حمل بالتراضي الجزء الثاني بقلم رانيا
سكت ابصلها بس … وبعدين بلعت ريقي بالعافيه واتكلمت بنص صوت
_ هو حضرتك تتوقعي ان دة لو حصل… هيحصل امتى وازاي
_ استاذ احمد خلينا متفقين انه أكيد هيحصل .. امتى بقى وازاي فبسبب ضغط العلاج و جرعاته اعتقد الموضوع مش هيكمل كتير
_ يعني مفيش أمل ولو بنسبه بسيطة
_ استاذ احمد… سيرين محتاجه معجزة من ربنا عشان نقدر نحافظ عالحمل دة
سكت شويه ابصلها وبعدين لقيتني بقولها باصرار
_ وانا واثق في ربنا… اكيد مش هيوجعها تاني أكتر من الوجع اللي شافته… انا واثق فيه و ان شاء الله هيكمل على خير..
_ ونعم بالله وكل حاجة بس انا محتجاك تكون جاهز لحاجة زي دي وياريت لو تحاول تمهدلها الموضوع كمان من دلوقتي
قومت وقفت بعصبية من قسوتها في كلامها دي هي مش واخدة بالها ان سيرين دي مراتي واللي في بطنها ابني وكلامها بيوجع فيا ولا ايه
_ و انا قولتلك اني واثق في ربنا ومش همهدلها حاجه ولا هستنى حاجه غير انها تقوملي بالسلامة وبس .. هي وابني.
وسبتها وخرجت من مكتبها .
_ ماله الراجل دة … طب دلوقتي اجيب انا مين يقنعهم انه لازم دة يحصل عاجلا ام اجلا ويمهدلهم الاتنين الموضوع ؟!
……………………………
_ صباح الخير… من فضلك عايزة أقابل الأستاذ أحمد
_ أستاذ أحمد مش موجود يا فندم … ومعدتش بييجي كتير … تقدري حضرتك تقعدي مع استاذ طارق هو وكيل عنه حاليا في كل شىء
_ مفتكرش انه هينفع كنت عايزاه في أمر شخصي.
_ اهو يا فندم … استاذ احمد جه
دخلت المكتب لقيتها في وشي و اول ما شافتني قربت بابتسامه واسعه كدة
_ استاذ احمد كويس ان حضرتك جيت .. كنت لسه بسأل عليك
_ اهلا بيكي استاذه علا .. اتفضلي
دخلنا المكتب وبعد كلام كتير في الشغل
_ كدة يبقى كله تمام .. مطلوب بس منكم تبعتوا حد من عندكم يتابع مع الاستاذ طارق خروج الشحنات و اتمام الامر .. هو المسؤول حاليا مكاني
_ واضح ان حضرتك مشغول قوي مع سيرين اليومين دول.. ربنا يشفيهالك… هي مالها صحيح مش حاجة بسيطة يعني.
_ اه بسيطة…. احنا مستنيين مولود جديد وهي موجودة في المستشفى عشان كدة.
ايه … هي كمان حامل !!!!
_ هي سيرين اتعرفت عليك ازاي ؟
رفعت وشي ابصلها فاجأه من بجاحتها في الأسئله
_ يعني… النصيب
لقيتها ابتسمت وقربت كدة من المكتب في قعدتها
_ اكيد نصيب .. وسيرين طول عمرها محظوظه …صراحه اتأكدت من الموضوع ده بعد ما لقيتها اتجوزتك.
