في سبيل صهيب الجزء الثاني
سمعه رسلان وحس بخيبة أمل وبنبرة يأس: يعنى حضرتك مش هتجدر تساعدني؟
انتبه صهيب لنفسه وفاق من شروده، وبجدية واضحة ع ملامحه ونبرة صوته: مين قال كدا؟! قول لي اسمها بالكامل واسم والدتها واى معلومة تعرفها عن الام، وفـ خلال 48 ساعة هيكون عندك عنوانها وكل حاجة عايز تعرفها ان شاء الله.
رسلان بأمل واضح ع ملامحه ونبرة صوته: اختى اسمها هنادي جدري رسلان السيد، واسم والدتها نوال عبد العزيز خضير البيومي، وكل اللى اعرفه عنها انها كانت بترجص فـ كباريه من كباريهات شارع الهرم من زمان اكتر من إكده ما اعرفش حاچة.
صهيب طمن رسلان انه هيقدر يساعده يعرف طريق هنادي ويوصلها فـ خلال يومين، هاني زاد توتره وقام استأذن منهم ومشي بحجة انه عند معاد شغل كان ناسيه، وخرج بسرعة من النادي ركب عربيته وجري ع بيته وهو بيفكر ومش عارف يعمل ايه، ومتأكد ان صهيب طالما عرف بالموضوع يبقى هيحله فعلا وهيوصل زى ما قال، بعت رسالة لـ هنادي بيطلب منها تقابله ضروري عشان يشوفوا حل بسرعة، اما رسلان اتحرج لما هاني سابه ومشي واستغرب توتره المفاجئ، استأذن ومشي هو كمان يروح مكتبه ع وعد من صهيب انه هيوصل ويعرف طريق هنادي.
_____________________
قصر الشهاوي
جناح عادل نفس الوقت
قاعد فـ الصالون وباله مشغول بكل اللى بيحصل حواليه وحاسس ان شهاب وعمران مخبيين حاجة وبيفكر يسأل أبوه.
دخلت سامية شافته قاعد شارد وبملامح كلها قلق ونبرة متوترة: مالك يا عادل في ايه يا حبيبى؟!
عادل بتنهيدة قلق: مش عارف يا سامية، حاسس ان بابا مخبي علينا حاجة وشهاب عارف ايه هى.
سامية: طيب ما تسأل بابا
عادل بيهز راسه وبنبرة يأس: فكرت يا سامية، بس بابا لو الدنيا اتهدت قدامه مش هيقول غير اللى عايز يقوله وبس.
سامية: خلاص اسأل شهاب
عادل بابتسامة سخرية: انتي بتتكلمي ع اساس انك مش عارفة ابنك يعني… وبتنهيد: شهاب تربية جده يا حبيبتي وطالما حاطط راسه فـ راس جده يبقى مش هينطق لو الموت ع رقبته.
سامية: طيب هتعمل ايه؟
عادل: مش عارف يا سامية، قلقان ع سبيل أوى ومتأكد ان بابا عارف مكانها ومخبي، بس اللى مش قادر افهمه، ليه؟
سامية بقلق: تفتكر يا عادل؟! بس ليه؟ طيب لو قولت مخبي عشان علي ونرمين، ما قالش لينا احنا ليه او حتى قال لـ ماما
عادل: هو انتي فاكرة ان فاطمة الشهاوي ما تعرفش عمران مخبي ايه، دي سره، ستره وغطاه وقبل ما يتحرك حركة واحدة بتبقى عارفة هو رايح فين وجاي منين.
