وصية صفية الجزء الثاني بقلم منال ام إبراهيم

– اجابت بقلق: ليه بس يا احمد ?

– عشان حضرتك عندك إمتحانات وانا مش عايز اعطلك ولا عايز حد يقول إن وشي وحش عليكي …ممكن كل فترة كده اتصل اطمن عليكي بس

– اجابت بخجل: مين قالك بس انك كده حتعطلني … بالعكس ده أنا نفسي حتتفتح على المذاكرة من هنا ورايح

– اجاب بمزاح: آه يا منحرفة وأنا اللي كنت فاكرك مؤدبة…وفاكر نفسي حاعطلك …خلاص بقى انتي حرة… بس انا على فكرة الفترة الجاية دي حاكون مشغول في تحضير عش الزوجية

– ما احنا لسه ادامنا سنة يا احمد تقدر تجهز فيها براحتك

– سنة مين يا ماما… مين قالك إني حاقدر استنى سنة بحالها …أنا اول ما اجهز الشقة اللي حنتجوز فيها حاكلم خالي وعلي عشان نتجوز علطول

– طيب والكلية بتاعتي يا احمد

– ماتقلقيش حافهمك كل حاجة فوقتها

شعور السعادة الذي كان يشعر به كل من احمد ولبنى كان اكبر من ان تصفه أو تعبر عنه أي كلمات… بينما وعلى بعد أمتار قليلة كان هناك حديث اخر يدور بين علي ونورا ولكن من نوع خاص

علي: ممكن افهم انتي بتعيطي ليه دلوقتي?

نورا من بين دموعها: يعني مش عارف ولا مش شايف ان فيه حاجة تستحق إني اعيط

– أنا فعلا مش شايف حاجة تستدعي كل اللي بتعمليه ده

– معلش اصلك ماكنتش شايف شكلي كان وحش ازاي وانت سايبني وواقف تتكلم مع نادية … وكمان ماسمعتش سامح قالي إيه وهو ماشي

– قالك إيه البني ادم ده …وانتي اصلا تتكلمي معاه ليه?

– مش انت اللي اديتله فرصة انه ييجي ويتكلم معايا …وبعدين انت زعلان اوي كده ليه ? ما انت كنت واقف تتكلم مع مراته مافكرتش إنه هو كمان يكون اضايق منك وحب يردهالك

شعر علي بأنها محقة في كلامها فتوقف عن مجادلتها واخرج من جيبه محرما ورقيا ومد يده لها به وقال بهدوء:
– طيب اتفضلي امسحي دموعك دي… ولو سمحتي مش عايز اشوف دموعك دي تاني …وعموما يا ستي أنا اسف وماتزعليش مني

طال صمتها دون ان تجيبه فاردف هو قائلا:
– انتي مش بتردي عليا ليه?

– بصراحة خايفة اقولك إني مش زعلانة خلاص تقوم انت تزعل إني مازعلتش وتفتكرني ماعنديش إحساس بجد

اطلق علي ضحكة مدوية ثم توقف فجأة ومال بجسده نحوها قائلا:
– انتي لسه فاكرة… ده انتي باين عليكي قلبك أسود اوي

ابتسمت نورا وهي تمسح دموعهابذلك المنديل الذي اعطاها إياه فاستطرد علي قائلا بمكر:
– بمناسبة المنديل صحيح…هو الدم كان فين بقى بالظبط ?