وصية صفية الجزء الخامس بقلم منال ام إبراهيم
لاحظت نورا ضيق علي من كثرة الأسئلة فاقتربت من سمية قائلة: تعالي يا خالتو اقعدي وانا اقولك ….
انصاعت سمية لرغبتها فجلست ثم جلست نورا إلى جوارها قائلة: تقدري تقولي كده ان انا اخدت حق صفية وحقي انا كمان …يعني طلعت كل اللي فقلبي وقولت كل اللي كان فنفسي
سمية متعجبة: هو انا كده فهمت حاجة يا بنتي …اخدتي حق صفية من مين ?
علي : ماما ممكن بعد إذنك ندخل أنا ونورا نستريح شوية ولما نقوم حنحكيلك اللي عايزةتعرفيه
سمية : ماشي يا ابني …اللي تشوفه
ربتت نورا على فخذها قائلة: معلش يا خالتو…احنا فعلا محتاجيين نرتاح شوية وبعدين اوعدك اني احكيلك كل حاجة
في غرفة علي كان علي ونورا يتناقشان بشأن ما حدث وعلي يسأل نورا قائلا: تفتكري ممكن تكون قالت إيه لعمي عني?
مطت نورا شفتيها قائلة بحيرة : مش عارفة …بس أيا كان اللي قالته..انا مبسوطة انها ادتني الفرصة دي عشان اخرج كل اللي فقلبي
بدا عليه عدم الرضا وهو يجيبها قائلا: بغض النظر عن أي حاجة أنا مش موافق على اللي انتي عملتيه ده… ماكانش يصح تكلمي والدك بالطريقة دي يا نورا مهما عمل .
نورا بدهشة: معقول يا علي انت اللي بتقول كده
علي بتصميم: ايوه انا اللي بأقولك كده لان هو ده الصح
ابتسمت قائلة : طب لما هو كده دافعت عني ليه ?
علي:عشان كان لازم اعمل كده … حقك عليا إني أحميكي من أي حد مهما كان … لازم يعرفوا انك مابقيتيش لوحدك
اقتربت منه نورا وطبعت قبلة على وجنته قائلة: ربنا مايحرمنيش منك … ماتتصورش سعادتي كانت اد إيه لما انت عملت كده …بس انت ليه قولتلهم على موضوع الحمل قبل ما نتأكد الأول
علي بإبتسامة: انا متأكد انك حامل ان شاءالله…وبصراحة كده كنت عايز أغيظ نادية … بأقولك إيه… تعالي بقى ننام دلوقتي ونستريح عشان نقدر نفكر ونشوف حنعمل إيه فاللي جاي
في غرفة مكتب صفوت بالفيلا كانت نادية تخبر والدها بتفاصيل تلك الفكرة التي ستعيد علي ونورا إلى كنفه مرة أخرى معتذرين على مابدر منهما … إلي ان انتهت قائلة: إيه رأي حضرتك فالفكرة دي
أجاب صفوت قائلا بذهول: إيه ! أكتب كل ثروتي بإسمك !
نادية: ايوه يا بابا عشان تحرمهم من الميراث وبكده حيفكروا كويس وييجوا يعتذروا لحضرتك على اللي عملوه لما يلاقوا نفسهم مش حيطولوا مليم واحد من ثروة حضرتك
