نفوس قاسية الجزء الخامس
ما أن وصل مازن إلى مكتبه حتى سمع رنين هاتفه فنظر إلى رقم هايدي وأجاب سريعا فوصل لأذنه صياحها وهي تقول:
– كنت فين يا مازن ليا نص ساعة بتصل بيك أول مرة يعني متردش على طول.
أجابها مازن وهو يحاول تهدئتها وقال:
– مافيش كنت فمكتب آدم بشوف السكرتيرة الجديدة اللي بعتها.
صاحت هايدي بصوت صاخب:
– نعم بتشوف مين السكرتيرة الجديدة وأنت تشوفها بصفتك أيه يا مازن جرا أيه يا مازن أنت بتلعب بديلك من ورايا.
أسرع مازن يحاول إصلاح الأمر وقال:
– أبدًا صدقيني وحياتك عندي ما بلعب بديلي أنا أصلًا معنديش ديل ألعب بيه، كل ما هنالك أنا روحت أشوفها بتعمل أيه فالشغل أنا أساسًا مش مرتاح لها ومش عارف آدم مصمم يشغلها مكان منال ليه وموصى عليها جامد أوي، دا غير أني سمعت أنه جاب لها شقة تقعد فيها.
هتفت هايدي بعدم تصديق:
– أيه الكلام اللي بتقوله دا يا مازن مستحيل آدم يعمل كده يجيب لمين شقة أنت فاهم كلامك دا معناه إيه دا لو سهر عرفت هتولع الدنيا حواليه.
زفر مازن بضيق وقال:
– هانت أهو قرب يجي ونبقى نفهم منه المهم أنتِ كنتي بتتصلي ليه.
أجابته هايدي وقالت:
– لا مافيش أنا كنت بطمن عليك أنا هقفل بقى أحسن آدم بيعيط سلام.
نظر مازن إلى هاتفه متعجبًا وقال لنفسه:
– عايش مع واحدة مجنونة بحالات أنا مش عارف هلاقيها منين ولا منين.
انهت هايدي حديثها مع مازن لتنظر إلى وجه ابنها وقالت:
– الموضوع دا مش مطمني ابوك شكله كده بيفكر يخوني أنا لازم اشوف السكرتيرة دي ودلوقتي.
وصلت هايدي إلى شركة آدم وحاولت تمالك أعصابها وما أن وصلت إلى مكتبه آدم حتى دفعت الباب بحدة، وحدقت بوجه تلك الجالسة على المكتب وصاحت بصوت رافض وجودها:
– داليا أنتِ أيه اللي جابك هنا.
ارتبكت داليا ونظرت باتجاه هايدي وعبست وزفرت بحدة وقالت:
– مش هنخلص بقى من الموضوع دا.
صاحت بها هايدي وقالت بغضب:
– أنتِ بتقولي أيه ما تسمعيني صوتك.
أجابتها داليا ببرود:
– مقولتش حاجة بقول أن ادم جابني اشتغل فالمكتب بدل منال عادي يعني زي ما سمعت أنك اتجوزتي مازن عادي بردوا.
اقتربت هايدي منها بغضب وقالت:
– وزي ما هطردك من هنا عادي بردوا يا داليا لأنك استحالة تقعدي فالشركة دي ساعة واحدة زيادة عن كده اتفضلي لمي حاجتك واطلعي برا.
أشاحت داليا بوجهها عن هايدي وقالت:
– حضرتك ملكيش أي صفة هنا علشان تطرديني أنا هنا بأمر من صاحب الشركة نفسه فلو سمحتي هو مانع حد غريب يدخل المكتب فغيابه هبقا اخدلك ميعاد منه لما يجي الأسبوع الجاي.
