برغبتها الجزء الأول

"أنا مش عايزة غير الطلاق!".. صرخت نبيلة بالكلمة دي وهي محروقة من جواها، كانت واقفة قدام رائف وهو بيبص لها بكل غضب وقسوة ورد عليها بصوت زي الرعد: "نبيلة.. ما تطلعيش جناني أكتر من كده، اطلعي على أوضتك حالاً!". نبيلة دموعها خانتها وقالت له وهي بتشهق: "والله العظيم خلاص، مابقتش قادرة أعيش معاكم! أنت أصلاً مش عايزني، مش أنت اللي هجرتني بقالك أكتر من شهر عشان تقعد جنب ستك الهانم مراتك الجديدة عشان (حامل)؟". رائف فقد أعصابه ومسكها من كتافها وهو بيهزها بعنف: "مش ده كان قرارك؟ مش أنتِ اللي قلتي اتجوز عشان أخلف طفل من صلبي؟ مش رُحتي بنفسك مع أمي ونقيتيها؟ أدي اللي أنتِ عايزاه حصل.. (سبيل) حامل في حتة مني، والبنت ماعملتش حاجة تأذيكي عشان تكرهيها كدة!". نبيلة كانت بتبص له بيأس وهي مش قادرة تنطق، ومن بعيد كانت حماتها واقفة بتبص لها بنظرات توسل، خايفة إن نبيلة تقول لـ رائف إن هي اللي ضغطت عليها عشان تقنعه بالجواز.. لو عرف الدنيا هتتقلب. رائف كمل كلامه بسمّ: "البنت من يوم ما دخلت البيت وهي زي النسمة، الكل حبها إلا أنتِ.. كنتِ ديما بتقللي منها وكأنك صاحبة البيت وهي مجرد خادمة! أنا ما حاسبتكيش قبل كدة، بس بقولك من دلوقتي.. أيوه يا نبيلة، أنا ماحستش معاكي باللي حسيته معاها! أنا بحبك اه، بس هي (بعشقها).. دخلت قلبي من غير ما أحس، وهي دلوقتي مراتي وليها حق زيك وأكتر عشان ظروف حملها.. لو مش قادرة تعيشي معاها، هجيب لواحدة فيكم بيت تاني، لكن طلاق مش هطلق!". فجأة نبيلة فاقت من ذكرياتها على صوت سواق التاكسي: "يا مدام.. وصلنا العنوان". نزلت من التاكسي وهي بتجر شنطتها ويأسها وراها.. كانت عبارة عن حطام ست. خبطت على الباب، فتحتلها ست ملامحها تشبهها جداً والحزن مغطي وشها، وارتمت نبيلة في حضنها وهي بتنهار من البكاء.. أخيراً اطلقت. نبيلة حلمي الراوي، بنت رجل القانون، رجعت بيت أبوها مكسورة ومطلقة. قعدت في أوضتها تفتكر نبيلة القديمة.. القوية، الواثقة، اللي كانت بتتحكم في كل حاجة.. مرات رائف مندور، قصدي (طليقته). ضحكت بسخرية لما افتكرت حياتها اللي كانت فاكراها مثالية.. والزوج اللي ضحى بحلم الأبوة عشانها.. بس فجأة رنت كلمة "عاقر" في ودنها زي الجرس، وحطت إيدها على راسها وهي بتبكي بحرقة. حماتها هي اللي دخلت لها زمان وهي بتعيط وتقنعها إن رائف لازم يتجوز، ووعدتها إنها هتنقي بنت غلبانة مالهاش طلبات عشان الدنيا تفضل زي ما هي.. بس رائف اتغير، بقى بينتقد نبيلة في كل حاجة، وبقت هي "الشريرة" والزوجة التانية هي الملاك! كانت بتموت من الغيرة لما تشوفه داخل أوضة سبيل ومعاه ورد أو شيكولاتة، مشاعر هي ما عاشتهاش معاه! حتى الخدم كانوا بيقولوا عليها "دخيلة" بين عصافير الحب. أمها دخلت عليها الأوضة وخدتها في حضنها: "كفاية يا نبيلة، قطعتي قلبي يا بنتي، اهدي يا حبيبتي".. بس نبيلة كانت في عالم تاني، بتصرخ من القهر اللي جواها. الحلقة الثانية: ب في مكان تاني، كان فيه راجل بيجهز ببرونة لبن صناعي لبيبي صغير شايله في "الشيلالة" على صدره، ونادى بصوت عالي: "هيام.. الباص جه، يلا يا حبيبتي". بنت صغيرة عندها ٤ سنين جت تجري وهي لابسة شنطتها: "أنا جيت يا بابا". باسها من راسها وودعها عند الباب وهو بيطمن عليها، ورجع يهتم بالرضيع قبل ما ينزل شغله هو كمان. بعد كام يوم من العزلة، "مها" صاحبة نبيلة راحت لها البيت بطلب من أبو نبيلة عشان تخرجها من حالتها. مها قالت لها بضيق: "فين نبيلة القوية اللي بتسيطر على كل حاجة؟". نبيلة ردت بدموع: "راحت.. وانكسرت". مها: "مانتهتش ولا حاجة، قومي يا نبيلة.. أنا عندي ليكي شغل". نبيلة استغربت: "شغل إيه؟ أنا مش عايزة أخرج!". مها: "أنا فتحت حضانة من كام سنة وانتي عارفة، عايزك تشتغلي معايا وتدرسي أنشطة للأطفال.. قوليلي إيه رأيك؟". نبيلة عينيها لمعت: "أتعامل مع أطفال؟". مها بحماس: "أيوة! وعندنا فترتين، فيه أهالي بيسيبوا ولادهم الرضع كمان.. اختاري الفترة اللي تريحك". نبيلة بلهفة: "الفترتين طبعاً!". لبست نبيلة ونزلت، ولما وصلت الحضانة وسمعت صوت ولعب الأطفال، قلبها دق بفرحة. دخلت الفصل وقالت بحماس: "أهلاً يا حلوين، أنا مدرستكم الجديدة، ممكن نبقى صحاب؟". طلعت لهم ألعاب وعرايس غالية، وبدأت تدرسلهم رسم وقص ولزق، وفعلاً بدأت تنسى همها معاهم. وبعد ما خلصت، طلعت الدور التاني عشان تشوف الرضع وتعتني بيهم. تاني يوم، سامر (والد هيام) كان بيشوف العروسة الغالية اللي مع بنته واستغرب: "إيه دي يا هيام؟". هيام بفرحة: "دي هدية من ميس نبيلة الجديدة، دي شطورة أوي وعلمتنا الرسم". سامر سكت وهو مستغرب، مين المدرسة اللي بتوزع هدايا غالية كدة؟ في الحضانة، نبيلة كانت بتغني مع الولاد وفرحانة، وفجأة سمعت صوت صريخ! جريت لقت "هيام" واقعة على الأرض وبتبكي بحرقة لأن طفل زقها. نبيلة خدتها في حضنها بخوف، واضطروا يكلموا باباها يجي. الكل في الحضانة كان متوتر، وزميلتها "نهى" قالت لها: "إنتي متعرفيش أبوها، ده أشرس وأعصب راجل ممكن تشوفيه، بيقيم الدنيا لو بنته حصلها حاجة.. بس في نفس الوقت هو أحن وأوفى راجل.. وشكله وهو لابس بدلة الشغل الرسمية وهيبته دي، بيبقى شايل كائن صغير على صدره!". فجأة قطع كلامهم صوت زعيق راجل بره.. نهى قالت بضحكة رعب: "بس.. وصل السيد سامر!". دخل سامر وهو بينفخ، وهيام جريت عليه، ونبيلة أول ما شافته عينيها اتسعت من الصدمة.. كان شايل بيبي صغير في "شيلالة" سودة على صدره! نبيلة وهي مش قادرة تشيل عينيها من على البيبي، قالت بلهفة: "هاته.. هاته أنا ههتم بيه عقبال ما تهدي هيام، أنا مدرستها الجديدة وما تقلقش". سامر فك الشيلالة وادالها البيبي وهو بيزعق في المديرة: "أنا مش مصدق إني سيبت شغلي وجبت تيم معايا عشان التفاهة دي! كنت هعمل حادثة عشان تقوليلي مش عارفين تهدوا طفلة؟ ده اسمه تسيب!". تليفونه رن ورد باعتذار: "أيوة يا فندم، بعتذر جداً بس بنتي اتصابت في الحضانة ومحدش غيري كان ينفع يروح.. هتصرف حالا". قفل السكة وهو بيشتم بصوت واطي، وقعد وحط إيده على راسه من الهم.. ونبيلة واقفة بتراقبه بتوجس وهي ضامة البيبي لحضنها بحب.. قالتله بتردد وهي مكسوفة: "احم.. يا سيد، أنت كويس؟" بص لها وهو مشوش شوية، وبعد ثواني قال: "أنا سيبت شغلي فجأة بسبب مكالمتكم ليا، وفي الطريق جارتي اضطرت تسافر، وكلمتني عشان آخد (تيم) منها.. ودلوقتي أنا مزنوق ومش عارف أرجع الشغل إزاي ومعايا تيم." ردت عليه بلهفة وفضول: "معلش يعني، هو أنت بتشتغل إيه؟" رفع راسه وبص لها بنفاذ صبر: "شغال في شركة حراسات خاصة، واللي بحرسه كان في اجتماع خارجي، وأنا سيبته وجيت." عضت على شفايفها بتوتر وهي شايفاه بيقرب عشان ياخد الصغير، فـ رجعت لورا بسرعة ومنعته، وده خلاه يستغرب أكتر، بس هي قالتله بسرعة: "استنى بس، أنا عندي الحل! سيب الصغير عندنا، فوق فيه قسم خاص بالرُضّع وفيه ناس متخصصة، وأنا بنفسي هاخد بالي منه.. بوعدك. ولما تخلص شغلك فوت خد (هيام وتيم) مع بعض." نفخ بضيق وقال: "يا آنسة، مش معنى إني شغال في حراسات خاصة إني معايا فلوس كتير، أنا مقدرش على مصاريف زي دي، هتصرف فيه وشكراً لعرضك." لما لقاها بتبعد بالولد أكتر، قال بعصبية: "هات الولد يا آنسة عايز أمشي! أنا مابنامش في اليوم غير 3 ساعات، وأعصابي بايظة، وعندي استعداد أقتل دلوقتي، فـ بلاش تثيري جنوني أكتر!" قالتله بصوت فيه رجاء: "بالله عليك، هتتصرف إزاي وأنت لازم ترجع شغلك فوراً؟ سيبه بس، وهعملك خصم كبير مخصوص ليك.. فكر فيها، هتحطهم في الروضة طول النهار وتعدي تاخدهم بالليل على النوم علطول." بص لها شوية وهي مراقباه بقلب بيدق بسرعة، وفي الآخر قال بقلة حيلة: "ماشي، موافق.. اتفضلي دي شنطة حاجته، ولما أرجع نشوف موضوع الفلوس." هزت راسها بحماس وعينها لمعت، وده خلاه يستغرب أكتر: "ماتقلقش خالص، ميزانيتك مش هتتأثر، ده مبلغ رمزي اعتذاراً من الروضة عن اللي حصل النهاردة." باس ابنه وباس (هيام) بحب ومشي، وبقى (سامر) كل يوم يودي ولاده الصبح وياخدهم بالليل، وبقى مرتاح ومطمن طول ما "نبيلة" قريبة من ولاده، وعلاقتهم بقت صداقة قوية. عرف إنها منفصلة بس محكتش السبب، وهو حكالها عن وفاة مراته وإنه وحيد ومقطوع من شجرة ملوش غير أعمام كل واحد في ناحية. في يوم، والدة نبيلة كلمتها وقالت لها تروح تبارك لـ "نورا" بنت خالها عشان خلفت. نبيلة ابتسمت بوجع ومسحت دموعها وهي في العربية وبتقول: "الحمد لله على كل حال." دخلت بيت خالها، ومرات خالها استقبلتها ببرود، لأن "رائف" طليق نبيلة شريك جوز نورا، فـ بالنسبة ليهم نبيلة بقت من الأعداء. نبيلة سألت: "يا خالي، هي نورا صاحية؟ عايزة أبارك لها قبل ما أمشي عشان ورايا شغل." دخلت الأوضة وبصت للبيبي بحنان، وأول ما جت تلمسها، مرات خالها خطفت البنت بسرعة وقالت بتوتر: "أصل.. أصل ميعاد غيارها جه!" نبيلة ابتسمت بكسرة، فهمت إنهم خايفين تحسد البنت أو تأذيها، حتى نورا مكنتش مرتاحة لوجودها. قامت نبيلة بسرعة وقالت: "مبروك يا نورا، ورايا شغل لازم أمشي." خرجت تجري وهي بتعيط في صمت، ولما وصلت بره البيت مقدرتش تستحمل ووقعت على ركبها وهي بتنهج من العياط. فجأة لقت إيد بتتحط على كتفها، بصت لقت "سامر" واقف مستغرب جداً: "أنتي بتعملي إيه هنا؟" قالت من بين دموعها: "أنت بتعمل إيه هنا؟" رد بقلق: "ما أنا قولتلك شغال حارس شخصي، أنا هنا رئيس حرس السيد أكرم.. بس أنتي مالك؟ فيه إيه؟" حاولت تحكي بس كانت بتشهق من العياط، أخدها قعدها على كراسي بعيد عن العين وسألها: "إيه اللي جابك هنا وقت شغلك؟ أنتي هتشتغلي هنا؟" ضحكت بمرارة: "لا، ده بيت خالي." سامر اتصدم وقام وقف: "بيت خالك؟! وليه ماقولتيش؟ يا نهار أبيض.. ده أنا كنت بتعامل معاكي بتبسط وبطريقة مش ولابد!" ضحكت نبيلة: "هتموتني بطريقتك دي، مفيش ملوك وباشوات دلوقتي يا سامر." سامر وشه اصفر وقال: "استني.. أنا جالي أمر إن اللي جاي دلوقتي (السيد حلمي الراوي) وعيلته." قالتله وهي لسه حزينة: "أيوة، أنا بنته." سامر تنح: "أنا اشتغلت معاه من سنين!" وفجأة افتكر بنت صغيرة بشعر كستنائي كانت بتجري في الفيلا.. "يا نهار أبيض! أنتي (شعلة المرح)؟!" نبيلة اتفاجئت: "عرفت لقبي ده منين؟" ضحك وقال: "أول شغل ليا كان عند والدك، ولما سافر ألمانيا وصى عليا عند السيد أكرم.. حتى الحضانة اللي وديت فيها ولادي كانت بتوصية منه عشان السعر يناسبني." قعد جنبها وقال بقلق: "نبيلة، اهدي وقوليلي فيكي إيه؟" قالت بمرارة: "نورا خلفت بنت.." سامر استغرب: "طيب وإيه المشكلة؟" بدأت تحكي بوجع: "أنا كنت متجوزة راجل بيحبني وبحبه، وحياتنا كانت وردي، لحد ما عرفت إني (عاقر) مابخلفش.. شهقاتها عليت وكملت: "هو مطلبش الطلاق، بس أمه جت تعيطلي وتترجاني أخليه يتجوز، وقالتلي هتجوزه واحدة غلبانة مالهاش حد ومش هتحسي بفرق.. وافقت وضغطت عليه لحد ما اتجوز." "وبعد الجواز؟ بقيت أنا الزوجة اللي مالهاش لزمة، بقيت (الشريرة) اللي بتهدد حياة أم الطفل المنتظر.. حتى هو اتغير، مابقاش يقولي كلمة حلوة، مابقاش يبتسم لي، كان بيجيب لها هي ورد ويواسيها وهو هاجرني أنا بالشهور.. مطلبتش الطلاق غير لما خلاص مابقتش قادرة." بكت بحرقة: "ودلوقتي، كل اللي تحمل أو تخلف تخاف مني، مرات خالي خطفت البنت من قدامي كأني هأذيها.. أنا بس كان نفسي أشم ريحتها، أنا مش حقودة والله." سامر عينه دمعت وفهم ليه كانت متبتة في "تيم" ابنه.. قام جاب لها عصير وقال: "اشربي واهدي، وتتحرق بنتها لو كانت دي آخر واحدة في الدنيا.. دي أصلاً شبه أبوها الكئيب وليها قورة زي قورة جدي لما قرع!" نبيلة ضحكت من قلبها، وسألت بسرحان: "تفتكر الحب ممكن يهزم الظروف؟ يعني لو حبيت واحدة، ممكن تتخلى عن حلم الأبوة عشانها؟" بص في عينيها وقال بصدق: "أسيب الدنيا كلها وأجري وراها لآخر عمري." نبيلة سكتت وتوهت في عينه، بس فاقت وقالت بسخرية: "أنت بتقول كده عشان عندك ولاد أصلاً." ضحك وقال يغلس عليها: "يا ستي الولاد مش كل حاجة، تلاقي ضرتك دي دلوقتي بقت شبه الفيل ووشها بقى زي الباندا من قلة النوم.. أنا لو مكانك أحمد ربنا." نبيلة عيطت تاني: "مش عايزة أكون حلوة، أنا نفسي أكون أم يا سامر، نفسي في طفل يقولي ماما." سامر مسك إيدها بحزم وحنية وقال: "كل حاجة ليها حكمة، الراجل ده لو كان بيحبك بجد مكنش عمل كده، واحمدي ربنا إنك كشفتيه دلوقتي قبل ما يكون بينكم ولاد وتتبهدلوا.. قولي الحمد لله يا نبيلة." نبيلة غمضت عينيها براحة وقالت: "الحمد لله." نبيلة حياتها بدأت تستقر وبقت مهتمة جداً بـ "تيم" (ابن