حكايات ملك إبراهيم
قمر بتحس بالندم وتقول له، وصوتها واطي ومليان خجل من نفسها: “انا واثقة ومتأكدة ان حضرتك بتقول الحقيقة انا كنت غبية مش عارفة ازاي ما فكرتش صح ومش عارفة ازاي هصالح زين”
مختار بيفكر إنه يجهز لها أوراق السفر وتسافر لزين وتكون معاه هناك ومنها يكون شهر العسل بتاعهم.
وفعلا عمها مختار بيجهز لها كل الأوراق المطلوبة عشان السفر وبيحجز لها الطيارة وبيتكلم مع مدير أعمال زين وبيطلب منه إنه يستقبلها في المطار ويوصلها لحد زين من غير ما يبلغه عشان يعملوها له مفاجأة، وقمر بتكون مكسوفة من نفسها جدا بعد اللي عملته مع زين ومش عارفة إزاي هتواجهه وهتقول له إيه وإزاي هتصالحه وتعتذر له على اللي عملته. طول الطريق في الطيارة كانت بتكلم نفسها، قلبها بيقولها “سامحيني يا زين، أنا خوفت أحبك وأخسرك”.
وبتسافر قمر ومدير أعمال زين بيكون في استقبالها وبياخدها يوصلها للشقة بتاعة زين اللي هو عايش فيها، بيكون زين في فرع شركته عنده اجتماعات كتير طول اليوم ومدير أعماله بيدي المفتاح لقمر عشان تدخل بيت جوزها وتستناه لحد ما يرجع وتكون مفاجأة لزين، كانت واقفة في شقته بتبص على كل ركن كأنه ركن من قلبه، مستنية بلهفة وخوف. في نهاية اليوم زين بيكون راجع مرهق وتعبان لسه أعصابه تعبانة من حكايته مع قمر ومش عارف إزاي هيحلها، أول ما بيدخل البيت بيحس بحاجة غريبة، ريحة حلوة، إحساس إن البيت مش فاضي زي ما سابه. بيقفل الباب ويدخل يلاقي قمر خارجة من أوضة النوم لابسة فستان رقيق جدا.
زين بيكون مصدوم ومش مصدق متخيل إنه بيحلم، قلبه وقف لحظة من المفاجأة، قمر تقرب منه وتبتسم، ابتسامة مليانة اعتذار وحب، وتقول له: “انا اسفة انا عرفت الحقيقة كلها”
زين بيستغرب مش قادر يستوعب إنها موجودة قدامه بيقول لها، وصوته طالع مبحوح من الاشتياق: “انتي جيتي هنا ازاي انا مش فاهم حاجة”
قمر تقول له، وعينيها في عينيه بتترجاه يسامحها: “عمي مختار حجز لي الطيارة مدير اعمالك اداني مفاتيح بيتك وجيت هنا استناك”
زين بيبص لها ويقول لها، ولسه الوجع باين في صوته: “وجيتي ليه مستعجلة على الطلاق”
بتهز راسها بلأ وتضم رقبته وهي بتقرب منه، حست إن حضنه هو الأمان اللي كانت بتدور عليه من يوم ما أبوها مات، وتقول له: “انا كنت غلطانة اتخدعت ما كنتش مصدقة ان انت بجد بتحبني بس عرفت الحقيقة”
