وصية صفية الجزء الثاني بقلم منال ام إبراهيم
احتضنتها لبنى وقالت والسعادة تشع من كلماتها :
-الله يبارك فيكي يا حبيبتي
فعلت نفس الشئ مع لمياء التي هنأتها بدورها ثم التفتت إلى علي قائلة:
– بالحق يا علي بمناسبة صلاة الإستخارة …هو انت صليت إستخارة عشان موضوع خطوبتك على نورا ?
تعلقت جميع العيون به في إنتظار إجابة سؤالها …ظل صامتا لفترة قبل ان يقول : ايوه …صليتها امبارح لما كنت قاعد فاوضتي طول النهار
– لمياء بفضول: وبعدين يا علي…شوفت إيه?
– ماشوفتش حاجة… ومش شرط اصلا إني أشوف حاجة
– لمياء: طيب ماتزعلش نفسك… نخليها حسيت بإيه
تنهد علي طويلا قبل أن يجيب قائلا:
– مش عارف… بس حاسس إني عايز اجرب… عشان كده يا لبنى مش عايزك تقولي حاجة لنورهان من الكلام اللي ماما قالته
شعرت بالغضب من كلماته فالتفتت إليه قائلة:
– عايز تجرب فبنت أختي يا علي
لم يستطع تمالك أعصابه فقام من مكانه صارخا بإنفعال واضح:
– يا ماما مش معقول كده…كل حاجة بنت اختك بنت اختك…وأنا ابنك فين …ليه مش حاسة بيا خالص كده?
اتجه نحو الباب مغادرا إلى عمله فصاحت به لبنى:
– طيب مش حتفطر الأول قبل ما تمشي?
أجاب قبل ان يغلق الباب خلفه:
– مش عايز حاجة
انتهى الأسبوع دون جديد سوى أن نادية قد قطعت رحلة شرم الشيخ وعادت إلى القاهرة بعد شجارها مع سامح …ومنذعودتها وقد لزمت غرفتها لا تغادرها إلا للضرورة القصوى …وقد لاحظت نورا ماهي عليه من الضيق والشرود أحيانا والحزن احيانا أخرى فحاولت كثيرا أن تعلم ماحل بها…إلا أن نادية لم تكن ابدا من ذلك النوع الذي يحب أن يفضي بمكنوناته ولم يكن من السهل على نورا ابدا سبر أغوارها لتعلم مابها…وفي أحد الأيام كانت جالسة بغرفتها تسترجع احداث ذلك اليوم حين ذهبت إلى الجامعة لمرة واحدة بعد عودتها حتى تلتقي سامح وتحاول معه مرة أخري…تذكرت حين اقتربت منه فوجدته يقف ما صديقه تامر
” فلاش باك ”
نادية: سامح لو سمحت عايزاك فكلمتين
سامح بلا مبالاة: خير يا نادية عايزة حاجة
نظرت نادية إلى تامر ثم عاودت النظر إليه قائلة:
– ممكن نتكلم شوية لوحدنا?
– تامر صاحبي مش غريب
شعر تامر بالحرج فاستأذن قائلا:
– طيب استأذن أنا يا جماعة… سامح أنا مستنيك فالكافيتيريا لحد ما تخلص
– ماشي يا تامورة
غادر تامر فالتفت سامح إلى نادية قائلا وقد عقد ذراعيه أمام صدره:
– عايزة إيه يا نادية?
