لفت انتباه الجزء الأول بقلم امنية الريحاني

ريم دموعها بتنزل من الفرحة ومش عارفة تتكلم

ماجد: مالك بس ياريم لزمتها ايه الدموع دى

ريم: حاسة انى بحلم يا ماجد مش مصدقة انك معايا دلوقتى وانت بنفسك الى بتقولى الكلام ده ماجد انا اكيد مش بحلم صح؟

ماجد: لا يا حبيبتى مش بتحلمى وعشان تتاكدى اتصلى بباكى حالا وحدديلى معاه ميعاد اجى اطلبك فيه منه

ندى بتيجى وبتقطع كلامهم

ندى: ها اظن انا عملت معاكم الصح ها ايه الاخبار يا ريم

ريم بصتلها بخجل وسكتت

ندى: طب تمام انا كده اطمنت ان الدنيا تمام ممكن بقى نروح

ماجد بص لريم: لا ما هو من هنا ورايح ريم مسؤلة منى انا الى هروحها

بتمر الايام وماجد فعلا بيروح بخطب ريم من باباها وبتبقى خطيبته رسمى وفى يوم وهما فى النادى ريم حاطة ايديها فى ايديه وماشية معاه والفرحة مش سايعاها . ماجد بيقابل سهى الى اول لما بتشوفه بتجرى عليه وطبعا ريم بتضايق جدا لما بتشوف كده

سهى: ماااااااجد ازيك وحشتنى كنت بدور عليك

ماجد بجمود: ازيك يا انسة سهى رجعتى امتى من السفر

سهى: من يومين واول ما رجعت دورت عليك

ماجد: خير فى حاجة نسيت اعرفك

ماجد بيحاوط ريم بدراعه: ريم خطيبتى

سهى: خطيبتك!

ريم: اه خطيبته فى حاجة؟ مين دى يا ماجد

ماجد: هفهمك بعدين يا حبيبتى

ماجد بص لسهى: امال فين خطيبك يا انسة سهى

سهى: خطيبى ! اه ….لا ما احنا فسخنا الخطوبة متفقناش

ماجد: زعلتينى والله ربنا يرزقك بالى احسن منه . عن اذنك عشان متاخرين

ماجد خد ريم ومشى وريم كانت على اخرها منه .راحوا قعدوا على تربيزة

ماجد: ايه يا حبيبتى مالك؟

ريم: مالى انت بجد بتسأل مالى ؟

ماجد: اه فهمت

ريم: ممكن اعرف مين الى سلمت علينا دى وقلبت وشها لما شافتنى معاك وبعدين شكلها واخد عليك اوى يعنى

ماجد: ريم ممكن تهدى عشان اعرف اشرحلك مين دى

ريم: متقوليش اهدى عشان انا مش ههدى غير لما اعرف مين دى

ماجد: وانا مش هعرف اتكلم معاكى وانتى متعصبة كده

ريم: ماشى يا ماجد ادينى هديت اتفضل فهمنى مين دى

ماجد: فاكرة اول ما اعترفتلك بحبى وسالتينى ايه الى كان بيخلينى ابعدك عنى الفترة الى فاتت رغم انى مشاعرى كانت ريحالك بكل ما فيها

ريم: اه فاكرة وانت ساعتها قولتلى هقولك بس مش دلوقتى

ماجد: انا دلوقتى هقولك السبب يا ريم . انا كنت بحب واحدة زمان وكنا متفقين على الجواز

ريم: كنت بتحب !!!

ماجد: اه يا ريم كنت بحبها وبحلم اكمل معاها بقية حياتى