حمل بالتراضي الجزء الثالث بقلم رانيا
_ صباح الخير يا سيرين
_ صباح الخير يا ريم …اومال اخوكي فين صحيت ملقتوش
_ حماتك يا ستي مبهدلاه معاها من الصبح في تجهيزات السبوع …نزل الصبح بدري يجيب طلبات قد كدة…ورجع يعلق في مدخل الدار تحت زينة و بلالين و حاجات كدة
ابتسمت بفرحة لما حسيت اهتمامهم بالموضوع ده… واخيرا لقيت حد يفرح معايا ويفرحني باني ولدت وبقيت أم
رجعت اقرب من جوري اكملها لبسها
_ اومال ايه اللي معاكي دة؟
_ اه كنت هنسى …دول يا ستى احمد اخويا كان هيطلعهملك هو بس امي مسكت فية تحت فقالي اطلع ادهوملك وتلبسي واحدة منهم قبل ما تنزلي
خلصت اللي في ايدي وقربت وانا عيني عالشنط يا ترى جايبلي ايه وعايزني البسة في السبوع
_ وريني كدة
فتحت الشنط لقيت عبايات شكلها حلو قوي والوانها جميلة امممم بس طبعا واسعة تشبة العبايات اللي شفتها على ريم ومريم
_ اللة…تحفة يا سيرين وريني كدة
فتحت الشنطة التانية لقيت فيهم طرح
_ اخوكي جايبلي طرح
_ بيقولك البسي واحدة منهم وانتي نازلة
ابتسمت لما افتكرت اما كنا هنا المرة اللي فاتت وكنت علطول البس عباية مريم وطرحتها وكتير كنت اقولة نسيتها وكان وقتها يتنرفز عليا
_ هسيبك تلبسي بقى وانزل اساعد امي و مريم في باقي التجهيزات اللي تحت
نقيت منهم احلى عباية لأ كلهم اصلا حلوين…دة ذوق احمد وكفاية انها حاجة منه وانة في كل الزحمة دي افتكرني كدة …لبستها ولفيت المرادي الطرحة لفة حلوة قوي غير اما كنت بحطها يدوب على شعري بس ….حاسة فعلا شكلي بقى حلو قوي كدة …. انا لما انزل لازم اخلية يصورني كدة
اخدت البنت على درعاتي و نزلت واول ما وصلت الدرج الأخير …ابتسمت اما شفتة طالع على سلم خشبي المتنقل دة و في ايدة حبال الزينة و ريم مسكالة بلالين تناولهالة
_ هنا يا امي كويس؟!
_ لأ فوق شويه
_ يا امي ماهي كدة كويسة عشان تبقى على نفس خط التانية
_ كدة هتبقى قريبة من ايادي العيال يقطعوها …خليها فوق شوية
غصب عني ضحكت بصوت وانا بنزل على اللي مامتة بتعملة فية وهو اصلا مبيحبش يزعلها ابدا ومش ممكن يقولها تعبت او كفاية كدة
لقيت اللي بيلتفت على صوتي يبصلي وهو متشعلق فوق كدة وفاجأة ظهرت على وشة ابتسامة مش عارفه لية قلبي طار لما شفت بحلقتة فيا كدة لجروب روايات رانيا أبو خديجة حسيت اني احلى واحلى
_ بسم الله ماشاء الله اية العبايات الحلوة دي يا سيرين … جيباها منين؟
