حمل بالتراضي الجزء الثاني بقلم رانيا
_ مين اللي قال يا حبيبي اني مش فرحان… دة كفاية فرحتك اللي على وشك دي … تخليني فرحان وقوي كمان
لقيت دموعها لسة بتنزل على وشها و بتتكلم بتنهيد
_ اول ما عملت الاختبار و عرفت وانا بتخيلك هتبقى مبسوط ازاي … لكن ولا لحظة شوفتك زعلان كدة ؟!!!
_ انا !!! دة أنا فرحان قوي … أخيرا حلمك وحلمي هيتحقق وهيبقى عندنا اجمل طفل في الدنيا… عارفة ليه هيبقى اجمل طفل في الدنيا ؟!
مسحت وشها بايديها وهي بتتنهد
_ ليه ؟!
_ عشان حتة منك .. و هتبقى احلى حاجه حصلت لو طلع شبهك.
عدلتها على رجلي وكلمتها بحماس
_ ها قوليلي بقى … عايزة ولد رخم ولا بنت جميلة ؟
_ اشمعنى الولد رخم والبنت يعني جميله
ابتسمت
_ عشان البنت بتبقى لمامتها اما الولد فاللأسف يعني بيقولوا بيطلع لباباه ؟
لقيتها حضنتني جامد
_ أنا بحبك قوي يا احمد… قوووي … وعايزة ولاد وبنات كتير كلهم شبهك ويحبوني زيك كدة.
حضنتها انا كمان بخوف و مش عارف ليه حاسس انها هتروح مني من وقت ما عرفت …. قلبي مقبوض.. اكيد دة من خوفي عليها مش أكتر
_ وأنا بموت فيكي يا عيون احمد…. بحبك قوي يا سيرين…ربنا يخليكي ليا ويجعل يومي قبل يومك
خرجت من حضني وبصتلي
_ يعني ايه يومي ويومك دي؟
_ الدعوة دي أبويا كان دايما يقولها لأمي.
حطت ايديها الحنينة دي اللي بحب لمستها على وشي ودقني
_ ايوا يعني ايه برضه.
_ يعني ربنا يجعلني أفارق الدنيا قبلل….
حطت ايديها على بوقي وحضنتني تاني اكتر
_ اوعى تقول كدة زي باباك ابدااا …. انا مش هعرف أعيش من غيرك .. انا معشتش الا لما بقيت معايا وجنبي .
حضنتها جامد حاسس انها مينفعش تخرج من هنا . من حضني
_ بقولك ايه.. قومي يلا غيري هدومك عشان نروح للدكتورة عشان تطمنا عليكي انتي والطفل
حطت ايديها على بطنها واتكلمت بألم
_ مش عارفه يا أحمد ليه في ألم رهيب في بطني … لولا أخدت المسكن بعد ما كلمتك كنت موت من التعب والوجع .
.حضنتها ومتكلمتش و انا بحسس على بطنها اللي بتألمها
_ طب يلا قومي نروحلها نطمن عليكي وعليه.
……………………………
_ ايه !!!! حامل ؟
شلت ايدي من على وشي ورديت بكل اليأس والخوف اللي في صوتي
_ . اه يا دكتورة…حامل
الدكتورة سكتت شوية بحيرة هي كمان .. ياربي هي ومحتاره كدة طب انا اعمل ايه
_ كدة في خطر عليها وعاللي في بطنها…
