حمل بالتراضي الجزء الثالث بقلم رانيا
شاورتلها بمعنى هي دي ؟
حركت راسها بمعنى ايوا … حطيت ايدي على الازاز قدامي وبصيت عليها من قرب
مغمضة عنيها الصغيرة دي وبتحرك ايديها ورجليها بخنقة و زهق من اللي هي فيه …. حركت ايدي على الازاز نفسي المسها واحضنها … مكنتش فاكر ان احساسي هيبقى صعب كدة اول ما عيني تيجي عليها … يااارب الصبر من عندك … عايز المسها بايدي بس حتى …
فضلت اتامل كل حتة وحركة تخرج منها لمدة مش عارف قد ايه وفاجأة حسيت بحاجة دافيه بتتحرك على وشي … غصب عني ومش عارف امتى دموعي نزلت من عيني وانا بمرر عيني عالكتلة الصغيرة دي في حجم القطط الصغيرة تقريباً… وعيني بتمر على كل الاسلاك اللي جايه من الاجهزة ومتوصلة بجسمها الصغير دة … غصب عني ضوافري اتحركت عالازاز حاسس حاجة جوايا بتقولي اكسرة وادخلها اجيبها لحضني
ابتسمت غصب عني وانا بتأمل حركة رجليها وهي نايمة …تشبة سيرين كتير روايات رانيا أبو خديجة ولا انا اللي شايف كدة من عشقي في الاتنين…
_ كفاية كدة وحضرتك تقدر تستنى بره بقى
التفت على صوت الممرضه بعدين بعدت وشي امسح دموعي بعيد عن مرمى عنيها والتفتلها تاني
_ اقدر استنى شويه كمان… من فضلك
_ افضل ليها ولحضرتك متستناش هنا اكتر من كدة .. اتفضل عشان الدكتورة تسمح لمامتها تشوفها كمان
بصتلها بحزن وقهر … مامتها تشوفها!!
_ حاضر… خارج
بصيت عليها نظرة اخيرة طويلة وفعلا خرجت
………………………..
كنت قاعد جنبها وهي نايمة عارف انها ممكن تصحى دلوقتي بقالنا ايام بتصحى في نفس الوقت تقريبا تأن بأسمي ومتلحقش حتى تسأل عن المولود وتغيب عن الوعي تاني
ابتسمت لما بصيت في وشها …حتى في تعبها ونومتها دي زي القمر… اوقات بحس ان البصة في وشها نعمة
مسكت ايديها بين ايديا كالعادة وقعدت احضنها بين ايديا الاتنين احاول اساعدها تفوق دلوقتي زي كل يوم …
بيوحشني صوتها في وداني و اسمي وهو بيخرج من بين شفايفها…. بس برضة فضلت غايبة عن الوعي … النهاردة اتأخرت في انها تصحى حسيت بقلق عليها اتنهدت بتعب … انا فعلا تعبت والله تعبت … حسيت انها ممكن متفوقش النهاردة ومين عارف معقولة ممكن تبطل تفوق تطمني عليها زي كل يوم… غمضت عيني بأسى من اللي بمر بيه وسندت دماغي على طرف سريرها وايديها في حضن ايديا الاتنين