سامر) وبتحبه كأنه ابنها، وسامر كمان بدأ يقرب منها جداً وبقوا يخرجوا يتغدوا مع بعض كتير. في يوم، سامر عزمها على خروجة في حديقة كبيرة ومعاهم الولاد (هيام وتيم) عشان يتبسطوا بالملاهي المائية. وهما قاعدين، سامر بدأ يفتح قلبه لنبيلة وقالها إن حياته اتغيرت وبقت منظمة وأجمل من يوم ما عرفها، وفضل يوصف ملامحها وإزاي هي بتكسف لما حد يمدحها، وده خلى القرب بينهم يزيد أكتر. على الناحية تانية، "نيرمين" (صاحبة سبيل) شافت نبيلة في الحديقة مع سامر، وراحت حكت لسبيل بمنتهى الحماس عن الراجل "اللي زي نجوم السينما" اللي كان قاعد مع نبيلة. سبيل طبعاً ولعت من الغيرة، لأنها رغم إنها شايفة نفسها أجمل، بس دايماً كانت بتحس بالنقص قدام رزانة ورقي نبيلة. سبيل قعدت تفتكر الماضي وإزاي كانت بتكره نبيلة لدرجة إنها خلت الكل يصدق إن نبيلة زقتها عشان تسقطها (وهي كذبة). سامر عزم نبيلة في مطعم بمناسبة عيد ميلادها، وقدم لها خاتم دهب رقيق جداً. نبيلة كانت طايرة من الفرحة، وبعدها سامر دخل في الموضوع "دغري" وقالها: "أنا بحبك وعايز أتجوزك". نبيلة من كتر الصدمة والكسوف مكنتش عارفة ترد، وفضلت تضحك ضحك عصبي، فسامر افتكرها بترفض وزعل وقام يمشي، فراحت نادهت عليه قدام الناس وقالتله: "استنى يا راجل سيبني أستوعب الصدمة!"، وانتهى الموقف بضحك وهزار بينهم في يوم تاني، سامر ونبيلة كانوا في مطعم وشافوا فرح على البحر، سامر صمم ياخدها ويروحوا يتفرجوا ويشاركوا الناس فرحتهم. ولأن نبيلة كانت لابسة كعب عالي ومش عارفة تمشي على الرمل، سامر بكل رقي نزل على ركبه وقلعها الجزمة وشالها في إيده! الصدمة فين بقى؟ إن "رائف" (طليق نبيلة) وزوجته "سبيل" كانوا قاعدين في نفس المطعم وشايفين كل ده! رائف كان هيفرقع من الغيظ وهو شايف مراته السابقة بتضحك ومبسوطة مع راجل "قمر" ومهتم بيها، في حين إن الناس اللي قاعدين معاهم فضلوا يمدحوا في نبيلة وسامر وإزاي هما لايقين على بعض. في حمام المطعم، سبيل سمعت اتنين ستات (صفية ومريم) بيتكلموا عليها وعلى رائف كلام زي الزفت، وإن رائف ده "مجنون" إنه ساب نبيلة عشان واحدة "حقودة" زي سبيل، وكشفوا إنهم عارفين إن حوار "الزقة من على السلم" ده كان تمثيلية من سبيل عشان تبعد نبيلة عن طريقها. نه: رائف روح البيت وهو قمة في الغضب وبيتكلم مع أمه بعصبية عن اللي نبيلة عملته (إنها ماشية مع واحد وعايشة حياتها). سبيل" قاعدة بتنفخ وبتقول لرائف: "أنا مش عارفة عقلك كان فين لما اتجوزتها! دي ست مش متزنة خالص وتصرفاتها مفيش فيها حياء." الأم اتدخلت وقالت بحدة: "عايزة أفهم حالا، إيه اللي حصل؟" رائف رد وهو بيشيط من الغضب: "الهانم الغبية، بعد ما اطلقنا، راحت ارتبطت بواحد وشوفتهم النهاردة في المطعم، لا وكمان خدها يرقصوا على الشاطئ قدام الناس ولا كأن في اعتبار لوجودي!" الأم ابتسمت بهدوء وقالت: "نبيلة ارتبطت؟ الحمد لله إن ربنا عوضها عوض خير." رائف اتجنن أكتر وقال: "عارفة مين اللي كانت معاه؟ ده رئيس حرس خالها! يعني بعد ما كانت مراتي أنا، تتجوز الـ... مش لاقي وصف أقوله!" الأم وقفتله وقالت بلهجة شديدة: "اسمعني كويس، البنت دي كانت وردة ومفتحة ومن ساعة ما عرفتك وهي بتدبل. أنا جوزتك غيرها عشان تخلف وتستقر، يبقى تسيب البنت في حالها." وبصت لسبيل بغيظ: "وانتي كمان، خليكي في حالك وفي حملك، وسيبوا الغلبانة دي تعيش، يمكن ربنا يسامحكم والحمل يكمل المرة دي!" سبيل اتصدمت ومعرفتش ترد، والأم سابتهم ومشيت وهي مش طايقة تبص في وشهم. تاني يوم، "سامر" راح شغله عادي، بس شاف "رائف" و"حسن" داخلين مع بعض، ودي كانت حاجة غريبة. رائف قرب من سامر وبسخرية قال: "مبروك يا سامر على الارتباط الجديد." سامر بصله ببرود وهز راسه وكمل شغله على التابلت ولا كأنه شايفه. رائف اتعصب وزعق عشان يسمّع الكل: "لما أكلمك تقف وتحترمني يا زبالة!" سامر رفع عينه وقاله بتهديد: "كلمة تانية وهخلي وشك ده خريطة." رائف مسك سامر من هدومه بعنف: "أنت مش عارف أنا مين؟ أنا رائف مندور، وبفلوسي وعلاقاتي أمحيك من على وش الأرض!" سامر زقه جامد، والمدير "أكرم" دخل بينهم: "في إيه اللي بيحصل هنا؟" رائف كمل بسخرية: "اسأله كان فين امبارح؟ ده كان قاعد في مطعم مع اللي هتبقى مراته، اللي هي تبقى (بنت أختك) يا أكرم بيه!" أكرم اتصدم وبص لسامر، فسامر رد بثبات: "فعلاً، قابلتها عشان أعرف رأيها قبل ما أكلم والدها." رائف قعد يغلط ويقول إن سامر "بينافس طبقة أعلى منه بمراحل"، فأكرم طرده هو وحسن وقالهم مفيش مكان للكلام ده هنا. رائف قبل ما يمشي وشوش سامر بكلمة "وسخة"، خلت سامر يفقد أعصابه وينزل فيه ضرب وتقطيع لدرجة إنه كسر له دراعه وشوه ملامحه، والناس بالعافية خلصوه من إيده. ال رائف فاق في المستشفى وعينه على الانتقام. "حلمي" (أبو نبيلة) راح يزوره، فرائف استغل الفرصة ولبّس سامر التهمة وقال: "يا عمي، نبيلة كانت مراتي ومقبلش حد يمس كرامتها، وسامر كان بيتباهى قدام الناس بكلام مش كويس في حقها، ولما جيت أدافع عنها ضربني." حسن شهد زور مع صاحبه، وحلمي صدقهم واتجنن. ا حلمي رجع البيت، نزل قلم على وش نبيلة وقالها: "دي التربية؟ تخرجي مع واحد من ورايا ويقعد يتباهى بيكي ويقول كلام خادش للحياء عشان يستفز رائف؟" ورغم إن نبيلة حاولت تدافع، أبوها كمل بكسرة نفس: "انتي غبية؟ سامر ده واحد بتاع مصلحته، تفتكري واحد زيه هيحب واحدة (عاقر)؟ ده عايز واحدة تخدم عياله وبس!" نبيلة الدنيا اسودت في عينها، وراحت لسامر المكان اللي بيقعد فيه قدام البحر. شافت هدوءه فاتعصبت أكتر وقالتله: "ممكن تفسر لي الفضيحة اللي عملتها لي دي؟" سامر استغرب: "فضيحة إيه؟" قالتله بصراخ: "رائف حكى لبابا كل حاجة! إنك كنت بتتباهى بيا وبتقول إني خاتم في صباعك وكلام وسخ عني!" سامر ابتسم بوجع وسخرية: "وانتي طبعاً صدقتي؟" نبيلة قالتله: "أنا عارفة رائف من الجامعة وعمري ما شوفت منه كدب، لكن أنت استغليتني عشان أخدم عيالك!" هنا سامر مقدرش يسكت وزعق فيها بصوت رعبها: "قومي من قدامي حالاً! غوري قبل ما أخليكي تحصليه في المستشفى.. غوري!" قالت وهي بتترعش: "على الأقل برر عملتك السودة دي قبل ما أمشي! الدنيا كانت ماشية زي الفل، إيه اللي خلاك تتكلم بالطريقة دي مع رائف وتضربه بالقسوة دي؟" مابصش ليها خالص وقال: "مبقاش فيه حاجة محتاجة تبرير يا بنت القاضي الحكيم العادل.. اطلعي بره حالاً." غضبها ولع وهي شايفة النظرة اللي في عينيه وهو بيفكرها بشغل أبوها، جرت من قدامه وبدأت تهدى شوية عشان تستوعب اللي قالته، بس رجعت سألت نفسها: "هسمع منه إيه تاني بعد ما اتكلم عليا بالطريقة دي مع طليقي وضربه بالشكل البشع ده؟" رجعت بيتها وهي تايهة بين الندم والغضب، ومش عارفة ترتاح إزاي. وقفت قدام الباب وقدام أبوها وأمها، عينيها راحت للسما ووقعت مغمى عليها. "نبيلة يا بنتي.. وقفتي قلبنا عليكي!".. قالتها أمها بخوف بعد ما فاقت، وأبوها قال بهدوء وهو شايف حالتها الصعبة: "أظن لحد هنا وكفاية.. أول ما تشدي حيلك هخلص ورق السفر وهنسافر من هنا تاني." نبيلة هزت راسها وهي بتعيط من غير كلام، وهو اتنفس الصعداء؛ كان هيتجنن ويقتلها لما لقاها رايحة لسامر برجلها، بس ارتاح لما لقاهم اتخانقوا. بعد كام يوم، أستاذ أكرم راح يزور سامر في بيته بعد ما استقال وسحب ولاده من الحضانة واختفى تماماً. قعد يتكلم معاه ربع ساعة وسامر مش بيرد، بس باصص لإيديه اللي مشبكهم في بعض. أكرم اتنهد وقال: "اسمعني يا سامر، أنا عارف إن فيه حاجة مش صح حصلت ومحدش يعرفها غيركم، لو ده حقيقي قولي عشان نتصرف." أخيراً سامر فتح بقه وقال بصوت مجهد: "مفيش كلام يتقال يا أستاذ أكرم.. متشكر على ثقتك فيا بس ملوش لازمة نفتح الموضوع ده تاني، هو اتقفل خلاص." أكرم قام وقال: "براحتك، بس خليك عارف إن الغضب ممكن يعمي حلمي ونبيلة والكل، بس أنا واثق فيك وعارف إنك مابقتش زي زمان وبقيت بتتحكم في أعصابك عشان خاطر ولادك، وأنا متأكد إن اللي حصل ده وراه حاجة تانية.. أنا جنبك دايماً لو احتجتني." سامر هز راسه بابتسامة مهذبة، وبعد ما أكرم مشي، قعد يبص للبيت الساكن حواليه بوجع. قام دخل الأوضة اللي بينام فيها مع ولاده وهو بيفكر: "هعمل إيه دلوقتي؟ الشغل وسيبته، وعندي حتة أرض بتطلع قرشين كل موسم بس مش هيكفوا، ومش عارف بعد السمعة اللي طلعت عليا دي حد هيرضى يشغلني أصلاً؟" بص لولاده بوجع وضمهم لصدره ونام جنبه وقال بصوت واطي: "رجعنا تلاتة مع بعض تاني.. مكنش من حقنا نفرح، بس هعمل كل اللي أقدر عليه عشانكم وهنقفل الصفحة دي للأبد." مرت أيام ونبيلة رافضة تتكلم مع حد، لحد ما حصلت المصيبة الكبيرة. أمها دخلت عليها بتوتر وقالت: "نـ.. نبيلة، فيه حد عايز يكلمك تحت." نبيلة اتصدمت وافتكرت إنه سامر جاي يعتذر، بس أملها خاب لما أمها قالت: "رائف تحت.. انزلي إحنا استقبلناه أنا وأبوكي." لبست ونزلت ببرود، عايزة تعرف هو جاي ليه. لقت أبوها باصص لها بحيرة وقال: "نبيلة، رائف جاي النهاردة بطلب وصمم يكلمك فيه بنفسه." رائف قال: "أنا قولت لعمي على الكلام اللي الناس بتقوله بسبب اللي عمله سامر ده، والكل بقى بيجيب في سيرتنا بالسوء.. خلينا نتجوز تاني وأنا هخرس أي حد يفتح بقه عليكي، إنتي غالية عندي وماكنتش هسيبك لولا إصرارك، وهعملك كل اللي تتمنيه." أمها وشها اتقبض بغضب، وأبوها غمض عينيه بيأس، ونبيلة وشها كان لوح تلج. رائف لما شاف الرفض في عينيهم قال بسرعة: "مش لازم تردوا دلوقتي، فكروا.. بس يا نبيلة لازم تعرفي إن مفيش حد هيحميكي ويقف جنبك طول ما هو عايش غيري." ابتسمت بسخرية وهو ماشي، وطلعت أوضتها من غير ولا كلمة. تاني يوم، الحاج حلمي اتفاجئ بواحدة بتصرخ بغضب قدام البيت، أمر الشغالة تفتح لها، ونبيلة وأمها نزلوا بفزع. الصدمة كانت إن "سبيل" هي اللي بتصرخ وتقول لنبيلة: "يا خطافة الرجالة! عايزة إيه؟ استأجرتي الراجل ده عشان تعملوا التمثيلية الهابطة دي وتجرجري رائف ليكي تاني يا عديمة الحياء!" الحاج حلمي غضب وقال: "إنتي بتقولي إيه؟ اطلعي بره حالاً وإلا هطلب لك البوليس!" سبيل شاورت بتهديد لنبيلة اللي واقفة مصدومة: "أنا ليكي بالمرصاد، مش هسمح لك تخربي حياتي يا خرابة البيوت يا نذير الشؤم!" طردها الحاج حلمي بمساعدة الشغالات، وكان هيتصل برائف يبهدله، بس وقف لما سمع صوت مراته بتصرخ على بنتها اللي بدأت تنهار وتشد في شعرها وتصوت: "سيبوني في حالي! أنا كل اللي كنت عايزاه حياة سعيدة، ليه الكل ضدي؟ أنا عملت إيه عشان يحصلي كل ده؟ ابعدوووووا عني!" كانت بتنتفض بعنف لحد ما وقعت فجأة مغمى عليها وعينيها زايفة. أمها صرخت: "اتصل بالدكتور حالاً، جسمها بيتشنج!" الدكتور جه، وهو عارف تاريخها من أيام رائف وموضوع عدم الخلف لغاية اللي حصل دلوقتي، وقال بهدوء: "مينفعش تعيش تحت الضغط ده دلوقتي يا حاج حلمي، إحنا اتكلمنا في ده قبل كدة.. مكنش ينفع تقابل رائف ولا تسمع منه عرض زي ده." حلمي اتنهد بتعب: "والعمل؟ أنا برتب ورقي عشان نسافر قريب." الدكتور هز راسه: "ده هيفيدها، بس بلاش تبعدها وقت طويل.. خليها تهدى وبعدين واجهيها بالحياة، مش هتفضل طول عمرها ضعيفة كدة." حلمي قام يحاول يخلص الإجراءات بسرعة عشان يمشوا. عند سامر اللي بقى عاطل، ومحدش رضي يشغله، بص لولاده وهما بيلعبوا على الأرض بحسرة. الفلوس بدأت تخلص، وأكرم كان وصى عليه عند ناس مهمة من غير ما يعرفه، بس سامر لما عرف انسحب بهدوء؛ هو عايز ينسى العيلة دي تماماً. بس ولاده؟ معلش، هيسعى في أي شغلانة مهما كانت، ومش هيستسلم. فكر يكلم أعمامه بس تراجع.. راجل زيه يروح يعيط لأهله عشان يساعدوه؟ لا والله، مش هيحط ولاده في الموقف ده أبداً، وهيتكفل بيهم حتى لو جاع عشان يشبعهم. بعد أيام، نبيلة سافرت غصب عن رائف، اللي أبوها عرفه إن اللي حصل لنبيلة كان بسبب مراته، وإنه أصلاً مفكرش ثانية في عرضه "المخزي" ده. الحلقة الخامسة: بعد مرور تلات سنين "هيام.. تيم.. هتتأخروا، يلا!" قالها سامر وهو ماسك علب الأكل اللي حضرها لولاده. هيام خرجت وهي ماسكة إيد تيم اللي لسه نعسان وقالت بضيق: "تأخرنا بسبب دلوعك ده، كنت بلبسه وبسرح شعره المنكوش اللي إنت مش راضي تقصه!" سامر ابتسم بحنان وباس راسها: "ربنا يخليكي ليا يا هيام، إنتي ساعدتيني لما اهتميتي بأخوكي عقبال ما حضرت الفطار، لولاكي كنا اتأخرنا يا بنتي يا قمر." الزعل راح من وشها وقالت بنشاط: "ما تقلقش عليه، أنا بروح له في الحضانة دايماً وأوصيت عليه أبلة هناء وأبلة نها، وهو شاطر ومش بيعمل مشاكل." سمعوا صوت الباص، فداهم المصروف والأكل وقال: "يلا بسرعة