الفصل الثالث والعشرون لولا الغرام روز أمين
أجابه الضابط بجمود مهني اعتاد عليه:
-تضمنها ازاي والتحقيقات لسه مخلصتش يا استاذ؟
ثم نقل بصره نحو بسمة، فلمح دموعها التي حاربت بكل كبريائها لتحبسها، وقد أعلنت التمرد أخيراً وانسابت على وجنتيها، رأى في عينيها لأول مرة الخوف والندم، فمنذ أن رآها قبل قليل لم يلمس فيها سوى التمرد والعناد والكبرياء، لكن كل تلك القوة تلاشت فجأة، وتحولت إلى ضعف خالص وندم شديد في حضرة شقيقها الأكبر
وبلحظة رق قلبه لحالها، فبادر دون تردد بالإشارة نحو مكتبه قائلاً لرشيد ونظراته الحائرة:
-حصلني انت وهي على المكتب.
أشار لشقيقته، فتجاوزته بخطوات مرتعشة تتبع أثر الضابط، دلف هشام إلى مكتبه، ووقف خلف مقعده وهو يشير بيده إلى رشيد بصرامة مهنية:
-هات بطاقتك.
تناول البطاقة، ودقق النظر في بياناتها بتمعن، ثم جلس وأشار لرشيد ليتخذ مكانه أمامه، بقيت بسمة واقفة، وعيناها تفيضان بدموع تعجز عن كبحها، فرمقها هشام وقال بنبرة تهكمية ساخرة :
-الوقت بتعيطي؟! ما كنتي عاملة فيها سبع رجالة في بعض في الجامعة.
أمالت رأسها خجلاً، وأشاحت بنظراتها عنه هرباً من قسوة لومه، ليلتفت الضابط نحو شقيقها متابعاً:
-واما حضرتك مهندس بترول وليك مستقبل كبير، سايب اختك ماشية في الطريق ده ليه؟!
وتابع موضحًا:
-طريق السياسة والجري ورا الثورجية اخرته حبس وبهدلة وقلة قيمة، خصوصا انها بنت.
تنفس الصعداء، وأجاب بهدوء ورزانة حاول الحفاظ عليهما:
-انا عارف ومقدر كلام حضرتك كويس يا فندم، بس حضرتك لازم كمان نقدر ان دول شباب، وحماسهم وتعاطفهم تجاة قضية مهمة زي قضية فلسطين ده حق مشروع.
واستطرد مفسرًا:
-فلسطين بالنسبة لنا كمصريين مش مجرد قضية سياسية، دي عقيدة اتولدنا بيها،كلنا اتربينا على ان فلسطين قضية كل مصري وعربي، وواجب علينا كعرب المساندة والثورة والاعتراض في وش العدوان الغاشم.
اعتدل الضابط في جلسته، وأردف مستشهداً بكلماته:
-وانا مش معترض، وهعيد لك الكلام اللي انت بنفسك لسه قايله للشباب بره، البلد ليها قوانين، ولازم نحترمها ونساعد في حمايتها مع بعض بالتنظيم.
أومأ رشيد برأسه تأييداً، وتابع بذكاء:
-انا فاهم كلام حضرتك وبحترمه جداً يا فندم، وعلى فكرة، انا كنت رئيس اتحاد الطلبة لجامعة القاهرة لمدة تلات سنين، وأي مظاهرة قومنا بيها كانت بتصريح من الامن، ومأمنة برجال الشرطة.
