هويت رجل الصعيد الجزء الاول نور زيزو

-اللى هى مين أختك؟ وبعدين أنتِ بتتحشرى فى اللى ميخصكيش ليه مش ملاحظة أنك بتتحشرى بين راجل ومراته

وقفت “حورية” تثير أستفزازها اكثر وهى تقول:-

-وأنتِ بجى مرته صوح يا عهد ولا بالاسم كدة

لم تتمالك “عهد” غضبها أكثر فصاحت بانفعال وعقدت حاجبها قائلة:-

-مالكيش فيه وبعدين لتكونى فاكرة أن نوح هيفكر يبص لأختك المعفنة دى، الراجل يا حبيبتى مبيبصش للى مدلوقة عليه وأنتِ أختك متتوصاش فى الدلقة، وأخر مرة يا حورية إياكِ تتدخلى فى حياتى أنا أو جوزى

أستدارت “عهد” لكى تغادر لكن أستوقفها صوت “أسماء” الواقفة على باب المطبخ بعد أن سمعت حديثهما وإهانة “عهد” لها فقالت:-

-بكرة تشوفى يا عهد نوح هيبص لي ولا لا ما هو الراجل برضو مبيبصش للمرة اللى تهمله وتطلعه من داره من غير فطار مثلًا

أتسعت عينيها على مصراعيها بغضب وهذه الفتاة تخبرها بأنها ستأخذ زوجها منها لتشعر بأختناق فى صدرها وغيرة تلتهم قلبها وتذكرت حديثهما صباحًا عندما أخبرها بأن ستزوج من أخرى وذهابه إلى “أسماء” فغادرت المنزل غاضبة بقلب مُرتجف خوفًا من أن تفقده إلى أخرى….

وقفت “حورية” خلف أختها وقالت بمكر:-

-جدعة يا خيتى ولو جمدتى جلبك هبابة كمان هتجدرى تأخدى نوح منها

تمتمت “أسماء” بغضب كامن بداخلها وحبها يشتعل لهيبه بقلبها قائلة:-

-عندك حج يا حورية أنا لازم أحرب عشان جلبى وحُبي ومستسلمة واصل لحد ما نوح يكون جوزى، هى مش أحسن منى فى حاجة

اربتت “حورية” علي كتفها بحماس وقالت بمكر تبخ سمها فى أذنها:-

-جدعة يا خيتى، هى مش أحسن منك أبدًا ومفهاش حاجة تحليها عندك، أنتِ بس لازم تديها على رأسها عشان تخاف منك…

_____________________

خرج “على” من الجامع مُتكأ على عكازه الخشبي ويسير مع صديقه فقال بجدية:-

-خلى ولدك يوزع الورث بالحج يا على عشان حمدي مهيسكتش أمبارح ضربه بالنار وربك سترها ومتعرفش المرة الجاية هيعمل أيه؟

تنهد “على” تنهيدة معبأة بالخبيات واليأس ثم قال:-

-نوح مهيرضش يديله المال الحلال عشان يغرجه فى الحرام ويكبر الحلال بالحرام

أربت صديقه على كتفه بخفة ثم قال بتحذير:-

-أتحدد وياه، نوح هيسمع منك يا على ولدك طيب وعلى طول فى حاله

نظر “على” إليه بضجر ثم قال:-

-طيب!! نوح مهيسمعش من حد وراسه ناشفة، نوح ما هيوزعش الأرض والمحاجر، ولدى فى حاله لكن اللى يجرب من حاله دا بيأكله بأسنانه ويولع فيه، أنا جلجان جوى عليه وعلى حبايبه ربك يسترها