وصية صفية الجزء الخامس بقلم منال ام إبراهيم
نورا : علي مش أنا قولتلك قبل كده ان الفلوس الموجودة فالبنك دي ممكن تاخدها وتفتح بيها مكتب ديكور وتبتدي الشغل عادي …ليه بقى عامل أزمة كده?
علي بإصرار: وانا سبق وقولتلك ان دي فلوسك وأنتي حرة فيها لكن انا مش حاقدر اخدها
نورا:يا سيدي اعتبرهم سلف وتقدر تردهم لما المكتب يقف على رجليه ويشتغل …ها يا علي قولت إيه ? عشان خاطري بقى وافق انا مش عايزة أشوفك مهموم كده
علي: خلاص يا نورا… اوعدك إني افكر فالموضوع ده
ابتسمت قائلة: ايوه كده ريحتني ….باقولك إيه …تشرب معايا نسكافيه ?
علي: هو انا موافق أشرب نسكافيه بس معاكي دي هيا اللي مش موافق عليها
نورا بدهشة: اشمعنا يعني?
علي: لان سيادتك مش حتشربي نسكافيه تاني من هنا ورايح… اتفضلي بقى هاتيلي النسكافيه وتجيبي لنفسك كوباية لبن … ماشي
نورا بتوسل: ليه بس كده يا علي …هو أنا عملت فيك حاجة لاسمح الله …عايز تشربني لبن
دفعها علي برفق نحو الباب قائلا: اتفضلي روحي يلا هاتي اللبن وتعالي عشان تشربيه ادامي
نورا بإستسلام: أمري لله .
غادرت نورا الغرفة ثم عادت بعد قليل وهي تحمل في يدها كوبين ولكنها فوجئت بعلي يقف متجمدا في مكانه وكأنه تمثال مصنوع من الشمع لاحياة فيه وقد سقط هاتفه من يده على الفراش…فزعت نورا لرؤيته على هذه الحالة فوضعت ماكانت تحمله واقتربت منه قائلة بجزع: علي مالك ياعلي فيك إيه ?
أجابها علي وهو لايزال على تلك الحالة من الجمود: عمي ونادية عملوا حادثة بالعربية والمستشفى اللي هما فيها لسه مكلماني دلوقتي
شهقت نورا ثم قالت بفزع: بابا ونادية!
****************************
أمام الغرفة التي يرقد بها صفوت بالمشفى الذي تم نقله إليه هو ونادية كان علي ونورا يتحدثان مع الطبيب الذي كان يقول : المدام اللي كانت معاه توفت قبل وصولها المستشفى لأن تقريبا الحادثة حصلت فالناحية اللي كانت هيا موجودة فيها … اما هو فللأسف حالته صعبة جدا … احنا اتصلنا بحضرتك بناء على طلبه لإنه كان عمال ينادي على شخص إسمه علي ولما بحثنا فتليفونه وتوصلنا لنمرة حضرتك اتصلنا بيك علطول لإنه مصمم يشوفك دلوقتي… حضرتك تقدر تدخله بس أرجوك بلاش تتعبه …عن إذنكوا
كانت نورا تبدو في حالة إنهيار وهي تستمع إلى كلام الطبيب وتتمتم قائلة: ياحبيبي يا بابا … وعلي يحتويها بذراعه محاولا تهئتها قائلا : نورا إهدي شوية عشان خاطري يا حبيبتي وعشان خاطر ابننا
