقولك إني لسه بحبك. حسن بصدمة: إنتِ بتقولي إيه؟ كارما: بقولك إني بحبك يا حسن، وإنك الحب الحقيقي في حياتي. حسن: أنا مش مصدق كل اللي بيحصلي وكل اللي بسمعه. أنا لازم بحلم. كارما: ده مش حلم يا حسن، دي الحقيقة اللي كنت لازم تعرفها من زمان، واللي يا ما دورت عليك عشان أقولك عليها. حسن: بعد إيه؟ كارما: يعني إيه بعد إيه؟ إنت خلاص هتسلم وتسيبني لشهاب؟ خلاص يا حسن، مبقتش بتحبني؟ مبقتش عايزني؟ حسن: مين اللي قال كده يا كارما؟ إنتِ حبك بيجري في دمي، بس أنا في إيدي إيه أعمله؟ إنتِ خلاص بقيتي زوجة لراجل تاني. كارما: بس أنا مش قادرة أكمل مع شهاب. مش قادرة أظلمه معايا أكتر من كده. مش قادرة أبقى معاه وأنا بحبك إنت. حسن: طب والعمل؟ كارما: هسيب شهاب ونتجوز. حسن: تسيبيه إزاي؟ وهو هيسمحلك بكده؟ كارما: هختلف معاه وأحاول أخلق أي خناقات بينا، وبعدها أطلب الطلاق منه. المهم إني هعمل كل اللي أقدر عليه عشان أبقى معاك. حسن: وأنا هفضل معاكي وجنبك، ومش هتخلى عنك أبدًا. كارما: خلاص، يبقى تنقل القاهرة وتدور على شغل هنا عشان تبقى جنبي. حسن: وهو الشغل سهل كده؟ ما إنتِ عارفة بلدنا بلد وسايط. كارما: لا، سهلة. نقي إنت الشركة اللي تعجبك، وأنا هبعت معاك كارت توصية من بتوع شهاب، وهما أكيد أول ما يشوفوه هيشغلوك على طول. --- بــــــــــــــاك --- عاد حسن إلى الواقع واستأنف حديثه. حسن: وفعلًا جابتلي كارت من كروتك يا بشمهندس، وعليه إمضتك، وقدمته في الشركة اللي أنا شغال فيها، وقبلوني. كانت كارما تستمع إلى كلام حسن في صدمة، والدموع تنهمر على وجهها. التفتت بنظرها إلى شهاب تبحث عنده عن طوق النجاة. كانت تود أن ترى في عينيه نظرة ثقة، لكنه خذلها، وبادلها نظرات ملؤها الاتهام والشك. كارما بانهيار: ده كداب يا شهاب، أوعى تصدقه. ده عايز يوقع بيني وبينك. صدقني، أنا عمري ما حبيت غيرك، ولا عمري أفكر أسيبك ولا أخونك. كان هناك بركان يغلي بداخل شهاب، يوشك أن ينفجر، لكنه تمالك نفسه حتى لا يندم. أما كارما فلم تستطع التماسك أكثر من ذلك، فركضت نحو حسن وأمسكته من رقبته وهي منهارة. كارما: إنت إيه يا أخي؟ ليه بتعمل كده؟ ليه عايز تدمرني وتدمر حياتي؟ حرام عليك، أنا أذيتك في إيه؟ أسرع كريم إليها، وأمسكها وضمها إلى أحضانه بقوة محاولًا تهدئتها. كريم: اهدي يا كارما... اهدي يا حبيبتي. أنا عارف إنه كداب. ثم نظر إلى حسن بغضب. كريم: وإنت غور دلوقتي. مش عايز أشوف وشك. نظر حسن إلى شهاب، الذي لم يتحرك ولم ينطق بكلمة واحدة من شدة الصدمة، ثم ابتسم ابتسامة انتصار وأكمل حديثه. حسن: على العموم أنا همشي دلوقتي، بس هجيلكم تاني عشان نكمل الحكاية، وتكون المدام كمان هديت. آه... على فكرة، اسم الشركة اللي بشتغل فيها شركة الفهد للمقاولات. حضرتك طبعًا يا بشمهندس تقدر تتأكد بسهولة منهم مين اللي كانت واسطتي عشان أتعين في الشركة. سلام. تركهم حسن وغادر، بينما كانوا جميعًا في حالة يُرثى لها. كريم يحاول تهدئة أخته المنهارة بين أحضانه. وشهاب الذي ألجمته الصدمة. --- في آخر الليل... كان شهاب وكارما يجلسان على سرير غرفتهما، وكل منهما مولٍ ظهره للآخر. صمت وشرود ثقيلان خيما على المكان، وكأن لسانيهما أصبحا عاجزين عن التعبير عما يدور بداخلهما. لكن كارما قطعت هذا الصمت بصوت مختنق. كارما: شهاب! إنت ساكت ليه؟ شهاب: وتفتكري المفروض أقول إيه؟ تحركت كارما في اتجاهه ووقفت أمامه. كارما: قول أي حاجة يا شهاب. قول إنك مش مصدق البني آدم ده في الكلام اللي قاله. إنت عارف إنه عايز يوقع بينا، صح؟ قول إنك واثق فيا، وإني عمري ما أفكر في غيرك. لم يرد عليها شهاب، وإنما أدار وجهه إلى الجهة الأخرى هاربًا من نظراتها. فأمسكت بوجهه وأجبرته على النظر إليها. كانت عيناها ممتلئتين بالدموع وهي تحدثه. كارما: بص في عيني كده يا شهاب... لا يا شهاب، أوعى يكون الشك اللي قرياه في عينيك ده بجد. أوعى تقولي إنك مصدق إني ممكن أفكر أخونك أو أفكر في حد غيرك. ده أنا كارما يا شهاب. كارما بنتك اللي ربيتها على إيدك. وأختك اللي طول عمرها بتسمع كلامك وتحت طوعك. ومراتك وحبيبتك. كان شهاب في حالة من الضيق تجعله غير قادر على الحديث معها. كان مشوشًا وتائهًا، لا يعرف أين الحقيقة. لذلك اختار الهروب من المواجهة. كارما بصراخ: رد عليا يا شهاب... أرجوك. سكاتك ده بيموتني. شهاب بصوت مخنوق: أنا خارج يا كارما. كارما بصدمة: خارج؟ دلوقتي؟ وسايبني؟ رايح فين؟ شهاب: حاسس إني مخنوق... وعايز أقعد لوحدي. تركها شهاب وهرب من المواجهة. أما هي فظلت منهارة، غير مصدقة ما يحدث حولها. هل يمكن لشهاب أن يصدق ما قيل عنها؟ هل يمكن أن يصدق أنها تخونه مع غيره؟ أما شهاب فظل طوال الليل يقود سيارته تائهًا، لا يعلم وجهته، وكأنه أضاع طريقه. وكانت كلمات حسن تتردد في أذنيه، تزيد غضبه وحيرته. عاد شهاب إلى منزله مع الفجر. فوجد كارما نائمة، ووجهها محمرًا من كثرة البكاء. جلس يتأمل ملامحها التي طالما عشقها. واستعاد في ذهنه كل لحظاته معها. فهي وحدها من كانت قادرة على رسم الابتسامة على شفتيه. وهي وحدها من امتلكت قلبه وعقله. أفاق شهاب من شروده، وبدل ملابسه، ثم استلقى بجوار كارما موليًا إياها ظهره. وفي تلك اللحظة فتحت كارما عينيها ببطء. فهي لم تكن نائمة من الأساس... وإنما ادعت النوم حتى ترى ماذا سيفعل شهاب معها. في اليوم التالي في شركة الفهد: لم يستطع شهاب النوم طوال الليل، وعندما حل الصباح خرج دون أن يتحدث مع كارما، وأسرع إلى شركة الفهد حتى يتأكد من حديث حسن. وهناك قابله منير الفهد، صاحب الشركة، استقبالًا حافلًا. منير الفهد: أهلًا وسهلًا، أهلًا وسهلًا. شهاب باشا الصفدي بنفسه هنا! ده إيه النور ده؟ شهاب: أهلًا بيك يا منير بيه. أنا كنت قريب منك وقلت أعدي أسلم عليك. منير: منورني يا باشا والله. تشرب إيه؟ شهاب: قهوة مظبوط. منير ضاحكًا: طول عمرك مظبوط في كل حاجة يا بشمهندس. أمسك منير الهاتف طالبًا القهوة لشهاب. أما شهاب فكان شاردًا، لا يعرف كيف يسأل منير عن حسن وبأي صفة. منير: إيه أخبار الشغل يا بشمهندس؟ شهاب: تمام... ماشي الحال. منير: ها، قريبك قالك إننا عاملين معاه الواجب ولا لأ؟ شهاب باستغراب: قريبي! قريبي مين؟ منير: الشاب ده اللي اسمه حسن، اللي حضرتك بعتلي معاه كارت توصية عشان أشغله. أنا بصراحة أول ما عرفت إنه جاي من ناحيتك عينته على طول. شهاب بصدمة: إمتى حصل الكلام ده؟ منير: من حوالي سنة. قبض شهاب على يديه من الغضب، وأصبح شاردًا فيما قاله منير. منير: بس أنا استغربت، لما هو قريبك معينتوش ليه في الشركة عندك؟ شهاب بيه... شهاب بيه... رحت فين؟ شهاب: ها... لا، معاك. كنت بتقول إيه معلش؟ منير: كنت بقولك لما هو قريبك معينتوش ليه في الشركة عندك؟ شهاب بتردد: لا، أصله مش قريبي. ده ابن البواب اللي عندنا، وأنا محبتش يحس إنها مساعدة لو شغلته عندي، فقلت أوصي عليه عندك في الشركة. منير: طول عمرك صاحب واجب. شهاب بضيق: طب معلش يا منير بيه، أنا مضطر أمشي. افتكرت ميعاد مهم عندي. منير: ملحقتش تقعد يا بشمهندس. على العموم، مش عايز أعطلك، بس ياريت تكرر الزيارة دي تاني. شهاب: إن شاء الله. بعد إذنك. خرج شهاب من شركة الفهد وهو في قمة غضبه. هل يمكن أن يكون كلام حسن صحيحًا؟ هل يمكن لكارما، زوجته وحبيبته، أن تخونه حقًا؟ قاد شهاب سيارته بأقصى سرعة وهو غاضب، متجهًا إلى منزله ليواجه كارما بما عرفه. وعندما وصل إلى المنزل أغلق الباب بعنف، ودخل على كارما التي خافت عندما رأته في تلك الحالة. كارما بقلق: في إيه يا شهاب؟ أمسكها شهاب من كتفيها بقوة وتحدث إليها بغضب. شهاب: في يا مدام كارما إني اكتشفت بعد كل السنين دي إني مغفل، وإن مراتي بتستغفلني وبتعرف شخص تاني عليا. كارما بصدمة: إنت اتجننت يا شهاب؟ إيه اللي إنت بتقوله ده؟ شهاب: إيه يا مدام؟ مستغربة ليه؟ مش دي الحقيقة؟ الحقيقة اللي حاولتي تخبيها عليا طول الفترة اللي فاتت، لحد ما جه حسن وكشفها... وكشفك معاها. كارما بغضب: أنا مش هسمحلك تقول كلمة واحدة زيادة. ممكن أفهم في إيه لكل ده؟ شهاب: في يا مدام إن كلام حسن طلع صح. ارتفع صوته وهو يكمل: ممكن أعرف كارت التوصية اللي باسمي راح لشركة الفهد إزاي يا مدام؟ انطقي! كارتي الشخصي راح لإيد حسن خليل إزاي يا مراتي المصون؟ كانت كارما مصدومة من كلام شهاب، وكانت تبكي، ولم تستطع الرد عليه. شهاب: ما تردي! ساكتة ليه؟ ولا مش عارفة تقولي إيه بعد ما عرفت الحقيقة؟ كارما: شهاب... أرجوك افهم الحقيقة قبل ما تتسرع. شهاب: حقيقة إيه؟ حقيقة كدبك عليا؟ حقيقة إنك كنتِ بتقابلي واحد من ورا جوزك وبتحبوا في بعض؟ والله أعلم كنتوا بتعملوا إيه تاني. كارما: كفاية يا شهاب. أرجوك اسمعني قبل ما تحكم غلط. وحياة اللي بينا لتسمعني، وبعدين إنت حر في حكمك. شهاب بسخرية: اللي بينا! كارما: أيوة، اللي بينا يا شهاب. ولو مكنش ده كفاية بالنسبة ليك، ورحمة عمك لتسمعني. حاول شهاب أن يهدأ حتى يسمعها. شهاب: ماشي يا بنت عمي. أنا هسمعك. بس ياريت تقولي الحقيقة من غير كدب. كارما: حاضر يا شهاب. أوعدك إني هقولك الحقيقة من غير ما أخبي عليك أي حاجة. شهاب: كل اللي عايز أعرفه... إنتِ قابلتي حسن من ساعة ما اتجوزنا؟ كارما: آه يا شهاب... قابلته. نظر إليها شهاب بصدمة، وهم أن يتركها، لكنها أمسكت يده وأجلسته أمامها. كان مستجيبًا لها ويسمعها، وكأنه يود أن تكون بريئة، فهو لا يستطيع أن يصدق أن كارما، حبيبته، تخونه. كارما: أنا قابلت حسن مرة واحدة بس من ساعة ما اتجوزنا. أو بمعنى أصح... من ساعة اليوم اللي جه فيه خطبني منك. اليوم ده كان فعلًا اليوم اللي سبتني فيه في مطروح عشان كان عندك شغل مهم. كنت ساعتها قاعدة في الأوضة، ولقيت دادة رحمة بتخبط عليا. الفصل التاسع كارما: أنا قابلت حسن مرة واحدة بس من ساعة ما اتجوزنا، أو بمعنى أصح من ساعة اليوم اللي جه فيه خطبني منك. اليوم ده كان فعلًا اليوم اللي سبتني فيه في مطروح عشان كان عندك شغل مهم. كنت ساعتها قاعدة في الأوضة، ولقيت دادة رحمة بتخبط عليا. --- فــــــــــــلاش بـــــــــــاك --- كانت كارما تتحدث إلى شهاب في الهاتف. شهاب: هتفضلي زعلانة كتير؟ ما أنا عمال أصالحك من الصبح. كارما: أيوة، هفضل زعلانة عشان سبتني لوحدي وسافرت. شهاب: يا حبيبتي، ورق مهم لازم أمضيه. لو متمضاش هنخسر ملايين. كارما: يا سلام! ما كان ممكن يبعتهولك بالفاكس ولا طرد تمضيه وإنت هنا. شهاب: يا حبيبتي، بقولك ورق بملايين، تقوليلي يبعتهولي طرد؟ كارما: يعني الملايين أهم مني؟ شهاب: مفيش أهم منك يا حبيبتي. خلاص بقى، أوعدك هروح أمضي الورق وأجيلك في لمح البصر. النهارده قبل ما الليل يليل إن شاء الله هبقى عندك. كارما: إن كان كده ماشي، بس متتأخرش عليا. شهاب: وأنا أوعدك لما أجي هعرف أصالحك إزاي. كارما بخجل: ماشي. شهاب: بحبك. كارما: وأنا كمان بحبك. أغلقت كارما الهاتف، لتجد رحمة تدق الباب. كارما: خير يا دادة؟ رحمة: في واحد تحت عايز يقابلك يا بنتي. كارما باستغراب: واحد مين ده؟ رحمة: حسن ابن خليل، صاحب المحل اللي قدام الفيلا. كارما بصدمة: إيه؟ حسن! وده عايز إيه ده؟ إنتِ مقولتلوش إن شهاب مش هنا؟ رحمة: قولتله يا بنتي، بس هو عايز يقابلك إنتِ. كارما: يا دي النيلة! ده لو شهاب شافه تاني مش بعيد يقتله. طب يا دادة، قوليله نازلة. رحمة: حاضر يا بنتي. كارما: وبعد إذنك يا دادة، خليكي معانا لما أقعد معاه. يعني مينفعش أقعد معاه لوحدي، إنتِ فاهمة طبعًا. رحمة: طبعًا يا بنتي، حاضر. ذهبت كارما لمقابلة حسن في غرفة الجلوس. وكانت تتحدث معه برسمية شديدة في وجود رحمة. كارما: مساء الخير. إزيك يا حسن؟ لمعت عينا حسن عندما رآها، لكنه لم يجبها. فقد كان شاردًا فيها وفي عينيها. لكنها قطعت شروده. كارما: حسن... إيه؟ رحت فين؟ حسن: معلش، أنا آسف إني جيت دلوقتي. كارما: مفيش مشكلة. خير، في حاجة؟ حسن: أنا كنت جاي أعزيكي في وفاة الوالد. أنا لسه عارف من يومين لما رجعت من السفر. البقاء لله. كارما: ونعم بالله. متشكرة يا حسن. حسن: قوليلي، إنتِ كويسة؟ مش محتاجة مني أي حاجة؟ أنا حاسس باللي إنتِ فيه. كارما: متشكرة يا حسن. أنا عارفة والله إنك زي أخويا، بس أنا مش محتاجة حاجة. نظر إليها حسن لبعض الوقت صامتًا، ثم أكمل حديثه. حسن: مبسوطة يا ست كارما؟ فهمت كارما ما يدور في ذهنه. كارما: آه يا حسن، مبسوطة الحمد لله. إنت متعرفش يعني إيه الإنسان يتجوز حد بيحبه، وخصوصًا لو بيحبه بقاله كتير. وشهاب زوج رائع، وبيحبني أوي، وأنا كمان بحبه. حسن بوجع: لا... عارف يا ست كارما. على العموم، ربنا يسعدك يا ست الناس ويفرح قلبك. كارما: متشكرة يا حسن. ربنا يكرمك ببنت الحلال اللي تسعدك وتحبها يا رب. نظر إليها حسن وابتسم ابتسامة باهتة. حسن: طب عن إذنك يا ست الناس. وأي وقت تحتاجيني فيه، أنا تحت أمرك. كارما: اتفضل. زفرت كارما أنفاسها بقوة بعد أن تركها حسن وخرج. ثم التفتت إلى رحمة قائلة: كارما: يا ساتر! كان ساحب كل الأكسجين اللي في الأوضة. رحمة: معلش يا بنتي، أهو موقف وعدى. وكويس إنك عاملتيه كده، كفاية اللي حصل المرة اللي فاتت. كارما: بس يا دادة، ممكن متقوليش لشهاب إن حسن جه؟ إنتِ عارفة شهاب، ممكن لو عرف يكبر الموضوع، وممكن توصل إنه يقتله. رحمة: لا، بعد الشر. عندك حق يا بنتي. خلاص، مش هقوله حاجة. بــــــــــــــــــــــــــاك أكملت كارما حديثها وهي تبكي: كارما: ودي كانت المرة الوحيدة اللي قابلت فيها حسن من ساعة ما اتجوزنا. شهاب بعدم تصديق: يعني عايزة تقوليلي إنك مشوفتيش حسن من ساعتها ولا مرة؟ يعني مجلكيش القاهرة مخصوص وروحتي قابلتيه؟ كارما: محصلش... ورحمة أبويا ما حصل. شهاب: أمال إديتيه كارت التوصية إزاي من غير ما تشوفيه؟ وإديتيهوله ليه أصلًا لو فعلًا مكنش في بينكم حاجة زي ما بتقولي؟ كارما: يا شهاب، أنا مديتش حسن كارت التوصية، عشان أنا فعلًا مشوفتوش تاني من ساعتها. أنا اديته لأبوه، عم خليل. شهاب باستغراب: عم خليل؟ وإيه دخل عم خليل في الموضوع؟ كارما: أنا هقولك اللي حصل. كنت مرة عند ماما في الفيلا، ساعتها إنت كنت مسافر في شغل. وبعدين لقيتهم بيبلغوني إن عم خليل عايز يقابلني. في الأول استغربت، بس نزلت وقابلته. --- فــــــــــــــــــــــــــلاش بــــــــــــــــاك --- نزلت كارما لمقابلة خليل بعد أن أخبروها بحضوره وسؤاله عنها. كارما: إزيك يا عم خليل؟ خليل: إزيك يا ست كارما؟ عاملة إيه يا بنتي؟ كارما: الحمد لله يا عم خليل. خليل: متآخذنيش يا بنتي إني جتلك في ساعة زي دي، بس أنا روحت لشهاب بيه الشركة وعرفت إنه مسافر، والموضوع مستعجل. كارما: آه، شهاب فعلًا مسافر. خير يا عم خليل؟ أنا تحت أمرك. خليل: ميأمرش عليكي عدو يا بنتي. الواد حسن ابني مغلبني. مصمم يسافر تاني يا بنتي، وأنا كبرت ومعدتش قادر أبقى لوحدي، وعايزه يفضل جنبي وميسافرش. كارما: أيوة يا عم خليل، بس شهاب ماله ومال الموضوع ده؟ خليل: حسن يا بنتي عايز يسافر لأنه مش لاقي رزقه هنا، والدنيا مقفلة في وشه. فقلت يعني لو شهاب بيه يتوسطله في أي مكان يوظفوه، ويفضل جنبي، يبقى كتر خيره. كارما: شهاب يتوسطله... بس إنت عارف يا عم خليل، بعد اللي حصل يعني... خليل باستغراب: هو إيه اللي حصل يا بنتي؟ هو الواد حسن ضايق شهاب بيه في حاجة؟ قوليلي وأنا أكسرلك دماغه. علمت كارما عندها بعدم معرفة خليل بما دار بين شهاب وحسن. كارما: خلاص يا عم خليل. أنا هديلك كارت توصية من بتوع شهاب، وهو يروح يقدم بيه في أي شركة. وهما لما يلاقوا واسطته شهاب هيعينوه على طول. خليل بامتنان: تسلمي يا بنتي. ربنا يريح بالك ويفرح قلبك. --- بــــــــــــــــــــــــــاك --- واستأنفت كارما حديثها: كارما: ورحمة أبويا، هو ده اللي حصل يا شهاب، ومكدبتش في ولا كلمة قولتها. شهاب: وليه مقولتليش إن حسن جالك وعزاكي؟ وليه محكتيليش على موضوع الكارت ده؟ كارما: أولًا، حسن لما جالي، كانت طريقتي معاه زي ما قولتلك كده... كلمتين ورد غطاهم، وكان في وجود دادة رحمة الله يرحمها. ومكنتش عايزة أقولك لأني عارفة رد فعلك كان هيبقى إيه. كان ممكن تكبر الموضوع وتوصل إنك تقتله. خفت عليك، خصوصًا إن الموضوع ميستهلش. أما موضوع الكارت، فأنت كنت مسافر ساعتها، ورجعت بعد شهر. ولما رجعت كان حصلي إجهاض، وكانت أول مرة يحصلّي. وكلنا اتلهينا، وبعدها كان الموضوع خلاص اتنسى، ومفتكرتش أقولك عليه. شهاب بعدم تصديق: وإيه الدليل إن كلامك هو الصح؟ كارما بوجع: دليل! عايز دليل إني مبكدبش عليك يا شهاب؟ ياااااااه... كنت أتمنى أموت قبل ما أقف في الموقف ده قدامك. كنت بتمنى مبقاش موجودة في الحياة يوم ما تطلب مني دليل إني مش خاينة. بادلها شهاب نظرة مليئة بالألم. فبالرغم من أن كلامها أوجعه، إلا أنه ما زال في حيرة من أمره. كارما: على العموم، أنا معنديش أي دليل. الوحيدة اللي حضرت الموقف كانت دادة رحمة الله يرحمها، وطبعًا مش هتعرف تتأكد منها إن كلامي صح. لكن في دليل أهم ممكن ببساطة يأكدلك إن كلامي صح. شهاب: دليل إيه؟ كارما: أنا يا شهاب. شهاب: يعني إيه؟ مش فاهم. كارما: يعني أكبر دليل على صدق كلامي هو أنا اللي بقولك الكلام ده. أنا كارما الصفدي. بنت حسين الصفدي، الراجل الصعيدي اللي ربانا على الأخلاق والحزم. وحرم شهاب الصفدي... إذا كنت ناسي. ولو ده مش دليل كافي بالنسبة ليك يا شهاب، فأنا ساعتها مش هيهمني إنك تعرف إذا كنت صادقة ولا لأ. شهاب: ماشي يا كارما... أنا هصدق كلامك. بس لازم تعرفي إن كدبك عليا في الأول هو اللي وصلنا للي إحنا فيه دلوقتي. كان لازم تحكيلي على مقابلة حسن ليكي. وكمان كان لازم تحكيلي على موضوع الكارت اللي اديتيه لخليل. كارما: أنا عارفة إني غلطانة يا شهاب. بس غصب عني. كدبي عليك كان بحسن نية. كنت خايفة عليك، مش أكتر. شهاب: توعديني متكدبيش عليا تاني؟ كارما: أوعدك يا شهاب. صدقني، عمري ما هخبي عليك أي حاجة تاني. وألقت كارما بنفسها في أحضان شهاب. ولكن هذه المرة لم تشعر بالأمان الذي طالما شعرت به بين ذراعيه. لم تشعر أن شهاب يحتويها كعادته. بل أحست وكأنها في حضن غريب عنها. الأمر الذي جعل القلق والخوف يتسللان إلى قلبها. الفصل العاشر في شركة الصفدي: كان شهاب يجلس في مكتبه شارد الذهن، فدخلت عليه نيفين. نيفين: الأوراق دي محتاجة مراجعة حضرتك يا شهاب بيه... شهاب بيه... بشمهندس شهاااااب. شهاب: ها... في إيه يا نيفين؟ كنتِ بتقولي حاجة؟ نيفين: بقول لحضرتك إن الأوراق دي محتاجة مراجعة حضرتك. شهاب: لا، مش فايق أراجع حاجة دلوقتي. وديها لكريم يراجعها. نيفين: حاضر يا فندم. ذهبت نيفين إلى كريم في مكتبه. نيفين: كريم بيه، شهاب بيه كان باعت لحضرتك الأوراق دي عشان تراجعها. كريم: يا سلام! ما يراجعها هو. بعتهالي ليه؟ نيفين: بيقول مش فايق يراجع حاجة، بس شكله تعبان أوي. كريم بضيق: طب يا نيفين، سيبي الورق وروحي على مكتبك. كريم في نفسه: وبعدين؟ شكل الموضوع المهبب ده مش هيعدي على خير. --- هب كريم إلى مكتب شهاب ليطمئن عليه، فوجده شاردًا ومهمومًا. كريم: إيه يا بوص؟ مالك؟ شهاب بضيق: اقعد يا كريم. كريم: إيه يا شهاب؟ مالك يا حبيبي؟ شهاب: مخنوووووق أوي يا كريم. حاسس بجبل فوق صدري. كريم: ليه يا ابني كل ده؟ أوعى تقولي الموضوع إياه تاني. شهاب: هو في غيره؟ تعرف إني روحت شركة الفهد واتأكدت من موضوع كارت التوصية اللي باسمي، اللي البيه حسن اشتغل بيه هناك؟ كريم: معقولة؟ وجابه منين؟ أوعى تقولي من كارما، مستحيل أصدق. شهاب: للأسف منها... بس مش بشكل مباشر. كريم: يعني إيه؟ مش فاهم. شهاب: أنا هفهمك. وقص شهاب على كريم ما حدث بينه وبين كارما. كريم: طب يا عم، ما البت طلعت بريئة أهو، وابن الكلب ده طلع بيكدب عشان يوقع بينكم. إيه بقى اللي مخليك في الحالة دي؟ شهاب: ممكن أكلمك على إنك صاحبي وتنسى شوية إنك أخو مراتي؟ كريم: طبعًا يا شهاب. إنت عارف إني قبل ما أكون ابن عمك وأخو مراتك، إنت أقرب صاحب ليا. شهاب: أنا لما كارما حكتلي اللي حصل صدقت كلامها، لأني كنت محتاج أصدقه. كنت عايزها تطلع بريئة بأي شكل. مش قادر أتخيل إن كارما، حب حياتي، ممكن تخوني. كنت بحاول بمبرراتها وأعذارها اللي قالتهالي أبرد النار اللي قايدة جوايا. كريم: تمام... فين بقى المشكلة؟ شهاب: المشكلة فيا أنا يا كريم. أنا اتزرع جوايا الشك، ومش عارف أقلع جذوره من جوايا. مبقتش عارف إيه الصح وإيه الغلط. إيه الحقيقي وإيه التمثيل. بشوف الصدق في عينين كارما، وفي نفس الوقت الشك اللي جوايا بيقولي إنها بتمثل عليا. أنا حاسس إني تايه. مش عارف طريقي. كارما كانت هي طريقي وأماني. بس بعد اللي حصل لقيتني ببعد عنها. ببعد عن أماني. بتوه في دنيا واسعة هي مش موجودة فيها. كريم: أوعى يا شهاب تستسلم للشك اللي جواك. لأنك بكده بتقتل اللي بينكم من غير ما تحس. كارما عمرها ما هتقبل شكك فيها. ولو عذرتك مرة، مش هتعذرك التانية. إنت عارف أكتر حاجة ممكن تقتل قلبين هي الشك بينهم. شهاب: عارف يا كريم... بس مش قادر. بجد مش قادر. كريم: وناوي تعمل إيه؟ شهاب بعد تفكير: اسمع يا كريم... عايزك تكلم حسن خليل. كريم بصدمة: نعم؟ أكلمه؟ وده أهبب بيه إيه؟ شهاب: قوله إننا عايزين نعمل معاه قعدة تاني. كريم: إنت أكيد اتجننت يا شهاب. ده قعدة واحدة معاه وصلتك للي إنت فيه، تقوم تقولي أقعد معاه تاني؟ ده مش بعيد المرة دي يخليك تطلق كارما. شهاب: متخافش. أنا عايز أجيب آخره وأجيب كل اللي عنده. ويمكن لما أقعد معاه المرة دي ألاقي حد لكل ظنوني. كريم: حاضر يا شهاب، زي ما تحب. وربنا يستر من اللي جاي. وبالفعل اتصل كريم بحسن، وحدد معه ميعادًا لزيارتهم مرة أخرى. في منزل شهاب: كالمرة السابقة، كان الجميع ينتظر وصول حسن. جلست كارما على الكرسي تفرك يديها من القلق. ولكن هذه المرة لم يضمها شهاب ليشعرها بالأمان وبوجوده بجانبها كما فعل في المرة السابقة. وفجأة أحست بمن يلف ذراعه حولها ويضمها إليه. اعتقدت أنه شهاب، ولكن عندما نظرت إليه وجدته أخاها كريم يضمها إليه وينظر لها نظرة تحمل ألف معنى، وكأنه يقول لها: "أنا بجانبك، وواثق في براءتك أكثر من ثقتي في نفسي." وبالرغم من الطمأنينة التي شعرت بها كارما من وجود كريم بجانبها، إلا أنها تمنت أن يكون زوجها وحبيبها هو من بجانبها ويطمئنها. دق جرس الباب مجددًا معلنًا وصول حسن. وعندما دخل حسن، وجد شهاب يجلس بعيدًا عن كارما. نظر إليهما وابتسم ابتسامة ساخرة. حسن: كريم بيه كان كلمني وقالي إنك عايزني أكرر زيارتي ليك تاني. يا ترى في سبب معين؟ ولا حضرتك اتأكدت إن كلامي صح؟ شهاب: من غير استفزاز، عشان أنا في لحظة ممكن أعصابي تفلت وأقتلك. عايزك تكمل كل اللي عندك. وهنا نظرت كارما إلى شهاب بوجع. حسن بسخرية: حاضر يا بشمهندس. وقفنا لحد ما مدام كارما ادتني كارت التوصية اللي رحت بيه لشركة الفهد، واتعينت وبدأت أستقر هنا في القاهرة. طبعًا عشان الظروف، لأني مكنش معايا اللي يخليني أأجر شقة أقعد فيها، فاضطريت أقعد في لوكاندة كده على قدها. والصراحة اللوكاندة دي نفعتني أوي... وهنا نظر شهاب وكريم إليه باستغراب. حسن: هي بصراحة مدام كارما عرضت عليا تديني فلوس أخد بيها شقة، بس أنا طبعًا مقبلتش أخد فلوس من واحدة ست، حتى لو كانت الواحدة دي الإنسانة اللي بحبها. واستقريت فعلًا في القاهرة، وعدى الوقت. وكنت بقابل كارما من وقت للتاني في أماكن عامة، على أساس إنها بتخلق مشاكل بينها وبين شهاب بيه عشان تعرف تطلق منه. لحد ما في مرة اتقابلنا. --- فــــــــــــــــــلاش بــــــــــــــاك --- كانت كارما وحسن يجلسان في أحد المطاعم المطلة على النيل. حسن: أنا زهقت يا كارما. إحنا هنفضل نتقابل في السر كده كتير؟ كارما: أعمل إيه بس يا حسن؟ حسن: يعني إيه تعملي إيه؟ اطلبي الطلاق من جوزك ونتجوز بقى. إحنا مش مراهقين عشان نعمل اللي بنعمله ده. أنا وإنتِ بنحب بعض، ومن حقنا نتجوز ونتجمع في بيت واحد. كارما: يا حبيبي، أنا عارفة. بس غصب عني. أنا حاولت أتلكك لشهاب على أي غلطة عشان أتخانق معاه وبعدها أطلب الطلاق. بس هو مش سايبلي أي غلطة أمسكها. دايمًا بيعاملني كويس جدًا. حسن بغضب: ولما هو بيعاملك كويس، بتعرفيني ليه؟ روحي خليكي مع جوزك. كارما: من غير ما تتعصب عليا يا حسن لو سمحت، وقدر موقفي. حسن: إنتِ اللي مش مقدرة موقفي. وأنا كل يوم ببقى عارف إنك معاه وفي حضنه. إنتِ مش عارفة ده بيعمل فيا إيه. كارما: لا، عارفة. وإنت عارف إن غصب عني. وإن نفسي أبقى معاك إنت وأتجوزك. بس حاول تفهم. أنا لو طلبت الطلاق من شهاب دلوقتي من غير ما يحصل بينا مشاكل، شهاب هيشك إن في حاجة. وممكن يعند. ومش بعيد يقتلني أنا وإنت. حسن: طب والحل؟ هنفضل نخرج في الكازينوهات زي المراهقين كده؟ كارما: معلش يا حبيبي... اصبر. حسن: أدينا صابرين. كارما: عامل إيه في الشغل؟ حسن: تمام. الشغل ماشي كويس، ومتوصين بيا على الآخر. طبعًا مش جاي من طرف شهاب بيه الصفدي. كارما: ولسه قاعد في اللوكاندة الغريبة اللي إنت فيها دي؟ حسن: أنا مش عارف مش عاجباكي في إيه. كارما: المشكلة إنها عاجباك إنت. دي لوكاندة بيئة خالص. حسن: على قدي يا ست كارما. كارما: ما أنا قولتلك أديك فلوس وتأجر شقة كويسة. حسن: كارما! مش عايز كلام في الموضوع ده تاني. أنا مقبلش أخد فلوس منك. كارما بعد تفكير: قولي يا حسن، هو إنت قولتلي اسم اللوكاندة اللي إنت قاعد فيها دي إيه؟ حسن: إشمعنى يعني؟ كارما: مش يمكن أفكر أطب عليك وأشوفك بتعمل إيه من ورايا؟ حسن: أطبّي عليا إزاي؟ لا طبعًا، إنتِ متجيش مكان زي ده. كارما: ليه يعني؟ حسن: دي لوكاندة شبهة. ده أنا راجل وببقى قاعد فيها خايف على نفسي. كارما: بس أنا هبقى معاك. هخاف من إيه؟ حسن: كارما! إنتِ متأكدة إنك عايزة تجيلي اللوكاندة؟ واستأنف حسن حديثه: حسن: وفعلًا بقت تجيلي اللوكاندة من وقت للتاني. أفتكر اللي بعد كده بلاش يتحكى، لأنه هيضايق ويوجع أوي. كان حسن يحكي ما حدث وسط صدمة من شهاب وكارما. أما كريم فكان يراقبه وهو يتحدث باهتمام. كريم: ممكن أسألك سؤال؟ حسن: اتفضل. كريم: لما العلاقة بينك وبين كارما ماشية كويسة أوي كده، وعلى كلامك بتتقابلوا وعايشين حياتكم، إيه اللي خلاك قلبت عليها وجيت تفضحها قدام جوزها؟ نظرت كارما إلى كريم باستغراب. حسن: لأني بقيت أحس إني بالنسبة لكارما هانم مجرد واحد بتتسلى معاه، مش حبيب نفسها تتجمع معاه في بيت وتبني معاه عيلة. الأول فهمتني إنها بتحبني، وإنها عايزة تطلق من جوزها ونتجوز، وده اللي خلاني قدرت موقفها وفضلت معاها. لكن مع الوقت لقيتها بتهرب من موضوع الطلاق، وفي نفس الوقت عايزة تبقى معايا. بدأت أحس إني لعبة في إيد الهانم. بتقضي معايا وقت جميل، وفي الآخر ترجع لجوزها. وأنا مقبلش ده. كارما بصراخ: إنت بتقول إيه يا حيواااااااااااااان؟ إنت عايز تفهم جوزي إني كنت على علاقة بيك؟ وإني كنت بجيلك اللوكاندة؟ إنت إيييييييه؟ شيطان! حسبي الله ونعم الوكيل! حسبي الله ونعم الوكيل! ثم نظرت إلى شهاب بعينين غارقتين بالدموع. كارما: كداب يا شهاب. أرجوك صدقني. ده كدااااااااب. ده عايز يخرب بيتي. متصدقوش. لم يجبها شهاب. وكانت نظراته لها كلها شك واتهام واحتقار. لم تستطع كارما تحمل كل ما يحدث حولها. ففقدت وعيها وسقطت على الأرض. ركض كل من شهاب وكريم نحوها. وحملها شهاب ليدخلها غرفتها. لكن قاطعه صوت حسن. حسن: خد بالك وإنت بتشيلها يا بشمهندس. متشيلهاش من رجلها اليمين عشان فيها حرق بيوجعها أوي. توقف شهاب عند سماع هذه الكلمات. ونظر إلى حسن بصدمة. الفصل الحادي عشر توقف شهاب عند سماع هذه الكلمات، ونظر إلى حسن بصدمة. ثم ترك كارما لكريم ليدخلها غرفتها، وعاد إلى حسن. شهاب بغضب: وإنت عرفت منين بموضوع الحرق ده؟ حسن بسخرية: جرى إيه يا بشمهندس؟ بقولك كانت بتجيلي اللوكاندة. إنت ليه مش عايز تفهم؟ على العموم، برضه هطلع أجدع منك وأرضي فضولك. --- فـــــــــــــــــــــلاش بــــــــــــــــاك --- كان حسن يقف أمام الشباك في غرفته باللوكاندة. فجأة جاءت كارما من خلفه واحتضنته. تفاجأ بها والتفت إليها، فسقط كوب الشاي الساخن على رجلها. كارما: آاااااااااااه! رجلي! رجلي يا حسن، الشاي وقع عليها. حسن: أنا آسف يا حبيبتي. أنا اتخضيت. معلش، حقك عليا. أنا هنزل حالًا أجيبلك ليها مرهم. كارما: بسرعة يا حسن... مش قادرة. --- بـــــــــــــــــــــاك --- واستأنف حسن حديثه: حسن: الكلام ده كان من تلات شهور تقريبًا. وهنا هجم شهاب عليه وكاد أن يقتله، إلا أن كريم أمسكه. واستغل حسن الفرصة وهرب من بين أيديهم، تاركًا خلفه بركانًا من الغضب داخل شهاب. كريم: ممكن تهدى بقى؟ خلاص، غار في داهية. شهاب: ليه مسبتنيش أقتله؟ كريم: عشان مش هو ده الحل يا شهاب. شهاب: أمال عايزني أسيبه عايش بعد ما طعن شرفي وشرف أختك؟ إنت إيه يا أخي؟ كريم: أنا الموضوع واجعني أكتر منك. بس الفرق إني مشغل عقلي، مش زيك بتهور. لو حسن مات، براءة أختي هتموت معاه. وأوعدك، بعد ما الموضوع ده يخلص، هجيبهولك تحت رجلك تعمل فيه اللي إنت عايزه. المهم نلحق كارما اللي مغمى عليها جوه دي. نظر شهاب إلى كريم بوجع. كريم: حاسس بيك يا شهاب. بس أرجوك متتخلاش عنها في وقت زي ده. هي فعلًا محتاجالك. ذهب كريم وترك شهاب مع كارما. جلس شهاب على الكرسي أمام سريرها، ناظرًا إليها، وتذكر موقفًا قديمًا جمعه بها. --- فـــــــــــــلاش بـــــــــــــاك --- كانت كارما تجلس على السرير وتتألم من رجلها. وعندما دخل عليها شهاب، تفاجأ بمنظرها وأسرع إليها في خوف. شهاب: إيه يا حبيبتي؟ مالك؟ كارما: رجلي يا شهاب... مش قادرة. شهاب: إيه اللي حصل؟ كارما: كنت قاعدة ماسكة شاي سخن. عدت قطتي سمسمة من تحت رجلي من غير ما أحس. اتخضيت ودلقت الشاي على رجلي. شهاب: أهو شفتي؟ عشان قولتلك ألف مرة نمشي القطة دي من البيت. كارما: إنت اللي بتتلكك عشان مبتحبش القطط. شهاب مبتسمًا: سلامتك يا حبيبتي. ألف سلامة. --- بــــــــــــــاك --- عاد شهاب إلى الواقع، وأغلق عينيه من الوجع. شهاب في نفسه: معقولة يا ربي أكون عايش كل ده في وهم وتمثيل؟ معقولة كارما تكون فعلًا كانت بتخوني مع حسن؟ طب ليه؟ أنا عمري ما قصرت معاها في حاجة. أنا كنت بعمل كل اللي أقدر عليه عشان أخليها سعيدة. كانت بالنسبة ليا كل حياتي. أنا كنت عايش بس عشان أشوف الابتسامة على وشها. ممكن بعد كل ده تكون بتخوني؟ يعني الحب اللي كنت بشوفه منها وهي معايا كان تمثيييييييل؟ أنا حاسس إني بحلم. لا... حلم إيه؟ أنا حاسس إني في كابوووووووووس. وتسارعت الأفكار داخل عقل شهاب، حتى لم يعد يشعر بنفسه. وفي النهاية غلبه النوم، وهو جالس بجوار سرير كارما. في بيت الصفدي: كانت ليلى تنتظر عودة ابنها كريم. دخل كريم عليها، ويبدو عليه الحزن. كريم: مساء الخير يا ماما. ليلى: مساء النور يا كريم. تتحسد، بقالك كام يوم بترجع بدري يعني. كريم بضيق: يعني لا كده عاجب ولا كده عاجب. ليلى: لا، أنا بطمن عليك بس. أصل عارفة إن الكباريهات مبتشطبش بدري كده. كريم: يا ماما، أرجوكي. أنا مش مستحمل نفسي. شيليني شوية من دماغك. وعلى العموم ريحي نفسك، أنا كنت عند كارما. ليلى بقلق: كارما! ليه يا كريم؟ أختك فيها حاجة؟ كريم بتردد: متقلقيش يا ماما. هي بس كانت واحشاني، قولت أروح أقعد معاها شوية. ليلى: كريم، أوعى تكون أختك فيها مشكلة وأنا معرفش. كريم: يا ستي، قولتلك متقلقيش. أنا بس حسيت إني كنت مقصر في حقها أوي السنين اللي فاتت، ولازم أقرب منها وأفضل جنبها. يعني في الأول وفي الآخر ملهاش غيري، وأنا أخوها الوحيد. ربتت ليلى على وجهه قائلة: ليلى: ربنا يهديك يا ابني ويخليك لأختك. --- في اللوكاندة المقيم بها حسن: كان حسن يجلس على الكرسي، وأمامه كارما. حسن: وبعدين يا حبيبتي؟ هنفضل نخطف الوقت اللي بنتقابل فيه كده؟ كارما: غصب عني يا حسن. وبعدين ما أنا معاك أهو. انسى أي حاجة تزعلك. حسن: أيوة، بس أنا تعبت. كارما: غصب عني يا حسن. متنساش إنه جوزي. حسن: وليكي عين تقوليها؟ مش إنتِ السبب؟ حد قالك تتجوزي واحد وإنتِ بتحبي واحد تاني؟ كارما: ما إنت عارف إنه كان ماسك كل شركاتنا وأملاكنا. ولو كنت رفضت، كان ممكن يهد المعبد على دماغنا كلنا. وبعدين مش حضرتك اللي سافرت وسيبتني؟ كان زماني مراتك إنت إنت عارف إني مستحملة العيشة معاه بالعافية، لحد ما أستنى الوقت المناسب اللي أطلب فيه الطلاق من غير ما يحس بحاجة. حسن: لما نشوف آخرتها. وهنا أفاق شهاب من نومه مفزوعًا وهو يصرخ، ووجهه يتصبب منه العرق. فوجد نفسه نائمًا على الكرسي أمام سرير كارما، واكتشف أن كل ما رآه كان كابوسًا. استيقظت كارما على صوت صراخ شهاب مفزوعة، وركضت إليه. كارما: شهاب، مالك يا حبيبي؟ إيه اللي منيمك كده؟ لم يجبها شهاب، واكتفى بالنظر إليها. كانت نظرته تحمل ألف معنى، كخنجر يغرس في قلبها. وضعت كارما يدها على كتف شهاب. كارما: شهاب، طمني عليك يا حبيبي. أزاح شهاب يدها بجمود، وتركها وخرج دون أن يجيبها بكلمة واحدة. تركها وهي تبكي وفي حالة يُرثى لها. ظل شهاب يقود سيارته بين الطرقات دون وجهة محددة، كأنه تائه أضل الطريق. وأخذ يرسم في عقله مواقف بين حسن وكارما. ورأى كارما وهي تعامل حسن وكأنه زوجها، وكيف تداعبه، وكيف تسخر من علاقتها بشهاب. حتى وصل إلى قمة غضبه. أما كارما فكانت تجلس في غرفتها منهارة. لا تستوعب كيف تبدل حالها من السعادة إلى الجحيم. كيف لزوجها وحبيبها أن يعتقد أنها تخونه؟ ظلت على هذا الحال طويلًا، إلى أن أشرقت الشمس وحل النهار. فعقدت أمرها، وجمعت جميع ملابسها، تاركة منزل شهاب. في فيلا الصفدي: فتحت ليلى الباب لتجد أمامها كارما، ووجهها أحمر من كثرة البكاء، وبجانبها حقيبتها. دخل القلق قلب ليلى عندما رأت ابنتها بهذا الشكل، فسألتها عن سبب مجيئها بهذه الحقيبة. ليلى: كارما... إيه اللي جابك الصبح بدري كده؟ وإيه الشنطة دي يا بنتي؟ إنتِ اتخانقتي مع شهاب ولا إيه؟ لم تجبها كارما، وظلت تنظر إليها في بكاء صامت. ثم ارتمت في حضنها منهارة. ليلى بفزع: مالك يا كارما؟ في إيه؟ طمنيني عليكي يا بنتي. تعالي اقعدي وفهميني في إيه. ثم سألتها مجددًا: ليلى: إنتِ اتخانقتي مع شهاب؟ كارما: هو كريم مقالكِيش حاجة؟ ليلى: كريم أخوكي قالي إيه يا كارما؟ فهميني. أنا كنت حاسة إن فيكي حاجة، وأخوكي مخبيها عليا ومرديش يقولّي. كارما: بعدين يا ماما، أرجوكي. أنا دلوقتي عايزة أرتااااح. بعد إذنك. ليلى: طب يا بنتي، مش تفهميني الأول؟ كارما: عشان خاطري يا ماما، بعدين. أنا فعلًا تعبانة ومش قادرة أتكلم. ليلى: طب يا حبيبتي، تعالي نامي في أوضتك. ولما تصحي يبقى يحلها ربنا. --- في منزل شهاب: وصل شهاب إلى منزله في الصباح. ودخل غرفته ليتفاجأ بعدم وجود كارما، وعدم وجود جميع ملابسها. فعلم أنها تركت المنزل. فزفر بضيق، وجلس على الكرسي واضعًا رأسه بين يديه. --- في فيلا الصفدي: خرجت ليلى من غرفة كارما بعد أن اطمأنت عليها وأنها نامت. فوجدت كريم أمامها. كريم: إيه يا ماما؟ كنتِ بتعملي إيه في أوضة كارما؟ ليلى بضيق: اتفضل يا بيه، تعالى ورايا على أوضتي. كريم باستغراب: هو في إيه؟ ليلى: مش هنتكلم هنا. أنا مصدقت أختك نامت. كريم: هي كارما هنا؟ ليلى: أيوة. واتفضل قدامي. دخلت ليلى غرفتها يتبعها كريم، وهي تزفر بضيق. كريم: في إيه يا ماما؟ جيباني هنا ليه؟ وإيه اللي جاب كارما الصبح كده؟ ليلى: ويعني إنت مش عارف أختك مالها؟ وإيه اللي جابها دلوقتي؟ كريم بضيق: لا، عارف يا ماما. ليلى: ليه يا كريم مخبي عليا اللي في أختك؟ كريم: مكنتش عايز أضايقك يا ماما. ليلى: يعني إيه مش عايز تضايقني؟ دي بنتي. ومش من حقي أعرف مالها وإيه اللي تاعبها؟ انطق. قولي أختك فيها إيه خلاها تيجي بشنطة هدومها الصبح بدري؟ كريم: أنا هقولك على كل حاجة يا ماما.

مقالات ذات صلة

في سبيل صهيب الجزء الثالث

قلوب وردية وأقنعة سوداء الجزء الثاني

إنتقـ،ـ،ـام عاشق

وعشقت يا جبل الصعيد الجزء الثاني ميمو مصطفى

نعي هند صبري لزوجة نضال الشافعى يثير الجدل.. والفنانة تعلق

دنيا غريبة

اترك تعليقاً إلغاء الرد