حمل بالتراضي الجزء الثالث بقلم رانيا

ابتسمت بضحك وميلت تفرد جسمها تاني

قربت منها اقفل زراير اللبس التقيل بتاعها واحكم عليها الغطا كويس … بعدين بصيت على البنت ورجعت بصيت عليها واخيرا فردت جسمي جنبها … والله حتى ما قادر اقوم اخد دش واغير هدومي من سهر وتعب الايام اللي فاتت

حطيت دراعي تحت دماغي وغمضت عيني ولحظات وحسيت باللي بتقرب وبتحط راسها على صدري

فتحت عيني لقيتها ارتاحت كدة وغمضت عنيها تاني بنوم

احتويتها لصدري بدراعي اكتر ولحظة ولقيتها بتهمس

_ احمد..

_ نعم

لقيتها رفعت وشها تبصلي بابتسامة بقالي كتير مشوفتهاش متوجة ليا منها

_ انا مبسوطة قوي …بقى عندي بيبي منك على فكرة بقى هي شبهك قوي

ضمتها ليا اكتر وانا داخل لقلبي سعادة متتوصفش في اللحظة دي

_ يعني مش فرحانة وسعيدة بس عشان بقيتي اخيرا أم؟

حركت صوباعها على صدري وهي بتتكلم براحة عشان البنت متصحاش
_ توتو….سعادتي وفرحتي مضاعفة عشان الطفلة دي من الراجل الوحيد اللي في قلبي…انا بحبك قوي يا احمد خصوصا بعد ما عرفت من ريم وماما انك كنت بتحاول تعمل كل دة مع علا علشاني .. مش حب في قربها

اتضايقت وظهر عبوس فاجأة على وشي..

_ كان نفسي كل اللي خطتلة ينجح واقدر ارجعلك حقك اللي سرقوة منك بس مش عارف ازاي كل حاجة باظت في اخر لحظة

_ يا احمد انا مش زعلانة انا ربنا عوضني بيك هما اللي كانوا اغبية وفاهمين الدنيا بسطحية …الدنيا مش شوية فلوس نعيش بس عشان نكبرهم ونراقبهم بقوا كام ووصلوا قد اية دلوقتي…

لقيتها حطت راسها على صدري تاني وضمتني بايديها الصغيرة دي اكتر وعلى وشها ابتسامة نبرة الرضا فيها وصلة من ودني لقلبي والله

_ حضن واحد بس منك…في ضمة بين دراعتك في ان بنتي اللي هي حتة منك بقت بخير ونايمة جنبنا دلوقتي…في احساسي دلوقتي ان ربنا راضي عني قوي كدة عشان يعوضني العوض اللي مكنتش بس احلم بية دة.

بعدين رفعتلي وشها وكملت

_ انا كنت بدعي ربنا يرزقني بطفل ونس ليا في وحدتي لقيتة اداني كل دة

بصتلها شوية وانا مش عارف هحبها اية تاني اكتر من كدة انحنيت ابوس راسها واضمها اكتر ليا وانا من جوايا بحمد ربنا على سلامتهم ووجودهم وانهم بخير ومعايا دلوقتي.

…………………………….

اول ما چوري بدأت تتحسن وتتحمل السفر احمد اصر نيجي هنا نزور اخواته ومامته ونطمن طبعا على مريم ومولودها ونقعد فترة بعيد عن كل الدوشة اللي مرينا بيها في القاهرة
لقينا مامتة مأجلة سبوع مريم عشان تعمل سبوعنا مع بعض …انا اصلا كنت نسيت ان فيه حاجة اسمها كدة لازم تتعمل …مش معايا حد يفكرني ولا يقولي حتى احمد من الدوشة واللي كان فية معانا مكلمنيش في حاجة زي كدة خالص …
لقيت ريم بنخبط على اوضتي … كنت قاعدة بغير لچوري عشان ابدل هدومي انا كمان وانزل واول ما سمعت الباب قومت فتحت