خلف الظلال الجزء الثاني بقلم يسرا مسعد
مؤمن متعجبا: كلمه ايه ؟
حاتم : قالتلى بالحرف الواحد كده ” خيبتكوا ..بتسيبوا الحيتان والديابه تنهب البلد وتقبضوا على اشرف الناس ” من هنا ورايح مش هبقى خايب وهقبض على سالم وحمدان وانضف البلد منهم ومسير المرشدى اللى مش عارفين نمسك عليه حاجه ده يقع
مؤمن : ههههههه يقع …حاسب لا انت اللى تقع …مش لما يبقى اللى فوقيه نضاف الاول يبقى نوقعه… المرشدى مش لوحده ولو وقع مش بعيد يوقع رئيس الجمهوريه نفسه ههههه..ااه ربنا يستر
حاتم : مسير البلد تنضف منهم
مؤمن : بيتهيألك مش هما بس اللى مش نضاف …احنا كمان مش نضاف بسلبيتنا وخوفنا …يالا كفايه كلام كده الحيطان ليها ودان …سلام
انصرف مؤمن تاركا صديقه يفكر بعمق متذكرا هاله ونظرتها له ذاك اليوم
لايدرى لما لم تفارقه عيناها منذ ان غادرت السجن
ولايدرى لما فى احلك الظروف والمواقف يطل عليه شبحها ليذكره بها من جديد
فيهون الموقف مع طله وجهها فى خياله ويشتاق قلبه لرؤياها مره اخرى وان كانت اخيره
فينهره عقله وبشده ليركز فى عمله فقط
الا ان حدسه يخبره انه سيقابلها وان أبى …………………هكذا ُسطرت المقادير
وفى اليوم التالى استيقظت هاله وتأنقت استعدادا للخروج للعمل واتجهت الى غرفه امانى لتجدها هى الاخرى اعدت نفسها للذهاب الى الشركه التى تملكها “نانسى ”
راقبتها هاله وهى تلتفت حولها يمينا ويسارا امام المرآه فابتسمت لها هاله وقالت : صباح الخير مالك؟
عبست امانى قليلا : صباحك فل ..مش واخده انا على التيرات.. مالها العبايه
نظرت لها هاله موبخه : عبايه !!!!….مهم اووى مظهرك يكون كويس فى اول يوم لانك بتدى انطباع للى قدامك عشان يكون فكره كويسه عنك …
تنفست امانى بصوت مسموع : عشان خاطرك بس
هاله : ربنا يخليكى ليا وان شاء الله اردهالك …المهم عارفه هتعملى ايه ؟
هزت لها امانى رأسها مؤكده : عارفه …ادور على واحده اسمها رجاء ..دى لاتاته وعجانه واحاول استقصى منها على اخبار الشركه
هاله محذره اياها : بس اوعى تخليها تشك فيكى …يعنى بالراحه المهم اووى ..تصاحبيها وتبينلها انك مالكيش صحاب هنا ..امانى ..خدى بالك الله يخليكى
امانى بقلق : طيب لو كانت مشيت ساعتها ..هنعمل ايه ؟
تنهدت هاله : والله ما عارفه ..ربنا يسهل وتكون لسه موجوده ولو ماكنتش موجوده يبقى على الاقل اعرفيلى اسماء اللى موجودين دلوقتى
