حمل بالتراضي الجزء الثاني بقلم رانيا
فضلت واقف مكاني ابص للباب اللي خرجوا منوا و افكر هل فعلا شغلهم مع مكتبنا بالذات صدفه؟!!
وهل برضه مجيهم هنا دلوقتي صدفه زي ما بتقول !
بس لو مش كدة هيكونوا جايين دلوقتي بالذات وعايزين يقربولها تاني ليه ؟!
_ احمد…
فوقت من تفكيري وحيرتي على همسها … التفت ليها
_ انا خايفه منهم …. ومش مطمنه
قعدت جنبها عالسرير واتكلمت بطريقة احاول اطمن الرعب اللي على وشها دة
_ ممكن افهم خايفه من ايه بقى … هو حد يقدر يقربلك وانا معاكي .
_ قربهم المفاجئ دة و مجيهم فاجأة كدة مش مطمني … دول يا احمد مش بشوفهم الا لو فيه مصيبه او نيتهم فيها حاجه من ناحيتي.
_ هيكون يعني جايين وعايزين ايه .. طب يبقوا يوروني كدة لو حد منهم فكر يقربلك بس وانا جنبك.
لقيتها حضنت دراعي و حطت راسها عليه بتعب
_ انا مش بحبهم يا احمد وبجد بخاف لما بشوفهم … انا مشفتش منهم اي حاجه تخليني ارتاح لمجيهم المفاجئ دة… سبق عملوها وانت عارف كانت النتيجة ايه وعملوا فيا ايه.
قربت وبوست راسها وضمتها احاول احسسها بأمان وجودي
_ متخافيش من حاجة أبدا وانا معاكي … وبعدين ليه سوء الظن ما يمكن فعلا صدفه ومكنوش يعرفوا ان مراتي تبقى انتي.
سكتت واتنهدت برضه بقلق
_ يارب يكون كدة فعلا .
وفاجأة رفعت راسها وقالتلي
_ بس انا مش عايزة اشوفهم تاني … ممكن تلغي اي شغل معاهم يا احمد عشان خاطري.
_ عشان خاطرك انا اعمل اي حاجة … وحاضر هحاول اخلص الشغل اللي اتمضى دة في اقرب وقت و اقطع اي تعامل معاهم عشانك…. المشكله اني مكنتش اعرف وماخدتش بالي حتى من الورق لاني انشغلت معاكي وكان طارق مدير المكتب في غيابي هو اللي بيخلص كل حاجة… بس خلاص اوعدك هعمل اللي يريحك.
لقيتها اخيرا ابتسمت براحه … ابتسمتلها انا كمان وقومت وروحت عند الباب اجيب الشنط اللي سبتها اول ما دخلت دي
_ جبتلك بقى شوية كشري … مش عايز اقولك الريحة وانا في المطعم بجيب كانت عامله فيا ايه
لقيتها نزلت في السرير وقالت بملل ويأس
_ لأ خلاص مش عايزة… حاسة نفسي اتسدت.. هنام
_ ايه!!! بعد ما اتخليت عن رغبتي في تلبية نداء مناخيري وقوة الريحة عشان أكل معاكي تقوليلي مش عايزة
لقيتها ابتسمت ابتسامتها اللي بعشقها دي
_ بص هو يعني .. الكشري حلو قوي يعني؟
_ تحححفه … مقولكيش.
