حمل بالتراضي الجزء الثالث بقلم رانيا
_ فانا بقى قولتله ان انت تروحلة بكرة وتربط معاه كلام
_ چوري تعالي هنا متبعديش …طيب يا امي هاخد بكرة العربية بالحمار واروح اجيبلك اللي انتي عايزاه
_ واني هشيع عمك متولي يملى عربيتين كمان ويجيبهم خلي الارض تبقى حلوة كدة وزرعها يطرح…الحق بنتك يا احمد سحفت وراحة ناحية الترعة
قومت اجري ورا اللي مبتريحش دي تبقى قاعدة في حجري وفي لحظة القيها بتسحف بايديها ورجليها وكأنها بتسابق نفسها…لو سيرين جت وشافتها هدومها كلها تراب كدة هتقلب الدنيا ومحاضرة من هنا لبكرة
_ تعالي هنا رايحة فين امك تيجي ترمينا في الترعة سوا بمنظرك دة
شيلتها وقربت لقيت امي بتضحك عليها واخدتها من ايدي تنفضلها هدومها من الترابة اللي عليها
_ انتي يا بت انتي طالعة لأبوكي وهو صغير مكنش يقعد في حتة كدة برضة
_ هاتيها يا امي هاتيها اعدلها هدومها دي احسن سيرين لو شافتها كدة مش هيكفيها محاضرة من هنا للمغرب
لقيتها جايه خارجة من البيت وهي بتعدل طرحتها على دماغها
_ هاتيها يا امي هاتيها …اهي جت اهي
_ ايه يا ماما مش هنتغدا
_ خلصتوا الغدا يا ضنايا
_ ايوا انا طفيت عليه اهو وريم بتعمل السلطة
قامت وقفت
_ طيب هقوم الحق العصر تكون ريم خلصت وتكونوا حطيتوا الغدا
قعدت مكانها جنبهم في الهوا واخدت البنت من ايدة لقيت ايديها كلها تراب وهدومها
يا دي النيله انا عارف هي هتقول ايه …ايه يا احمد دة …بذمتك دة منظر
_ ايه يا احمد دة … بذمتك دة منظر…يعني اسيب البنت معاك نص ساعة ارجع القيها كدة
_ ولا كلمة الله يخليكي انا مصدع لواحدي …هقوم انا اغيرلها هدومها واخلص
_ شكرا مش عايزة منك حاجه…هقوم انا احميها و اغيرلها
وفعلا اخدت البنت ودخلت…ابتسمت الحمد لله هربت من محاضره النهاردة عن كيفية الحفاظ على الست چوري وملابسها من التراب ..فردت جسمي على الحصيرة في الهوا الجميل دة مع ريحة الزرع اللي رايحه وجاية تشفي العليل دي وتريح التعبان
حطيت ايدي تحت دماغي و غمضت عيني اهو الواحد يقيل شوية على ما يحضروا الغدا ..اتغدا واخد عربية عم متولي بالحمار اروح اجيبلها اللي هي عايزاة وبعدين ….
قطع حبل افكاري وترتيبي وانا مغمض عيني الصوت الغريب عن لهجة البلد دة
_ سلام عليكم…من فضلك متعرفش ازاي اوصل لمنزل السيدة سيرين بهجت كامل؟
