وصية صفية الجزء الخامس بقلم منال ام إبراهيم

نظر إليها بإهتمام وقال بجدية: اعتبريني يا ستي وافقت من قبل ما اسمعه… طلب إيه ده بقى ?

أجابت بجدية: أصل انا بصراحة زهقت من قعدة البيت …حضرتك وعلي بتروحوا الشركة ونورا كلها أيام والدراسة حتبتدي … يعني هيا كمان حتنشغل وأنا حافضل فالفيلا لوحدي…فأنا بقى فكرت وقولت ليه أنا كمان ماروحش اشتغل مع حضرتك فالشركة ? وبكده اتعلم وفنفس الوقت مابقاش حاسة بالملل فغيابكوا

صفوت بدهشة: وانتي يا بنتي تفهمي إيه بس فشغلنا ?

نادية بإصرار: ياحبيبي انت ناسي ان أنا اصلا خريجة تجارة قسم إدارة أعمال …وبعدين ما البركة فيك انت يا بابا يا حبيبي عشان تعلمني وتعرفني كل حاجة فشغلكوا

اجابها قائلا بإمتعاض: يا نادية يا حبيبتي أنا دلوقتي كبرت ومابقاش فيا دماغ اعلم حد وماعنديش صبر زي زمان

ربما لو كان يحاول مساعدتها في مخططها لما قال أفضل من ذلك …وجدتها نادية فرصة ذهبية لتقول بخبث: خلاص بقي يا بابا …مافيش غير إن حضرتك تطلب من علي إنه هو اللي يعلمني ويفهمني كل حاجة فالشغل …طالما حضرتك مش حتقدر

استحسن صفوت الفكرة فقال مؤيدا: معاكي حق …علي هو احسن واحد يعلمك لإنه عارف كل كبيرة وصغيرة فالشغل … يمكن كمان اكتر مني … أنا حابلغه النهاردة بالموضوع ده واطلب منه يتولى المهمة دي…وانتي من بكرة تعملي حسابك تروحي معانا الشركة…وأنا واثق انك حتتعلمي بسرعة

نظرت إلى الفراغ أمامها وقالت بتحدي: ماتقلقش يا بابا …أنا حاثبت لحضرتك وللكل…ان بنتك مش جميلة وبس …لأ وكمان ذكية

ما إن علم علي من عمه بنبأ قدوم نادية للعمل بالشركة حتى أعتراه ضيق وتوتر شديدين … كان يود أن يخبر عمه برفضه لهذا الأمر …ولكنه بالتأكيد لا يملك خيارا كذلك…فالشركة بالطبع تخص عمه وهو وحده صاحب الحق في التصرف بشأنها… أما ضيقه الأكبر فكان بسبب رغبة عمه أن يتولى هو مسئولية تعليم نادية وتدريبها …ولكن كعادة الأمر تنتصر رغبة صفوت فالنهاية…وبينما كان يزاول عمله في مكتبه بالشركة إذ سمع طرقا على باب غرفته فسمح للطارق بالدخول …لتدخل نادية وهي تحمل بيدها أحد الملفات وتقول في حيرة مصطنعة:لوسمحت يا علي…ممكن تفهمني الحاجات اللي فالملف ده لإني فيه كذا نقطة مش فهماهم والبركة فيك انت بقى تفهمني

تنهد علي قائلا في ضيق وهو يمد يده ليأخذ الملف: وريني يا نادية لما أشوف إيه اللي انتي مش فاهماه بالظبط