نفوس قاسية الجزء الثاني
صمتت صفية مرة أخرى ونظرت إلى سميرة وقالت:
– أحنا جايين نطلب أيد هدى لمحمود ابني.
شهقت سميرة ووقفت فجأة وهي تسأل بأندهاش:
– جايين تطلبوا أيد مين لمين.
أجابها محمود بهدوء وهو ينظر لحمدي:
– أنا جاي أطلب هدى للجواز.
ضحكت سميرة بسخرية وقالت:
– ومجبتش مراتك معاك ليه يا أستاذ محمود هي كمان.
أشاح حمدي ببصره عن محمود حين سمع قول شقيقته وقال يلطف الأمر:
– اقعدي يا سميرة الكلام أخد وعطا وسيبي محمود يقول اللي عنده قبل ما تقولي اللي عندك.
شكر محمود حمدي وقال:
– سهر كانت فعلا جاية تطلب هدى منك ليا يا حجة سميرة بس تعبت والدكتور حمدي وهدى شافوا حالتها كانت عاملة أزاي، وقبل ما تقولي حاجة أنا هصارحك باللي عندي من البداية كده أنا معنديش استعداد أطلق سهر ولا اسيبها لأنها ببساطة ملهاش إلا أمي وأنا فالدنيا كلها ولو سبتها يبقى معنديش أصل، أما سبب إن سهر اختارت هدى وطلبت أني اتجوزها فعلشان حست قد أيه هدى أخلاقها كويسة وشبهنا فحالها وهادية وقلبها طيب وكمان علشان يبقى عندي ولاد لأنها مش بتخلف ولو حضرتك والدكتور حمدي وافقتم أنا هنفذ لكم كل طلباتكم إلا أني اسيب أمي وسهر زي ما قلت.
كانت سميرة تستمع لمحمود بدهشة عقدت لسانها فنظرت إلى شقيقها لتتفاجأ به يقول:
– وأحنا مش هنلاقي أحسن منك لهدى بس أدينا مهلة نعرف رأيها ونرد عليك.
أجابته صفية بصدق:
-وأنا بطمنكم إن هدى هتبقى بنتي التانية وعمرها ما هتحس إن محمود متجوز غيرها وهنشيلها فوق راسنا وجوا قلوبنا، ولو عاوزين ليها شقة لوحدها محمود هيجيب لها شقة تانية بس علشان نبقى على وضوح مش هتبقى شقة تمليك هتبقى إيجار لظروف خاصة شوية وعمومًا أحنا هنستنى ردكم وربنا يوفق هنستئذن أحنا سلام عليكم.
كانت هدى تقف خلف باب غرفتها تستمع لحديث محمود وصفية لتقفز فرحًا بعدما علمت أنه يرغب في الزواج منها، فاخيرًا يتحقق لها حلمها لتتفاجأ بخالها يقف أمام الباب ينظر لها وعلى وجهه ابتسامة وقال:
– احمدي ربنا إن أنا اللي فتحت الباب والدتك لو شافتك كانت خنقتك بس تعالي هنا هو أنتِ فرحانة إنه طلبك، يابنتي أنا أول مرة أشوف واحدة فرحانة أنها هتتجوز واحد متجوز بس بصراحة هو ميتعيبش الراجل مز بجد.
ضحكت هدى وهي تحتضن خالها وتقول بصوت منخفض:
– أنا مش بخبي عليك حاجة يا خالو وأنت حاسس بكل حاجة، المهم قولي حضرتك هتقدر تقنع أختك ولا هتتخلى عني وتبيعني.
