رواية لولا الغرام الفصل الأول بقلم روز أمين
-مساء الفل على ست قلبي وست الناس
إبتسامة خجولة ملأت وجه تلك السيدة البسبطة التي تحدثت بابتسامة هادئة:
-ربنا يحظك يا “رشيد” يا ابني، ويسعدك ويفرح قلبك يا حبيبي، واشوفك أعلى الناس وأحسنهم يارب
احتضنها مدللاً إياها بكلماته المعسولة:
-ويخليكِ ليا يا سمسم يا قمر انتِ
صدحت ضحكتها متمتمة بحياءٍ تربت عليه:
-يا واد اختشي لابوك يطلع من الحمام وانتَ بتقولي كدا
قهقه عاليًا وهو يدللها:
-طب يطلع بس الحاج، وأنا أعلمه الدلع على أصوله بيبقى ازاي
-انتِ جيت يا “رشيد”
إلتفت ناحية الصوت ليرى والده يجفف ذراعيه بالمنشفة، أقبل عليه ليقبل كتفه احترامًا وإجلالاً،ليربت الرجل على رأسه متمتمًا بخفوت:
-يلا اتوضى بسرعة وتعالى نصلي العصر سوا، على ما أمك تغرف الأكل
أومأ له وبعد قليل كانوا يجتمعون حول طاولة الطعام،بدأت الأم بسكب شوربة”العدس”ثم تطلعت إلى نجلها وهي تقول:
-هات طبقك يا “رشيد” علشان أغرف لك.
ناولها صحنه وابتسامة رضا فوق ثغره،ما أن تناول إحدى اللُقيمات المنغمسة بهذا الحساء الثقيل حتى أغمض عينيه وهو يتذوق باستمتاعٍ ظهر على ملامحه ليتمتم:
-ياسلام على العدس من أديكي يا ست الكل،احلى واحدة تعمل عدس في مصر كلها،تسلم إيدك وعيونك.
تبرمت”بسمة”بدعابة:
-بلاش وحياتك تُشكر في العدس أوي كدا،حاكم ماما اللي يشكر في أكلة من اكلاتها، تمسك فيها اسبوع بحاله على ما تنقل على غيرها
تعالت القهقهات بينما لامتها والدتها:
-ماله العدس يا بت، فضل ونعمة ربنا يديمها علينا
مازحها “كريم” وهو يلوك لقمته:
-بلاش الدعوة دي أبوس إيدك،العملية مش ناقصة نافخة قولون
وتابع وهو يُشير لشقيقه:
-ناولني بصلاية خضرا من اللي قدامك دي يا “رشيد”
تدخل والده ليجاريهم في الحوار قائلاً بفخر:
– العدس اللي مش عاجبك دا بيصنع رجالة،وياما خرج وحوش تقرقش الزلط من الجيش
داعب والده بفكاهة أدخلت الجميع في نوبة من الضحك :
-وهو انا علشان ربنا كرمني وأخدت إعفا من الجيش، تقوم تجيبهولي لحد عندي يا حاج؟.
تحدثت والدته بلومٍ:
-لو مش عاجبك العدس شخلل جيبك وأنا أعمل لك المحمر والمشمر،قال على رأي المثل،اطبخي يا جارية كلف يا سيدي
رفع كتفيه بقلة حيلة وتمتم:
-منين بس يا حاجة،ما كل حاجة على يدك، دانا حتة محاسب غلبان في شركة فكسانة،اللي جاي يدوب على قد المواصلات والقهوة والشاي،واللي بيفيض يدوب ملاليم، بساعد بيها هنا
