بين قلبين الجزء الثاني

الفصل السادس عشر

“عمرو .. عمرو .. يااااعمرو ”

عمرو : هه؟

فؤاد : ايه يابني بلمت كده ليه ؟ بقالنا ساعه بنكلمك

عمرو : بتكلموني انا ؟ قولتوا ايه؟

حسن : ايه يابني مانت كنت كويس .. بنقولك فؤاد عايز يخطب سهى..

عمرو ببهوت : سهى مين؟

فؤاد : سهى جارتنا .. بنت مدام كوثر .. انت مش مركز خالص

عمرو : سهى ؟ سهى سهى ؟ اللي كانت في الحفله دي؟

وضع فؤاد يده على رأس عمرو : ايه يابني انت سخن ؟ انت كنت داخل علينا كويس ..في ايه؟

عمرو وقد ابعد يد اخوه عن رأسه : لا انا كويس .. انا داخل أوضتي

دخل عمرو حجرته واغلق الباب .. وقف سند رأسه للباب .. هل ماسمعه للتو حقيقي؟ هل فعلا فؤاد سيخـ,ـطف سهى من قلبه؟ من احلامه ؟ من مستقبله الذي يحلم بشراكتها اياه؟ هل سيتخلى عن عشقه لسهى بهذه السهوله ؟ لا والف لا .. حتى لو كلفه الامر ان يعصي اهله وان يفطر قلب اخيه.. سوف يحارب ويحارب من أجلها .. وجهه نظره للورد الذي اهدته سهى يومها .. نظر اليه وابتسم وهو يتذكر ضحكتها .. وازداد قوه اكثر .. قرر مواجهة أسرته وإقناعهم برأيه .. لابد ان يتكلم معهم قبل ان يبدأوا هذا الحوار مع عائلة سهى ..

قطع عليه تفكيره طرقات على باب الحجره

عمرو : اتفضل

دخل فؤاد وعلامات القلق على وجهه : بقيت كويس ياعمرو ..

قال عمرو باقتضاب : ايوه

فؤاد مستريحا : طيب ياخي قلقتني عليك ..

وجلس فؤاد على طرف السرير ونظر الى أعلى وقال : عارف ياعمرو .. انا مش مصدق نفسي اخيرا كل أحلامي هتتحقق

عمرو : قصدك على السفر؟

فؤاد : السفر وسهى .. الحمد لله على كل شئ .. بجد انا فرحان اوي ..

عمرو بغيظ : بس انت ماشفتش ولا عرفت سهى غير قريب .. لحقت تبقى في أحلامك امتى ؟ وكمان كنت مأجل فكرة الجواز دي لبعد الدكتوراه .. مش ده كلامك .. مش انت اللي كنت بتقول ان الستات بيعطلوا مش بيسهلوا الامور للراجل

فؤاد : عمرو .. انا من يوم ما شفت سهى وانا رسمت ليها صوره في خيالي ان هي دي الانسانه اللي عايزها تشاركني حياتي .. واظنها مش من النوع اللي بيعطل .. دي هتساعدني اكمل كفاحي .. والنهارده لما شفتها بجد خطـ,ـفتني .. عارف .. حسيت اني عايز اخدها بعيد عن الناس واقولها كل الكلام اللي في قلبي ليها

عمرو باندهاش : يعني انت بتحبها فعلا يا فؤاد؟

فؤاد : بحبها؟ قول بعشقها .. انا مش عارف رد فعلها هيكون ايه .. ادعيلي ياعمرو ..ادعيلي توافق عليا .. أحسن انا خا,,,,,,يف من الحته دي .. خايف بعد ما اطلع لسابع سما .. تقول هي مش موافقه وتنزلني لسابع أرض ..