بين قلبين الجزء الثاني

سميحه نظرت لها بدون رد

سهى : أنا مش موافقه ياماما ..

لم ترد ايضا بل نظرت الى التلفزيون مره اخرى ..

سهى في غيظ : مش عاجبك كلامي طبعا

سميحه : انا قلتلك مش هضغط عليكي سواء كلامك عاجبني ولا لأ.. بس هسألك سؤال

سهى : نعم

سميحه : استخرتي؟

سهى : بصراحه لأ.. بس انا مش محتاره عشان ااستخير انا رأيي النهائي كده

سميحه : هو انتي عارفه الغيب ؟ عارفه فؤاد هيسعدك ولا لأ؟ انا بقولك استخيري وبعدين نتيجة الاستخاره هو اللي هيحصلك .. سيبي الامور لربنا وماتفكريش.. الموضوع بقاله 3 ايام بس وانا قلت للناس سيبونا اسبوع نفكر يعني براحتك خالص.. رأيي استخيري ..و … و .. و ..

سهى : و ايه ياماما؟

سميحه : وتقعدي معاه مره واحده عشان خاطري ولو بردو لسه عند موقفك انا مش هفتح بقى خالص ..

سهى : هو ده بردو اللي مش هضغط عليكي مش هضغط عليكي .. ماحضرتك اهو عايزياني اقعد معاه وده معناه اني موافقه

سميحه : انا بقول تقعدي معاه وانتي لسه بتكوني رأي .. عادي على فكره لو اتكلمتي معاه وبعدين رفضتيه .. بتحصل

سهى : وليه ابهدل الراجل معايا واعشمه بحاجه انا عارفه انها مش هتحصل
سميحه : قلتلك استخيري الاول .. وفكري بعقلك قبل قلبك .. صدقيني سكة القلب من غير العقل .. اخرتها وحشه

سهى وقد فهمت كلام امها : قلب ايه وعقل ايه .. كلامك واستنتاجاتك كلها غير منطقيه على فكره

سميحه نظرت لسهى بعمق كأنها تكذبها فيما قالت .. ثم نظرت للتلفيزيون مره اخرى وقالت : ابقى قوليلي رأيك بعد الاستخاره ايه .. واخر الاسبوع لينا كلام تاني

سهى : لا كلام تاني ولا تالت .. انا قلت رأيي

قامت وتركتها في غرفة المعيشه بمفردها .. نظرت من النافذه لم تجد اي سياره لاحد منهم بالاسفل .. بحثت عن اخواتها وجدتهم يلعبون على الكمبيوتر .. وعندما رأوها .. قال لها مازن : سوسو كنت لسه هاجيلك

سهى : سوسو؟ ممممم يبقى انت عايز حاجه .. ها قول

مازن : عيبك انك فاهماني ..

سهى : ماعلينا .. انجز ..

مازن : عايزين نروح النادي بليل .. وعايزينك تيجي معانا عشان ماما توافق

سهى : خلاص قولها انت .. انا مش هقول حاجه

نظر مازن لمروه .. ثم خرج من الحجره .. ثم رجع بعد قليل واخبرها بموافقة والدته .. خرجوا مساءا الى النادي .. ذهب مازن ومروه الى اصدقاءهم وجلست سهى على احدى الكراسي ..