حمل بالتراضي الجزء الثالث بقلم رانيا
_ بتعملي ايه .. مش قولت ميت مرة متوطيش وانتي بطنك قدامك كدة هو انتي ناقصة
_ أولا متزعقش انا بكرة العصبيه .. وبعدين انا معملتش حاجة… غيرت ملاية السرير بس وكنت هنفض السجادة حاسة عليها تراب
اخدني من ايدي وقعدني عالسرير
_ تقعدي هنا ومتتحركيش من مكانك ماشي
وطى هو وظبط السجادة بعد ما نضفها … كل دة بعد ما خلص الغسيل ونشره وطبعا مسيبتوش الا لما ظبط الحمام وغسلة اومال يغني هيسبهولي كلة ميا
خلص وهو بينهج … حاسة اني هديت حيلة شويه.. احسن عشان يبقى يعرف يشتغل مع علا تاني بقى…
_ اااه … اهو الغسيل اتنشر والحمام اتغسل والاوضة تمام
قعد جنبي وفرض جسمة بارهاق واتكلم وهو ماسك تليفونه
_ قوليلي بقى عايزة تاكلي ايه عشان ميعاد دواكي قرب
حطيت ايدي على بطني
_ لأ انا مش عايزة أكل من برة… انا وابنك عايزين ناكل اكل من البيت هنا
قام فاجأة واتعدل وزعق
_ وانا اجيب لسيادتك والزفت ابني أكل بيتي منين دلوقتي
_ أولا مسموش الزفت … وبعدين منين؟… انت اللي هتطبخ… على فكرة اكلك واحشني قوي
بصلي شوية وكأنة هيخنقني وفاجأة بص في ساعتة وقالي
_ دواكي كدة هيتأخر … نطلب اي حاجه دلوقتي وبعدين ابقى اطبخلك
_ وانا مش هاكل أكل من برة بقيت بتقرف منه.
بصلي تاني وكانة بيحاول ميتعصبش عليا وبص في ساعتة تاني بعدين قام بسرعة و دخل المطبخ
……………………..
كنت قاعده قدام التليفزيون بتسلى هو شغلي فيلم كرتون عارف اني بحبة وقالي اقعد قدامة متحركش على ما الاكل يجهز .. فاجأة حسيت اني عندي الم في ضهري من القاعدة قومت اتمشى شوية في الشقة رايح جاي …
المرادي زودت في خطواتي لحد المطبخ لقيتة لابس مريلة الطبخ بتاعتي وبيقطع في بصل ومغمض عين ومفتح عين من حرارة البصل..طب اعمل ايه ياعالم بحبة والله بحبة حتى وهو غلبان كدة … سمعت فاجأة صوت تليفونة بيرن .. رن كتير النهاردة بسبب الشغل اللي منزلوش … سمعت صوت السكينة وهو بيسيبها ويحطها عالمطبخ عشان يرد
_ ايوا يا طارق … يا طارق بقولك مش عايز اي محامي .. انا عايز المحامي دة بالذات بالاسم اللي قولتهولك
_ وانت مالك يا ابني في افضل منه ولا مفيش … انا عايز دة .. تكون واخد منة ميعاد.. عايز اشوفة في مكتبي بكرة او بعده بالكتير .
محامي !!! محامي مين دة اللي عايزه بالاسم… معقولة يكون موضوع لية علاقة بقضية شريف والست علا بتاعتة؟!!
