لفت انتباه الجزء الأول بقلم امنية الريحاني

ريم بصتله باستغراب شديد بس طبعا من جواها كانت بترقص انه بدا يغير من حازم

ماجد: انا اسف يا ريم انا كنت متعصب شوية مكنش قصدى

ريم بابتسامة: ولا يهمك يا دكتور

ماجد: ممكن اسألك سؤال ؟؟

ريم: طبعا اتفضل

ماجد: هو حازم ده هو الشخص الى انتى بتحاولى تلفتى نظره

ريم: هتفرق مع حضرتك

ماجد باندفاع : اه طبعا… قصدى… عايز اعرف افكارى بدات تجيب معاه ولا لسه

ريم: امممم…. احب اطمن حضرتك ان فكرة حضرتك المرة دى بدأت تجيب مع الشخص الى بحبه فعلا بس مش هو حازم .حازم ابن عم ندى صاحبتى وبس

ماجد: تمام .. ممكن نكمل
ريم: اتفضل

ماجد: ريم مش احنا بقينا صحاب

ريم: طبعا يا دكتور حضرتك بقيت اقرب واحد ليا بتكلم معاه

ماجد: طب ممكن اسألك سؤال وتجاوبينى من غير ما تهربى منى زى كل مرة

ريم بقلق: اهرب ! اهرب من ايه يا دكتور اتفضل اسأل

ماجد: ايه الى فى حياتك من ناحية مامتك وجعك اوى

ريم بصدمة: ليه حضرتك خمنت ان فى حاجة وجعانى من ناحية امى الله يرحمها

ماجد: احساس مجرد احساس. لو مش عايز تجاوبينى خلاص بس انا ….

ريم: بس انا عايزة احكيلك يا دكتور

ماجد: وانا سامعك قولى

ريم: احنا كنا اكتر اسرة سعيدة ممكن تعرفها انا واخويا عايشين مع بابا وماما الى الكل كان عارف اد ايه كانوا بيحبوا بعض من قبل الجواز وحبهم ده كان منقول لينا ومحاوطنا بالدفئ والامان

ماجد: وبعدين

ريم: فى يوم صعب انه يتنسى امى راحت لابويا المصنع تزوره وتعمله مفاجاة بمناسبة عيد جوازهم كنت ساعتها عندى 14 سنة . اول ما دخلت عليه اتفاجئت بيه بيحضن واحدة تانية. شافت بعينيها الراجل الى حبته واختارته يكون حبيبها وزوجها وابو ولادها بيخونها مع واحدة تانية اتصدمت صدمة كبيرة اوى ورجعت البيت وهى منهارة واتخانقوا مع بعض خناقة عمرى ما هنساها ولا هنسى كل كلمة اتقالت فيها وفى الاخر طلبت منه الطلاق . بابا ساعتها قرر يسيبها تهدى شوية مكنش يعرف ان الصدمة كانت اكبر من احتمالها وان زعلها هيقهرها لدرجة,,,,,,,,,

(وهنا دموع ريم خانتها وصوتها اتخنق مكنش صوتها قادر يطلع وماجد حس انه موجوع عشانها اوى)

ماجد: لدرجة ايه يا ريم؟؟؟ كملى

ريم: ماتت يا دكتور . ماتت من الخيانة خيانة جوزها ليها موتتها مستحملتش تشوف حب عمرها بتنصدم فيه بعد كل الحب ده وكل العمر ده . عمرى ما هنسى وانا داخلة اصحيها واقولها متزعليش يا ماما انا زعلانة من بابا عشان زعلك وهخاصمه ومش هكلمه تانى . حاولت اصحيها مكنتش عايزاها تبقى نايمة زعلانة ومكنتش عارفة انها خلاص مش هتصحى تانى . وانها خلاص راحت