حمل بالتراضي الجزء الثالث بقلم رانيا
قربت بشفايفي ابوسها تاني وانا جوايا فرحة الدنيا كلها….لقيت فاجأة ايديها الصغيرة على وشي بعدت لقيتها صحيت وبتحرك ايديها ورجليها بقريفة ولسة مغمضة عنيها الصغيرة قوي دي … ابتسمت اول ما سمعت صوتها و زن عياطها قومت اتحرك بيها في الأوضة وعلى وشي اجمل واصفى ابتسامة شكلها كدة مش هتطلع غير ليها بعد كدة
قربت احطها في سريرها واغيرلها عشان تنام وهي مرتاحة
خرجت من الحمام وانا بنشف شعري… طبعا خرجت بسرعة جدا المرادي عشانها حاسة انها المفروض متغبش عني لحظة واحدة بس … قربت لقيت اللي واقف وابتسامتة مليا وشة وهو بحاول ينيمها في سريرها …انا بحب ابتسامة احمد لأ انا بحب احمد كلة على بعضة بس دلوقتي حبيت الابتسامه دي وصاحبها اكتر
_ نامت..
التفت يبصلي وكانه اتفاجأ اني معاه في الاوضة دلوقتي
_ لسة حالا…بعد ما شبعت زن بسبب انها كانت عايزة تغير
_ طيب خليني اغيرلها
قربت منها بسرعة …انا عرفت ان البيبي مش ممكن ينام ولا يكون مرتاح وهو مبلول
_ متخافيش انا غيرتلها وانتي في الحمام
_ وعرفت؟
_ ادينا بنتعلم مع بعض
راحت اطمنت عليها بنفسها بعدين لقيتها قربت ورمت نفسها عالسرير بتعب
قلعت انا كمان القميص اللي خانقني دة …عايز انا كمان اقوم اخد دش والله….
وروحت قعدت جنبها وانا بتنهد بتعب
_ اية هتنامي دلوقتي…استني اجيبلك حاجة تاكليها
حركت راسها بلأ وهي بتغمض عنيها بتعب
_ مش عارفه حاسة من وقت ما خرجنا من المستشفى و العربية لفت بينا وانا دماغي بتلف واعصابي متوترة كدة
رفعت ايدي على شعرها المبلول دة
_ يمكن عشان بقالك مدة في المستشفى ومشينا بالعربية كتير فدوختي بس مش اكتر
لقيتها نامت على جنبها وبصتلي وهي بتنكمش كدة وتربع ايديها مع بعض وتضم رجليها لصدرها
_ بردانة؟
_ شوية.
قومت جبت من الدولاب حاجة تقيلة وساعدتها تلبسها وجبت كمان شراب من شرباتي التقيلة وقربت البسة ليها في رجلها
_ شرباتك يا احمد..ايه دة!!!
رديت عليها وانا بلبسها الفردة التانية باحكام عشان ميدخلش رجليها سرسوب هوا
_ اية مش عجبك؟!
لقيتها ابتسمت بارهاق كدة
_ لأ يا حبيبي حلو ….بس شرباتك دي كانت السبب في معظم خناقاتنا كل يوم الصبح تقريبا
ضحكت وانا بحرك ايدي على رجليها احرك فيها الحرارة
_ فداكي الف شراب من شرباتي كمان
