حمل بالتراضي الجزء الثالث بقلم رانيا

_ متلبس حاجة بدل ماانت كدة..تاخد برد

لقيتة ابتسم زيادة وهو بيقسملي شعري اتنين عشان يعملي في كل جهه ديل حصان .. هو قالي قبل كدة انه بيحب شكلي بيهم مع بطني الكبيرة بيبقى شكلي قريب لقلبة … اووف ياته وجع في قلبه ..

_ اعملك ايه .. هدومك اكيد مش هتناسبني

هاهاها ظريف قوي حضرتة!!

كمل وهو بيبتسم اكتر وهو مركز قوي في اللي بيعملة

_ هبعت حد دلوقتي يجبلي حاجات من الشقه

التفت فاجأة

_ ايه!!! هتدخل حد غريب على شقتنا وفي اوضة نومنا؟!

لقيتة ضحك وعدل راسي و رد وهو بيكمل ربط ديل الفرس اللي عاليمين

_ متخافيش كلمت رباب وقولتلها تجهز شنطة فيها هدوم ليا مؤقتة و كمان باقي علاجك اللي هناك و اللي هيروح ياخد الحاجة هيجيبها معاه

_ هي مين دي اللي هيجبها معاه
_ رباب
_ بس انا مش عايزة حد
_ لازم تيجي انتي هتحتاجيها الايام اللي جايه

_ وانا قولتلك مش عايزة حد معايا ولو انت كمان روحت شقتك يبقى كتر خيرك

عدل راسي بغيظ قدام المرايا وكمل ربط شعري من الناحية التانيه

_ خلاص بلاش اجيب زفتة … يبقى انا وانتي بس

سكت شوية وانا بلعب بصوابعي وهو لسه مركز و كل شوية يفك الناحية التانيه بعد ما يربطها ويحاول يقيس بايدة .. اووف عرفاه موسوس لازم يكون ديل الفرسين قصاد بعض بالظبط مفيش واحد عالي عن التاني

_ على فكرة بقى هي مش هتعرف تجيبلك هدومك .. عشان محدش يعرف حاجتك ..غيري

_ ايواااا اهو كدة شكلهم مظبوط و زي ال…

قال كدة وهو اخيرا راضي عن شكل شعري بعد ما خلص وفاجأة سكت وابتسم وكانه لسه سامعني دلوقتي وبعدين وطى على ودني

_ لية بقى ان شاء الله عاملة الدولاب بباسورد

_ انا مبهزرش .. محدش بيلمس هدومك من الدولاب غيري

مش عارفه ليه اتعصبت بجد .. بس فعلا محدش كان بيلمس حاجتة في دولابه غيري الا لما تعبت وجاب رباب لقيتها بدأت تعمل كل حاجة في البيت حتى غسيل الهدوم … و رسها في الدولاب لكن وقتها كنت بضايق لحد مافهمتها وانا متنرفزة ان هدوم احمد انا اللي هعملها وهي متلمسهاش … انا عارفه ان غيرتي علية صعبة و بموت بجد كل ما احس ان حد قرب منه غيري وعشان كدة مش ممكن اسامحة على قربة من علا دي ولا تعاملة معاها حتى لو كان شغل زي ما بيقول

لقيتة لسه بيبصلي في المرايا وبعدين قرب شفايفة وباسني على خدي وبعدين لقيتة زودها .. ايه هو سكتنالة دخل بحمارة … لقيتة بيقرب زيادة زقيتة بايدي براحة وقومت