الباص جه." وهما خارجين قابلوا بنت شابة قالت بتوتر: "أنا آسفة يا أستاذ سامر، ذاكرت لكتير ونمت ومقدرتش أصحى بدري." سامر لوح لولاده في الباص وقال بابتسامة: "ولا يهمك يا أسماء، أنا حضرت الأكل وهيام اهتمت بتيم، مفيش داعي للتوتر ده.. إنتي رايحة الجامعة النهاردة؟" قالت له: "لا، أنا نسيت إن السبت مدرسة وجيت عشان أقعد معاهم، فكرت أعملهم أكل وأروح البيت وأرجع وقت خروجهم." سامر قال لها: "خلاص تعالي أوصلك في طريقي." أسماء طالبة في آخر سنة تربية، كانت جارته زمان، ولما عرفت إنه محتاج مربية اتقدمت، وسامر وافق فوراً لأنها وأهلها كانوا بيحبوا ولاده. هو مرتاح لها جداً ومعاها نسخة من مفتاح البيت. أوصلها وراح لشغله اللي بناه بالدم والدموع.. شركة حراسات خاصة صغيرة، لسه في بدايتها بس مكفياه، وحاله بقى ميسور جداً عن الأول. بص للحظة على "العكاز" اللي بيسند عليه دلوقتي عشان يمشي، عينيه اسودت بوجع واستغفر ربه ودخل مكتبه. "أهلاً يا أكرم، حمد لله على السلامة!".. قالتها الست صفية وهي بتحضن أخوها. أكرم رد بسعادة: "أنا بخير يا حبيبتي، وحشتوني جداً.. تلات سنين يا صفية بره البلد!" صفية قالت بحزن: "إنت عارف سافرنا ليه، بس الحمد لله نبيلة اتحسنت شوية." دخل الحاج حلمي وسلم عليه، وصفية خرجت تنادي نبيلة. أكرم قال بغضب لحلمي: "أنا مش مصدق إنك لسه ما قولتش لنبيلة على اللي حصل!" حلمي رد بتعب: "وأعمل إيه؟ إنت شوفت حالتها كانت عاملة إزاي، والدكتور قال نبعدها عن أي حاجة تزعجها." أكرم رد بنرفزة: "ما هو سبب حالتها إنها فاكرة إن..." أكرم قرب من حلمي أكتر وقال له بحزن وغضب مكتوم: "رائف اتهمه بالزور، ومع كدة سامر مانطقش بالكلمات القذرة اللي القذر ده قالها عشان ما يسيئش ليك ولا لبنتك أكتر.. ده استقال واتطرد من الشركة بتوصية من رائف، وعرفت من جيرانه القدام إنه وصل لمرحلة ماكانش لاقي في بيته لقمة يسد بيها جوعه! مش بس كدة، رائف بعتله عصابة ضربوه عشان يعملوا له عاهة مستديمة، ونجي بصعوبة ودلوقتي ماشي بعكاز.. حاولت أساعده كتير بس نفسه عزيزة، حتى مارضيش يطلب مساعدة من أهله.. مش يستحق بعد كل اللي عرفته إنك تحترمه على الأقل؟ وتحاول تعوضه عن اللي اتكسر جواه؟ والمسكينة بنتك مش من حقها تعرف إن سامر كان مظلوم وإنه كان عايزها بجد مش لسبب تافه زي ما قلت لها عشان تبعد عنه؟ بنتك مش من حقها تعيش سعيدة مع راجل بيحبها؟ إحنا كبرنا يا حلمي ومش هنعيش لولادنا طول العمر". حلمي وشه بهت وقال بصدمة: "أنت بتقول إيه؟ أنا ماكنتش أعرف غير إنه كان مظلوم وإنه استقال واختفى، ماكنتش أعرف إن رائف أذاه كدة.. يا الله! ده شيطان في هيئة بشر!"، بس رجع قال: "اسمع يا أكرم، الموضوع انتهى، وأنت قلت إنه شغال دلوقتي وحياته ميسورة وبنتي نسيته، فاقفل على السيرة دي". "بالبساطة دي يا بابا بتقفل الموضوع؟" الاثنين اتلفتوا بقلق وشافوا نبيلة واقفة بصدمة ودموع، وجنبها صفية اللي حاطة إيدها على بوقها مش مصدقة. حلمي قال بسرعة بيحاول يهديها: "حبيبتي اهدي وهشرح لك كل حاجة، بس اهدي". قالت بصوت واطي وهي بتشهق: "أهدى إزاي؟ كنت شايفني بتعذب وبتحرق بنار الحزن والغضب وليه ما قلتليش؟ كل ده عاناه لوحده بسببي وأنا كنت برا بستجم عشان نفسيتي تتحسن؟" بدأت تتكلم وهي مش دريانة بنفسها وبتبص للفراغ: "الراجل اللي بتتكلموا عنه ده هو الوحيد اللي كان بيدفعني لقدام، ماشفتش منه حاجة وحشة أبداً". بصت لأبوها بحزن وكملت: "صدقتك وما صدقتوش.. جرحته وقلت كلام ماكنش ينفع أقوله، كان بيحبني كأني الوحيدة على الأرض.. هعيش إزاي دلوقتي وأنا عارفة إني ظلمته؟ ضاع عمري يا بابا، كان ممكن نكون متجوزين دلوقتي وعايشة حياة طبيعية، بس أنت حرمتني من الفرصة دي". أبوها قال بلهفة: "أقسم بالله ما كنت أعرف غير إنه مظلوم ومشي، ماكنتش أعرف إن رائف بالانحطاط ده". نبيلة ماردتش وسابتهم ودخلت أوضتها انهارت من البكا، وقررت تروح له وتعتذر مهما كان التمن. مسحت دموعها وغسلت وشها ونزلت قالت لأمها إنها خارجة شوية. وقفت مكانها زي الصنم بقالها خمس دقايق، مش قادرة تقرب أكتر.. كان قاعد مكانه المعتاد قدام البحر، قدامه كوباية الشاي وطبق الكعك، ومغمض عينيه في سكون. راقبته بشوق بس خجلت تقرب، فرجعت لعربيتها ومشيت. رجعت البيت لقت أهلها مستنيينها بقلق، سلمت بهدوء وطلعت أوضتها، وقرروا يسيبوها براحتها بس يراقبوها. تاني يوم تليفونها رن، كانت "نها" اللي قالت بحماس: "نبيلة حبيبتي، واصلة مصر بقالك أيام وما تقوليش يا خاينة؟" نبيلة ردت بتعب: "معلش يا نها انشغلت، أنا كويسة". نها قلقيت: "صوتك مش كويس خالص، هخلص شغل في المدرسة وأجيلك". نبيلة قالت بقهر: "كان مظلوم طول الوقت يا نها"، وحكت لها اللي عرفته، بس لاحظت إن نها بتسمع ببرود، فسألتها بدهشة: "أنتي كنتي عارفة؟" نها ابتسمت بحزن: "الكل هنا كان عارف، أنا شفته وهم شايلينه للمستشفى، وتيم وهيام في المدرسة اللي بشتغل فيها.. ما قلتلكيش عشان حالتك، وأبوكي نبه علينا مانجيبش سيرته.. بس ما تقلقيش هو بخير دلوقتي". نبيلة بكت تاني، فنها حاولت تهديها: "خلاص ده بقى ماضي، خليكي قوية لو عايزة تصلحي اللي حصل، مش مشتاقة لتيم وهيام؟" نبيلة افتكرت لما قالت له بصلف إنه عايزها خدامة لولاده، فابتسمت بوجع. نها قالت بحماس: "ده عنوان المدرسة، تعالي بكرة شوفيهم بعد الدوام". وقفت نبيلة قدام المدرسة، لقت نها ومعاها طفل زي القمر، عيونها دمعت لما شافته. قربت منه وقالت: "يا حبيبي يا تيم، كبرت ماشاء الله، تعالى في حضني". بس الصغير خاف واستخبى في نها وقال: "مين دي؟ أنا عايز هيام، هي مشيت وسابتني؟" نها ضحكت: "لا يا حبيبي، هي بتكتب ونازلة هي وأسماء". نبيلة استغربت مين أسماء دي، ولقت بنت في العشرينيات جاية تضحك وتشيل تيم وتقبله، وتيم بيقول لها: "أنا جعان يا أسماء". أسماء انتبهت لنبيلة وقالت: "أوه أهلاً، معلش انشغلت بتيم، أنتي صاحبة نها؟" نها قالت: "أيوه، وكانت مدرسة هيام زمان". هيام جت تجري وهي بتقول: "أسماء أنا واقعة من الجوع، أوعي تقولي بابا اللي عمل الأكل النهاردة!" الكل ضحك، وهيام شافت نبيلة وحضنتها: "مدرستي الجميلة أم شعر بيلمع!" نبيلة ضمتها بحب: "وحشتيني يا هيام". فجأة أسماء قالت: "ده باباهم بيتصل، أكيد وصل.. ألو، أيوه إحنا خارجين، لا ما تجيبش أكل أنا طبخت خلاص". وقفت نبيلة بعيد تراقب سامر وهو ساند على عكازه عند العربية، بيقبل ولاده وبيركب وجنبه أسماء والولاد ورا.. شكلهم أسرة متناغمة. نبيلة حبست دموعها، ونها طمنتها: "اهدي، أسماء دي مربية ولاده وبنت جيرانه القدام، وبيعتبرها بنته وهي مخطوبة أصلاً وشغالة معاه عشان تجهز نفسها". قعدوا في مطعم ونها حكت لها عن يوم الحادثة: "كان بيوصل هيام والمدرسة غالية فكان بيوصلها بنفسه، ويومها نسينا الأكل فطلعت أجري وراه، لقيت رجالة محاوطينه في شارع جانبي.. كان بيحمي ابنه تيم ومش عارف يدافع عن نفسه، والناس واقفة تتفرج خايفة.. تيم اتصاب في رأسه، وسامر كان بينضرب وهو شايل ابنه، عينه كانت غرقانة دم بس شاور لي آخد الولد للمستشفى واستسلم لضربهم.. الشرطة جت متأخر، وأنا خدت الولد ورحت المستشفى، ولما فاق اتصلت بقرايبه وسلمتهم الأمانة ومشيت.. كان منظر فظيع، كأنهم عايزين يقتلوه". نبيلة وشها اصفر ودموعها نازلة بصمت، نها قلقت عليها، بس نبيلة قالت بصوت مبحوح: "أنا بخير، عايزة أروح". تاني يوم، دخلت نبيلة مكتب سامر الصغير، كان الباب مفتوح، دخلت براحة ووقفت تراقب وهو بيمضي ورق.. رفع رأسه وشافها، وبص لعيونها المرتبكة، وقال ببرود: "أهلاً وسهلاً، اتفضلي". قعدت قدامه بتوتر: "مرحباً سامر". رد ببرود: "بخير شكراً، أخدمك بإيه؟ مش أظن إنكم محتاجين حراسة، السيد حلمي مش بيغيرهم كتير". بلعت ريقها وقالت بخفوت: "ماجيتش عشان شغل، جيت أعتذر، ولو إن الاعتذار مش كفاية". رد بسخرية وهو بيبص لخاتمها: "جزاكِ الله خيراً، دايماً سباقة بالخير يا نبيلة.. اعتذرتي، وبعدين؟" قالت برعشة: "عارفة إني أستاهل تطردني، بس أنا هنا للاعتذار، أرجوك اسمعني".

مقالات ذات صلة

ليلة خماسينية شديدة الحرارة.. تحذير شديد من طقس اليوم: «بث تجريبي للصيف»

واحدة من أعظم ألغـ،ـاز التاريخ

الشيطان وقع اسيرها الجزء الثالث والرابع بقلم سولييه نصار

لولا الغرام الفصل الرابع بقلمي روز أمين

الطيب

حماتي عندنا

اترك تعليقاً إلغاء الرد