في سبيل صهيب الجزء الثاني
سها بنبرة تريقة: وهتخلصي منها أزاى بقى يااا مرات أبوها؟!
نرمين بغيظ واضح فـ صوتها وع ملامحها: انا رميت شـ*ـرا*رة من 3 سنين لما عرفت الموضوع ده، لكن ما نفعتش يومها، إنما دلوقتي جه وقتها ودى لعبتك انتي.
سها بتوتر وقلق: ازاى؟
نرمين بمكر: هى بقت ضُرتك، وبعد اللى حصل بينها وبين صهيب، سابت القصر وماحدش يعرف هى راحت فين، وشهاب سافر مع عمران عشان يدوروا عليها و……
سها قطـ*ـعت كلام نرمين بغيظ وغيرة: اسكتي بقى ما تفكرنيش، انا هطق بسبب الموضوع ده، بسببها صهيب اتعصب عليا.
نرمين بشفقة مصطنعة: ليه؟ ده حتى عمره ما عملها.
سها بنبرة صوت مليانة غيرة وعصبية: عشان خيرته بيني وبينها لما رفض يسمع كلام جده ويطلقها.
نرمين رفعت حاجبها وبابتسامة خبيثة: عشان غشيمة، بطريقتك دي عمره ما هيطلقها، انما لو سمعتي كلامي وعملتي اللى هقولك عليه، ده مش هيطلقها وبس، ده كمان هيخلي عمران يرميها رمية الكلاب برة القصر والعيلة كلها.
سها بصت لها بتحدي، رغم الغلـ*ـيان اللي كان ظاهر في عينيها: تقصدي إيه بالكلام ده؟
نرمين قربت أكتر، ونبرتها بقت هادية بس كلها سمّ:
“قصدي إنك تشككي صهيب فيها هى وشهاب.
سها لفت وشها للجنينة لحظة، بتحاول تهدي نفسها، قبل ما ترد بحدة: ما تلفيش وتدوري عليا، قولي اللي عندك مرة واحدة
نرمين ابتسمت ابتسامة كلها خبث، وكملت بصوت واطي، كأنها بتهمس بسر خطير: استغلي حبه ليكي وألعبي فـ دماغه يا سها، خليه يشوف بعينك اللى محصلش، وكل ده هيكون لمصلحتنا إحنا الاتنين.
سها بصت لـ نرمين بفضول: وإنتي مستفيدة إيه من كل ده؟
نرمين ضحكت ضحكة خبيثة كأنها بتحتفل بنصرها: إلا مستفيدة، لو قدرتي تدخلي جوة دماغ جوزك وتخليه يصدقك، ساعتها هيطلقها، ولو عمران صدق كلام صهيب، وقتها هيرميها برة القصر هى وشهاب ويحرمهم من كل حاجة، وبكدا بدل ما عيالي هياخدوا شوية فكة، هيحطوا ايديهم ع نصيب الأسد.
سها سكتت لحظة، عقلها بيشتغل بسرعة ويترجم كلام نرمين، لكن ملامح وشها فضلت متماسكة، وبنبرة قلق: ودي بقى أعملها أزاى؟ صهيب ماحدش بيعرف يدخل جوة دماغه.
نرمين قامت وقربت منها أكتر، وبنبرة كلها خبث: عيب عليكي!! ده أنتي حتى شبهي وفيكي مني كتير.
سها بصت لها برفعة حاجب وبمكر: أنا اه شبهك، بس صهيب مش زى عمه يا نرمين
