نفوس قاسية الجزء الخامس
لوى لطيف فمه بسخرية وقال متهكمًا وقد أهمل حالة آدم كُليًا:
– يعني تعرف اللي خطفها وساكت كل دا.
كاد آدم أن يطيح بخاله ولكن مازن أسرع يبعده عنه وهو ينادي على هايدي أن تحضر أى شيء ليوقف نزيف يد آدم ثم قال موجها حديثه لـ لطيف:
– البني آدم اللي فالفيديو سبق له وأذى سهر من كام سنة.
ارتفع رنين هاتف آدم فصمت مازن فنظر آدم إلى الرقم بارتباك وهو يرفع عيناه إلى لطيف ليخرجه من ارتباكه صوت هايدي تطلب منه أن يذهب معها لتعالج يده فابتعد عن لطيف وأجاب على الاتصال وقال:
– أتأخرت ليه يا زفت.
أجابه الآخر وقال باضطراب:
– أنا برا بس لمحته عندك فخايف بصراحة أدخل.
ضحك آدم بسخرية وقال:
– حلال فيك تدخل علشان يضربك رصاصة يخلصنا منك ويعرف إن ابنه فاشل أدخل يا يسري أنا مستنيك.
لمح آدم وجه هايدي المصدوم فقال:
– اقفلي بوقك يا هايدي مالك اتصدمتي كده ليه علشان مش قابل مساعدة خالي وبكلم ابنه عادي.
طرقع آدم بأصابعه أمام وجه هايدي وأكمل حديثه:
– انجزي يا هايدي خليني أشوف البيه عرف مكان فؤاد ولا أنا اللي هضربه رصاصه واخلص.
عاد آدم ليجد لطيف يحدق بوجه ابنه وقد علت ملامحه غضب أسود فضحك بسخرية وجذب يسري إليه وقال:
– عرفت مكانه.
نكس يسري رأسه ففاجأه آدم ولكمه في وجهه فاندفع يسري باتجاه ابيه وقال بعصبية:
– دي مش رجولة يا آدم بتاخدني على خوانة عموما أنا غلطان أني جيت ولعلمك اللي أنت كلفتني أجيبه دا عامل زي المخاوي كل لحظة يغير مكانه ويختفي ويظهر فمكان غيره ومن الفجر مكنش له أي أثر فأي مكان، حتى تليفونه سابه علشان محدش يقدر يتتبع مكانه منه بني أدم حويط ومش سهل أبدا مش ذنبي بقى أنا بشتغل لوحدي وعمومًا أنا بردوا هعرف مكانه زي ما كنت بعرف قبل كده.
صرخ آدم بألم وقال:
– يعني إيه الكلام دا كده خلاص يعني هفضل مستني لما توصل له ولا لما أبوك يقول لي على مكانه وأنا واقف عاجز كده وسطكم يبقى أنا مستحقش أكون راجل من أساسه أنا هعرف اجيبها بنفسي.
جذبه هاني من يده وقال له محاولا تهدئه انفعاله:
– آدم أهدى الكل بيعمل اللي عليه وبعدين دا مش وقت ندية ومين يكسب دا وقت اللي يقدر يساعد يساعد احنا كلنا دلوقتي فمركب واحد والهدف واحد للكل حاول تتمالك أعصابك علشان نفكر كلنا صح واحنا دلوقتي لازم كلنا نتقمص شخصية فؤاد علشان نعرف بيفكر أزاي ونحاول نوصل له.
