خلف الظلال الجزء الثاني بقلم يسرا مسعد
سالم متأففا : اخلص يا وليد
وليد بصوت منخفض: كاميرات المراقبه اياها ياباشا
سالم بحذر : مالها؟
وليد : ابدا يظهر السوفت وير بتاعها فيه حاجه خلالها مقدمه ساعتين ومش عارف اظبطهم ..قلت اسأل حضرتك ابعت اجيب مهندس يظبطهم …ولا ايه النظام كمان عشان رفيق بيه مايحسش بيهم
سالم باستهتار: ياااا اخى ….ايه يعنى الساعه بتاعتها متقدمه ولا متأخره ..المهم شاغلين كويس وبيسجلو ولا فيهم حاجه
وليد : لا يا باشا تمام ..وبيسجلو والرؤيه واضحه جدا كمان
سالم : خلااص سيبك بقى من الموضوع ده وركز معايا فى المهم ..بعد ماتمشى الناس عايزك تحضرلى العربيتين الفور باى فور والمينى باص تفكلى الكراسى بتاعتهم وارضياتهم وسقفهم كمان
وليد ساخرا : مش فاهم ليه كل ده هنبعهم خرده
سالم بحزم: يا اخى اعمل اللى بقولك عليه ماتبقاش بجم …انا هجيب البضاعه واخزنها فيهم
لمعت عينا وليد : يا باشا انت مش سهل خاااااااااالص انا مش عارف بتجيب الافكار دى منين وانا اللى قلقان وبقول وسط البلد والرجل رايحه جايه لكن هنا تحت عنينا وتحت امرنا
سالم حانقا: طيب ما اديك اهو بتفهم امال مالك ساعات كده بتقفل ومخك بيتربس
وليد : تلميذك يا باشا ولسه بتعلم برضه ….
سالم : هاه قدامك اد ايه
وليد : ادينى ساعتين زمن وتلاقى المكان جاهز
سالم : هيا ساعه يلا انجز عبال ما اكلم الرجاله عشان يتحركوا قبل حركه المرور ماتبقى صعبه
انصرف وليد ليخبر الموظفين بحتميه انصرافهم بحجه وهميه
حملت هاله حقيبتها وسألت وليد : نمشى دلوقتى يعنى الساعه لسه 11 داحنا لسه فاتحين مابقلناش ساعه
وليد : ايوا يا مريم دلوقتى وحالا كمان الشركه هتيجى ترش المكان
هاله : ترش المكان ليه المعرض نضيف مافهوش حتى نمله
وليد : هوا انا لازم اخوفك طيب يا ستى هوا مش نمل ولا صراصير …لاء تعبان …شوفناه النهارده والاحسن انكم تمشوا ونقفل المكان عبال ماتيجى الشركه وتمسكه
سمعت بوسى حديثهما فصرخت فزعه : تعبان ….يا مامى…انا ماشيه ومش راجعه تانى الا لما تتصل بيا يا وليد وتطمنى انكم مسكتوه والا اعتبرونى مستقيله
شعرت هاله بالقلق ولكن شيئا ما انبئها ان وليد يكذب ولكنها لم تدرى كنهه الا ان حدسها اكد لها اعتقادها
فمشيه وليد الواثقه الخطى لا تدل اطلاقا عن وجود ثعبان بالمكان …
