نفوس قاسية الجزء الثاني
و أدار وجه له ليسمع باب مكتبه يغلق فجلس آدم على مقعد مكتبه دافنا رأسه بين كفيه وهو يهمس:
– أنتِ فين يا سهر ضيعتي مني فين وضيعتي عمرى وراكي.
————————
طرقت هدى باب شقة سهر ففتحت صفية لها، فنظرت هدى لها وابتسمت وقالت:
– السلام عليكم يا طنط صفية حضرتك عاملة إيه النهاردة.
ابتسمت صفية لهدى وقالت:
– الحمد لله يا بنتي أنتِ عاملة إيه ووالدتك أخبارها إيه.
أجابتها هدى برقة وقالت:
– الحمد لله بتسلم على حضرتك كتير إنما فين سهر كنت عايزة استلف منها رواية.
ابتعدت صفية عن الباب وهي تقول:
– ادخلي يا هدى هي قاعدة فالبلكونة.
دخلت هدى وهي تنظر أرضا بخجل وتوجهت إلى البلكونة فشاهدت سهر شاردة تنظر للبحر فقالت وهي تحتضنها من الخلف:
– سرحان فايه يا جميل.
هبت سهر وهي تصرخ وترتعد خوفا ونظرت لهدى وعيناها مليئة بالذعر فتفاجأت هدى من ردة فعل سهر وتراجعت لتجد صفية تدخل بسرعة وتضمها لصدرها قائلة:
– أهدى يا بنتي دي هدى بتهزر معاكِ.
تنهدت سهر وهي تتشبث بحضن صفية وابتعدت ببطء وصدرها يعلو ويهبط بحدة فزدادت دهشة هدى وقالت:
– أنا آسفة والله مكنش قصدي أبدا اخضك بالشكل ده سامحيني يا سهر.
حاولت سهر تمالك نفسها ورسمت ابتسامة باهتة على ملامحها لم تصل إلى عيناها وقالت بتعب:
– معلش يا هدى أنا اللي أسفة كنت سرحانة تعالي ندخل جوا متخافيش محمود فالشغل ولسه وقت على ما يرجع يعني هتبقى براحتك.
أحمر وجه هدى ودق قلبها بقوة حين سمعت اسم محمود وحاولت إخفاء احساسها وخفضت عيناها لتتنهد بحزن وتدخل خلف سهر وصفية فقالت وهي تجلس بجانبها:
– أنا كنت جاية أخد الرواية وهطلع على طول علشان ماقولتش لماما أني هتأخر كمان علشان خالي جاي من القاهرة وطالب كيكة شيكولاته مخصوص فعملها له.
ابتسمت سهر وقالت:
– طيب خليكِ شوية أنا هتصل بطنط وأقولها إنك قاعدة معانا شوية ولا إيه يا خالتي.
نظرت سهر لصفية وغمزت بعيناها فحدقت فيها صفية ثم ابتسمت وقالت:
– تصدقي معاكِ حق يا سهر.
واقتربت من هدى وربتت على ظهرها بحنو وقالت:
– على ما سهر تجيب لك الرواية هعمل لنا شاي وادوقك كيكة سهر ونشوف بقى عمايلك ولا عمايل سهر.
ابتسمت هدى بخجل فأستئذنتها سهر ودخلت إلى غرفتها وهي تنظر للساعة وجلست على فراشها تحتضن الرواية وتنتظر.
دخل محمود إلى الشقة وهو ينادي:
– يا صفصف يا قلب محمود يا سهر أنتم فين.
