خلف الظلال الجزء الثاني بقلم يسرا مسعد
ووصل رفيق الى الباحه الخارجيه وتعجب لدى رؤيه الستائر المسدله بطول المعرض وعرضه فى تلك الساعه المبكره من النهار
ليجد احد رجال سالم يعترض طريقه ليمنعه من الدخول
فصاح فيه رفيق قائلا بغضب : وسع بقولك …المعرض ده بتاعى
قال الرجل فى خشونه : ممنوع يا باشا دى اوامر سالم بيه
تظاهر رفيق بالانصراف فهدأ الحارس من مقاومته وفجأه عالجه رفيق بلكمه قويه اصابت فكه جعلته يترنح ليسقط ارضا
ودخل رفيق المعرض مسرعا فاعترض طريقه رجلان آخرين
فصاح رفيق عاليا ليتردد صوته فى ارجاء المكان : سالم ..يا سالم
خرج سالم من مكتبه بالدور العلوى وامر رجاله بالانصراف باشاره من يده
صعد رفيق الدرج المعدنى بسرعه بالغه وصاح فى غضب : ممكن افهم ايه اللى بيحصل هنا …هيا حصلت رجالتك يتهجموا عليا ويمنعونى من الدخول فى ملكى
فقال سالم بهدوء : براحه هدى خلقك ….انا اصلى منبه عليهم ماحدش يهوب المعرض ولما اتأخرت كده قلت يبقى النهارده انت مريح وواخد اجازه تستجم
التفت رفيق يمينا ويسارا ناظرا للاسفل وقال ساخطا : ايه اللى بيحصل ده… والعربيات دى ايه اللى فكها كده ؟ وايه الكراتين دى …
وعندما لم يجد ردا لاسئلته المتلاحقه قال فى نفاذ صبر :وفيين الناس ؟؟؟؟؟ماتفهمنى ….
تركه سالم غارقا فى حيرته ودخل مكتبه واخرج سيجارا واخذ ينفثه بهدوء فدخل رفيق وراءه غاضبا
وقبل ان يتمكن من النطق قال له سالم بصرامه : ااقفل الباب وواقعد واهدى كده عشان افهمك …ونعرف ناخد وندى فى الكلام
نفذ رفيق ما امره به سالم وجلس وحاول ان يتماسك اعصابه فقال برويه : ادينى قعدت ممكن افهم بقى ؟
سالم : بقى يا سيدى العمليه اللى فاتت حصلت فيها لعبكه والبيعه ماتمتش زى ماكنت مخطط فمحتاج اخبى المخدرات لحد ما الاقيلها بيعه قريب …ومالقتش انسب من المكان هنا فكيت كام عربيه وخليت رجالتى يشيلوها جوه الفرش ويرجعوها زى الاول واحسن… بس العربيات دى طبعا مش هتتحرك سنتى من مكانها بعد مانخلص لحد ما اخلص صفقتى ..بس كده
عقد رفيق حاجبيه غاضبا : بس كده يا سلام .انا منبه عليك بدال المره مليون…. انا ماليش فى شغلك.. وماليش دعوه بيك … صح ولا انا غلطان تقوم تجيبهالى لحاد هنا وكمان تحطنى قدام الامر الواقع
ابتسم سالم وقال : طيب حط نفسك مكانى ولا بلاااش احطك انا قدام الفيلم ده وانت تشوف ..وتقيم الموضوع وساعاتها هتعذرنى
