بين قلبين الجزء الثاني

قال : انتي مش ليا ولا انا ليكي ياسهى .. لازم انساكي لازم …

الفصل السابع عشر

جاء ثاني يوم على الجميع .. استيقظت سهى واخواتها في وقت متأخر نظرا للمجهود الذي بذلوه في يوم أمس حتى لبعد انصراف ضيوف الحفل .. فقد قاموا بتنضيف واعادة ترتيب الحديقه الى ماكانت عليه قبل النوم ..

تناولوا افطارهم .. قالت سهى : ها هنعمل ايه النهارده؟

سميحه : تعالوا نروح النادي كمان شويه .. الجو شمس النهارده .. ونتغدى هناك بالمره

فرحت مروه بالفكره : ايوه ياماما ياريت .. هي دي الافكار

سهى : خلاص اجهزوا بعد الفطار نروح على طول ..

سميحه : لا استنوا شويه .. اصل الدكتوره كوثر اتصلت من شويه وقالتلي هتيجي تقعد عشر دقايق وتمشي

سهى بتساؤل : اشمعنى؟

سميحه : معرفش .. لما تيجي هنعرف

انهى الجميع افطارهم .. اتجهت سهى للمطبخ لانهاء غسل الاطباق بعد الفطار بعد قليل جاءت كوثر وجلست معها سميحه في الريسبشن .. جاءت سهى سلمت عليها .. ثم استأذنت كي تأتي لها بمشروب الضيافه .. نزلت بعد قليل وقدمت لها صينيه عليها فنجان كاكاو مع قطع كيك .. ولكن اعتذرت كوثر لمعاد عملها .. وخرجت

بعد خروجها سألت سهى والدتها : جت في ايه ومشيت في ايه ؟ ماحنا كنا مع بعض امبارح ايه اللي جد؟

سميحه بغموض : كل خير كل خير ..

ثم نظرت لملابس سهى لتغير الموضوع : انتي لسه مالبستيش ؟ يلا عشان النهار قصير عايزين نقعد في الشمس شويه

هزت سهى كتفها بلامبالاه : حاضر ياماما

صعدت سهى وابدلت ملابسها .. وايضا اخوتها .. وذهبوا للنادي .. في الطريق كانت سميحه شارده تنظر بعينيها خارج نافذة السياره .. لاحظت سهى ذلك ولكن لم تعلق ..

وصلوا .. انطلق مازن ومروه الى منطقة العاب الاطفال .. اندمجت مروه مع صديقاتها ومازن ايضا ذهب الى ملعب كرة القدم مع اصدقاءه ..

جلست سهى مع والدتها على التراس .. كانت سهى مستمتعه بالشمس المشرقه في هذا الطقس البارد .. طلبت كوبا من النسكافيه وطلبت والدتها شاي ..

سهى : مالك ياماما من ساعة ما طنط كوثر ما مشيت وانتي مش طبيعيه

سميحه وهي تنظر لسهى بتفكير ..ثم قالت : سهى انتي طول عمرك صحبتي قبل ما تكوني بنتي .. وعلى طول كنا بنقول لبعض كل حاجه ومابنعملش حاجه الا لما نستشير بعض .. صح ولا لأ؟

سهى : ايوه ياماما طبعا ده انا كل صحابي بيحسدوني عليكي .. ربنا يخليكي ليا .. انما ايه سبب كل الكلام ده؟