حمل بالتراضي الجزء الثاني بقلم رانيا
_ انا .. أنا تعبانه بس شويه … وان شاء الله هخرج من هنا قريب .
قرب وميل عليا بقى وشه اللي بقيت بخاف أشوفه دة قريب قوي من وشي لدرجة اني رجعت دماغي لورا
_ الف سلامه عليكي… ان شاء الله يارب اللي يكرهك ولا اقولك ان شاء الله انا وانتي لأ
كنت طالع وفي ايدي شنطة بلاستيك بتاعت الكشري اللي طلبته وجبت كمان معايا عصير كتير ليها… بصيت للشنطة في ايدي وابتسمت بضحك لو قفشونا هنا في المستشفى بريحة الكشري دي هخرج النهاردة وهي في ايدي انا عارف.
قربت من الاوضة وفتحت الباب ودخلت وعلى وشي اجمل ابتسامه مبتبقاش غير ليها لواحدها…. سيرين تستحق مني كل حاجه تبقى ليها لواحدها… انا محظوظ ان ربنا كرمني بيها في حياتي… من وقت ما اخيرااا اعترفتلي باحساسها ناحيتي وبرغبتها في استمرار جوازنا وهي علطول نبقى قاعدين سوا القيها حضنت دراعي فاجأة وهمستلي
_ انا بحب ربنا قوي عشان رزقني بيك وخلاك معايا .
وقتها ببصلها وانا بتنهد وببقى عايز أقولها ان انا مش عارف انا عملت ايه عشان استاهل واحدة زيك وكمان تحبني كدة .
فتحت الباب ودخلت… ايه دة مين دول؟؟!!
اول ما دخلت ولسه هتكلم وأسأل لقيتها قامت من السرير بسرعه و عدت اللي واقف جنبها دة وجريت عليا
_ احمد ..
بصتلها باستغراب… تقريبا بتستخبى فيا وكأنها خايفه من حاجة… لفيت دراعي عليها وانا ببص في الاوضه احاول افهم في ايه
ايه دة مش دي تبقى!!!!
_ مساء الخير… ازيك استاذ احمد.
جيت اقرب لقيت اللي بيشد دراعي بصيت لسرين لقيتها ماسكة في دراعي بخوف… اتكلمت وانا واقف مكاني وبرضه ماسكة في دراعي وكاني ههرب واسيبها لوحوش بطاردها
_ اهلا بيكي استاذه … استاذه ..
لقيتها فاجأة كشرت ونبرة صوتها اتغيرت
_ علا… اسمي علا .. واضح ان حضرتك ذاكرتك مش احسن حاجه.
_ اهلا بيكي طبعا … معلش والله أسف الشغل والعملا كتير
قامت وقفت وقربت
_ لما عرفت ان مرات حضرتك تعبانه قولت اجي واعمل الواجب احنا خلاص بقى في بينا شغل والشغل يحب العلاقات الاجتماعية تبقى في افضل شئ ولا حضرتك شايف ايه.
_ اكيد طبعا … اهلا بيكي.
رديت عليها وانا عيني غصب عني راحت للي لفت الانتباه ليها دة بنظراته …. مين دة كمان …جوزها؟!
ايه دة ماله بيبصلي انا و سيرين كدة ليه … ماله دة تقريبا سرح وهو عينة علينا بالنظرة الغريبة دي
