حمل بالتراضي الجزء الثاني بقلم رانيا
لقيتها قامت واتعدلت … ضحكت على رد فعلها اول ما فتحت العلبه وشمت ريحتها
_ بتضحك على ايه… هات بقى.
قالت وهي بتمد ايديها تحاول تاخد العلبة من ايدي
_ اصبري اقلبهااالك كويس .
ادتهالها وبصتلها … ابتسمت وانا عيني عليها اول ما اخدت المعلقة وحطتها في بوقها الصغير دة …. ياربي طب هحبها ايه اكتر من كدة!
_ الله… طعمه حلو قوي.. قوووي.
بعدين بصتلي وقالت
_ ايه مش هتاكل؟!
رديت وانا بقلب أكلي
_ لأ ازاي هاكل طبعا الا الكشري … خلينا ناكل ونقلب المستشفى بالريحة دي وبعدين نطرد انا وانتي مفيش مشكله
لقيتها ضحكت جامد لحد ما شرقت والاكل في بوقها
جريت اناولها ميا وانا نفسي بضحك على جمالها وجمال كل حاجه معاها … حتى أكلة كشري حاجه تانيه خالص بسيرين
_ على مهلك …. براحه
رجعت تاكل تاني بشراهه وبدءت انا كمان استمتع بطعم الكشري وانا معاها فعلا طعمه حلو قوي زي ماقالت ولا يمكن طعمه كدة عشان بس معاها ..فاجأة لقيتها بتبص جوا علبتي
_ احمد … انت بتاكل بصلصه ودقه وانا لأ!!
بصيت للكشري بتاعي ولبتاعها … بعدين اخدت معلقه من علبتي وقربتها من بوقها وانا مبتسم
_ دي بس… بلاش فجاعه بقى… انا عايز أكل علبتي زيك .
_ الله دة حراق قوي طعمه جميل.
رديت وانا بقلب في علبتي وباكل بعد ما اخدت من بوقها معلقتي
_ انا بحبه كدة …. حراااق.
_ طب ممكن معلقه كمان … واحدة بس.
_ لأ مش ممكن … و خليكي في علبتك بقى لو سمحتي
_ بقى كدة يا احمد .. يعني يرضيك ابنك يطلع في قورته كشري بصلصة.
لقيته ابتسم وكأنه عايز يضحك بعدين رد بسماجة وهو بيقلب في العلبه بتاعته
_ اه يرضيني … ملكيش دعوة انتي … ابني حبيبي وانا راضي.
لقيتها بصت لعلبتها بقمص كعادة اي حاجه بتبقى عايزاها وبعارضها … ابتسمت على شكلها وهي بوزها قدامها كدة بعدين سبت علبتي واخدت بتاعتها منها وقعدت قدامها أكلها
_ ان شاء الله اول ما تخلصي علاجك على خير اوعدك اول اكله لينا سوا تبقى كشري حراق نااار و بصلصه كمان .. ايه رأيك.
_ مااشي … بس امتى اخلص وابقى كويسه بقى؟!
رديت وانا بدخل معلقه في بوقها الصغير دة
_ الدكتورة قالتلي انك كنتي قربتي تخلصي المرحلة الأولى من العلاج قبل ما تدخلي المستشفى واللي هي اصعب مرحله في العلاج واللي فيها كل الوجع والألم اللي شفتيه دة
وخلاص هتبدئي في المراحل اللي بعد كدة واكدتلي انه أن شاء الله اعراضه وألمه هيكون أخف من اللي فات.
