وصية صفية الجزء الخامس بقلم منال ام إبراهيم

في اليوم التالي كان صفوت وناديه عائدين معا داخل سيارة صفوت من الشهر العقاري بعد أن قام بعملية بيع وشراء لجميع ممتلكاته لإبنته نادية التي كانت تقود السيارة والسعادة مرتسمة على وجهها بوضوح فيما كان صفوت يحدثها قائلا: اعملي حسابك لو ماحصلش فخلال أسبوعين وعلي ونورا رجعوا يعتذرولي عن اللي عملوه …انا طبعا حارجع كل حاجة لأصلها زي ما كانت ولو حصلي حاجة أنا وصيتي ليكي انك تدي لكل واحد حقه وقتها حسب شرع ربنا … فهماني يا نادية

نادية: طبعا طبعا يا بابا هيا دي عايزة كلام…وبعدين ربنا يطولي فعمرك

صفوت : اتمنى انهم يفكروا كويس ويرجعوا لعقلهم لإني بصراحة نفسي اوي حفيدي يكبر ادام عنيا فالفيلا وأشيله وافرح بيه …لكن طبعا ماكانش ينفع بعد اللي عملوه إني اتحايل عليهم او حتى اروح أصالحهم وارجعهم وهما اللي غلطانيين …عشان كده كان لازم قرصة الودن دي

لم تكن نادية تستمع إلى حديث والدها حيث كانت شاردة تفكر… فقد كان جل مايشغلها هو انها الأن تستطيع مساومة علي بعد ان اصبح كل شئ في قبضتها … على التخلص من نورا والزواج منها ليصبح كل ذلك ملك يديه …وإما ان يصر على رأيه فيكون هو الخاسربكل تأكيد … لم يكن صفوت بأفضل حال منها فقد شرد هو الأخر يفكر في مدى صحة ما أقدم عليه وهل يؤثر حقا مع علي ونورا …وأثناء شرودهما لم يلاحظ أي منهما تلك السيارة التي جاءت مسرعة في الإتجاه المعاكس ليستفيق صفوت متأخرا فيصرخ بها قائلا: نادية…حاسبي يا نادية…نادية……..

* الفصل الثاني والثلاثون * الأخير* الجزء الثاني *

بعد أن عادا معا من أحد معامل التحاليل الطبية أخبر كل من علي ونورا سمية بخبر الحمل الذي سعدت به سمية كثيرا وكذلك لمياء … ثم اتجها معا إلى غرفتهما … لاحظت نورا ذلك الشرود الذي يبدو عليه علي فاقتربت منه وجلست إلى جواره وهي تقول في حنو: مالك يا علي ? هو انت مش فرحان ولا إيه?

نظر إليها علي قائلا بدهشة: ليه بتقولي كده يا نورا ?

نورا بجدية: يعني … من ساعة ما خرجنا من المعمل وانت ساكت كده وشكلك زي ماتكون مضايق

امسك علي بيدها ووضعها بين راحتيه قائلا: اوعي تقولي كده مرة تانية… انا طبعا فرحان وفرحان اوي كمان … بس كل الحكاية ان دلوقتي بقى فيه فرد رابع مسئول مني غيرك انتي وماما ولميا …عشان كده لازم ابتدي من بكرة ادور على شغل بشكل جدي شوية …