وصية صفية الجزء الخامس بقلم منال ام إبراهيم
حمل علي ونورا حقائبهم وانطلقوا مغادرين نحو منزل سمية بينما وقف صفوت مكانه مذهولا مما قالته نورا وفعله علي …فيما كانت نادية تحدثه قائلة: شوفت يا بابا …شوفت كانت بتكلم حضرتك ازاي … فيه بنت محترمة تكلم باباها بالطريقة دي وتقوله الكلام اللي قالته ده …شوفت علي واللي عمله يا بابا ?
صفوت : معقول ده علي اللي ماكانش بيكسرلي كلمة … معقول يخرج عن طوعي بالشكل ده ويعمل اللي عمله ده
نادية بخبث: شوفت يابابا …هيا اللي جرأت علي عليك عشان بتكرهك وفاكرة انك بتفضلني عليها .
صفوت بدهشة: اللي مش قادر افهمه منين قالك الكلام اللي قالهولك ده ومنين متمسك بيها بالشكل ده ?
اسرعت نادية تجيبه قائلة: ماهو لما لقى نفسه خلاص حيخسر كل حاجة… قال يعمل نفسه برئ ويعمل انه متمسك بيها عشان هيا تصدقه …وطالما انا رفضته يبقى خلاص مابقاش ادامه غيرها
صفوت: انا لحد دلوقتي مش قادر اصدق اللي عملوه ده ..
اسرعت تبث سمومها كأفعى رقطاء وهي تقول بدهاء: حضرتك مش لازم تسكت يا بابا…لازم تعاقبهم على اللي عملوه ده …معقول يتجرأوا على حضرتك بالشكل ده ويمشوا وكأن مافيش حاجة حصلت
صفوت بدهشة: وانا حاعاقبهم ازاي بس يا نادية?
نظرت إلى الفراغ أمامها وقالت بخبث: أنا بقى عندي الطريقة اللي حتخليهم يرجعوا زاحفين ويبوسوا إيد حضرتك عشان تسامحهم كمان …………
* الفصل الثاني والثلاثون* الأخير* الجزء الأول*
انطلق علي ونورا بسيارة نورا نحو منزل سمية وبعد فترة كانا يطرقان الباب لتفتح لهما لمياء التي سعدت كثيرا بوجودهما ورحبت بهما رغم دهشتها من رؤية تلك الحقائب التي يحملانها …جاءت سمية من غرفتها لترحب بهما بدورها ثم علت وجهها علامة إستفهام ممزوجة بالحيرة عندما رأت حقائبهما… لاحظ علي ذلك فبادر قائلا: ماما انا ونورا جايين عشان نقعد معاكي هنا فالشقة لفترة بسيطة بس على مانجيب شقة نعيش فيها… ده بعد إذن حضرتك يعني
أجابته سمية قائلة: إذن إيه بس يا ابني …البيت بيتكوا طبعا… بس يعني ….انتوا سيبتوا الفيلا عند عمك ليه ?
علي: خناقة صغيرة كده يا ماما… تقدري تقولي سوء تفاهم وحيروح لحاله بإذن الله
سمية بدهشة: خناقة! مين اتخانق مع مين يا ابني ?
علي بضيق: يا ماما خناقة وخلاص
سمية بإصرار: يعني انت اتخانقت مع عمك ولا مع نادية … ولا نورا اتخانقت مع نادية ولا إيه بالظبط?
