لفت انتباه الجزء الأول بقلم امنية الريحاني
ريم: لا ما انا اكتشفت ان مش كل حاجة كنت بحبها طلعت صح
ندى فى نفسها: وبعدين فى دماغها الناشفة دى انزلها ازاى بقى …..اممممم… فكرة
ندى: علفكرة انتى صاحبة ندلة اوى لانك المفروض تكونى اول واحدة تقف معايا اليومين دول
ريم: اشمعنى
ندى: انتى عارفة ان جوازى انا وحازم قرب وناقصنى حاجات كتير اوى اجبها ومش لاقية حد ينزل معايا
ريم: حبيبتى يا ندى انا اسفة نسيت موضوع جوازك خالص حقك عليا خلاص يا ستى شوفى عايزة تنزلى تجيبى ايه وانا مستعدة
ندى: طب يالا قومى غيرى هدومك علشان نلحق المحلات قبل ما تقفل
ريم: حاضر عينيا
ندى: واسمعى ابقى اتشيكى على الاخر
ريم: نعم… اشمعنى
ندى بلخبطة: لا عشان نازلة مع عروسة وكده يعنى
ريم بتضحك: ماشى يا خفة
ندى وريم بينزلوا من البيت وندى بتودى ريم ناحية كافيه قريب من البيت
ريم: استنى هنا انتى موديانا فين مش بتقولى عايزة تلحقى المحلات قبل ما تقفل
ندى: اصبرى على رزقك بس ثوانى وهتفهمى…… اهو وصل الحمد لله
ريم بتبص وراها عشان تشوف ندى بتتكلم على مين : هو مين الى …
بتتفاجأ ريم بماجد وراها
ريم: بقى كده يا ندى عشان كده كنتى مصممة انى انزل معاكى انا غلطانة انى سمعت كلامك
ماجد: ريم عشان خاطرى متمشيش غير لما تسمعينى الاول انا استعنت بانسة ندى لانك مكنتيش بتردى على موبايلك ومبقتيش تنزلى النادى ودى كانت الطريقة الوحيدة الى اوصلك بيها
ريم بتبص بغيظ لندى
ندى: ايه بتبصيلى كده ليه. اسمعيه الاول وبعدين بصيلى براحتك انا هروح اشترى حاجات من جنبكم هنا وارجعلك بعد شوية تكونوا اتكلمتم
ندى بتسيبهم وبتمشى واقفين ادام الكافيه
ريم: خير يا دكتور حضرتك عايز تكلمنى فى ايه؟
ماجد: طب مش ندخل الاول جوا نشرب حاجة وبعدين نتكلم
ريم: اسفة انا مبقعدش فى كافيهات مع حد
ماجد: وكمان الوقفة دى شكلها مش حلو
ريم بصتله بعدم رضا
ماجد: هما كلمتين مفيش غيرهم هقولهم وبعدين امشى
ريم: ماشى
بيدخل ماجد وريم الكافيه يتكلموا
ريم: خير يا دكتور
ماجد: ريم انا اسف
ريم: اسف على ايه يا دكتور ما حضرتك اتاسفتلى قبل كده على الكلام الى قولته وانا قولتلك محصلش حاجة فى ايه تانى
ماجد: انا مش قصدى اسف على الكلام الى قولته
ريم بصتله بعدم استفهام: امال اسف على ايه؟
ماجد: اسف انى مكنتش حاسس بيكى طول الفترة الى فاتت دى . انا عارف انك طول الوقت كنتى بتحاولى توصليلى مشاعرك وحبك بس للاسف انا كنت اعمى مش واخد بالى
