لفت انتباه الجزء الأول بقلم امنية الريحاني
ورجع افتكر موقف حازم وازاى هو فعلا اضايق لما شافها معاه
ماجد فى نفسه: حتى دى نفذت الفكرة معايا بس الغريبة انى فعلا اضايقت لما شفتها معاه اضايقت لما حسيته هياخد مكان فى حياتها يعنى فعلا انا غيرت عليها يبقى دا معناه ايه بس. ياااه يا ريم اتارينى كنت بوجعك فى كل لحظة بتجاهل حبك فيها والاهم من ده انى كنت بحاول اتجاهل حبى ليكى الى اتولد فى قلبى من ناحيتك . بس لا المرة دى مش هسيبك تضيعى منى
تانى يوم ماجد راح النادى يدور على ريم عشان يعترفلها بمشاعره ناحيتها بس للاسف هو عارف انها بطلت تيجى النادى عشان متشوفوش وفى اثناء تدويره عليها قابل ندى وكان معاها حازم وطبعا اتغاظ لما شاف حازم بس تجاهله وكلم ندى
ماجد: صباح الخير يا انسة ندى
ندى: صباح النور يا دكتور
ماجد: ممكن اسالك على ريم هى مبتجيش النادى
ندى: لا يا دكتور ريم بطلت تيجى النادى خالص
ماجد بقلق: هى تعبانة ولا فيها حاجة؟
ندى حست بخوف ماجد على ريم وعرفت انه خلاص حس بيها وشافت فى عينيه الحب الى اتمنت لو ريم تبقى موجودة دلوقتى وتشوفه
ندى: هى كويسة بس الفترة الى فاتت كانت صعبة عليها شوية
ماجد: طب ممكن اطلب منك طلب يا انسة ندى ؟
ندى حست ان ماجد بيتعمد يتجاهل حازم عشان الموقف الى فات
ندى: اه طبعا يا دكتور اتفضل بس كنت الاول حابة اعرف حضرتك على ….
ماجد: حازم ابن عمك اتعرفنا قبل كده
ندى: اه بس الى حضرتك متعرفوش ان حازم كمان يبقى خطيبى
ماجد: ايه؟؟؟ بجد
حازم: ايوا بجد يا دكتور امال حضرتك كنت فاكر ايه
ماجد: لالا مفيش ……. مبروك الف مبروك
حازم: علفكرة يا دكتور ريم عمرها ما كانت بالنسبة لى اكتر من اخت
ماجد حرك راسه بالموافقة
حازم: وعلفكرة كمان ريم بنت ممتازة حاول متخسرهاش لانك مش هتلاقى واحدة تحبك زيها
ماجد: انا متشكر اوى يا حازم واسف على اى حاجة وحشة عملتها معاك بس انت اكيد مقدر موقفى
حازم اكيد
ندى: ها يا دكتور كنت عايزنى اساعد حضرتك فى ايه؟
فى بيت ريم:
ندى راحت عند ريم بس مقلتهاش انها قابلت ماجد
ندى: يا بنتى اسمعى كلامى وبلاش الحبسة الى انتى حبساها لنفسك دى تعالى نخرج نتمشى شوية
ريم: يا ندى قلتلك مليش مزاج اخرج خلينا قاعدين فى البيت
ندى: انا عايزة افهم عاجبك ايه فى قاعدة البيت ومن امتى اصلا وانتى بتحبى تقعدى فى البيت
