حكايات ملك إبراهيم
قمر بتهز راسها وهي ساكتة، مش قادرة تتكلم من الخجل، حاسة إن الكلمة بتخلي وشها يحمر. زين يكمل كلامه ويقول لها: “والدك الله يرحمه لما طلب ان انا اتجوزك طلب مني ان في الوقت اللي انتي تطلبي فيه الطلاق أنفذ لك طلبك وانا بسألك من دلوقتي وبقولك لو انتي في اي وقت يا قمر مش مرتاحة وحبيتي ان انا أطلقك قوليلي”
قمر بصت له وهي مكسوفة مش عارفة تقول إيه، كانت عايزة تقول له لا انا مش عايزة أتطلق بس كانت خايفة هو بالنسبة لها شخص غريب ما تعرفوش. جواها صراع، عقلها بيقولها استني، وقلبها بيقولها خليكي.
مختار يتكلم بهدوء وقال لهم: “طب ايه رأيكم تجربوا انت يا زين حياتك كلها في الشغل ومحتاج واحدة تكون زوجة وتملى عليك حياتك وقمر محتاجة راجل يسندها ويخلي باله منها جربوا يا ولاد وشوفوا يمكن يكون النصيب هو اللي كتبكم لبعض تكونوا مع بعض”
قمر وزين بيبصوا لبعض، نظرة طويلة صامتة، كأن كل واحد فيهم بيدور على أمانه في عين التاني. زين يهز راسه ويقول: “انا عن نفسي موافق نجرب المهم عندي رأي قمر”
قمر تبص له وتقول، وصوتها دافي وخجول وقلبها موافق قبل لسانها: “انا كمان موافقة نجرب”
بيبتسموا وكل واحد بيبص للتاني بنظرة وكأنه بيقول للتاني.. انت النصيب اللي ربنا كتبهولي.
زين بيقعد أسبوع، في الأسبوع دا هو وقمر بيقربوا من بعض جدا، كانت أيام ناعمة، ضحك خفيف على الفطار، كلام بيتقال بالعيون أكتر من اللسان، قمر بقت تستنى طلته وابتسامته. وبعدين بيسافر، طول فترة سفره كل يوم هو وقمر لازم يتكلموا في التليفون، قمر كانت بتحكي له على كل حاجة بتحصل في يومها، حست إنها لقت حد يسمعها بجد، حد يهمه تفاصيلها الصغيرة. بدأوا يقربوا من بعض أكتر ويعرفوا بعض أكتر، وبدأ الحب بينهم، حب بيكبر بشويش وبهدوء، قمر كانت بتعد الساعات والدقايق والأيام عشان زين يرجع، وزين بقى مشتاق لها، صوتها بقى وحشته اليومية.
وفي مرة وهما بيتكلموا سألها وقال لها: “ايه رأيك أول لما أرجع نعمل فرح كبير ونبقى زوج وزوجة بجد”
قمر فرحت جدا وحست إن الحياة بتضحك لها وإن زين هدية ربنا ليها عشان ما تبقاش لوحدها، قلبها طار من الفرحة، كأن دعوتها أخيرا استجابت. وافقت، وبعد شهر زين رجع من السفر وعملوا فرح كبير وكان لابس بدلة ووسيم جدا وقمر كانت لابسة فستان وكانت في زي الملكة وكل الناس فرحانين وكل المعازيم مبسوطين بيهم، كانت حاسة إنها ملكة بجد، مش بالفستان، بقلب زين اللي بيبصلها كأنها الدنيا كلها.
