غيبات تمر بالعشق مروة البطراوي الجزء الرابع

زفرت ريحانة بحنق قائلة: أوهمني إن في أمل وبيتعالج وطبعًا حضرتك عارفة أنا كنت بحبه قد ايه هو كمان كان دايمًا رومانسي.
واستطردت تزفر بحنق قائلة: عيبه الأنانية اشتغلت وتعبت وهو أخد مني كل حاجة على الجاهز. حاجة بقي كانت ديما شكران تقولها ليا جوازتك زي الشغل لما تيجي تسيبيه وصاحب الشغل يكون مش موافق بيشهر بيكي في بقية الشركات وبيقطع عيشك وأنا أقدر أطلعلك شهادة إنك عندك عيب خلقي في الرحم وعمر ما حد هيرضى يتجوزك.
لوت ياسمين شفتيها قائلة: مفيش راجل بيطمر فيه ولما بنلقيه قدامنا مش بنصدقه لأن خلاص اتربت العقدة أما شكران هتفضل طول عمرها زبالة وواطية.
وجدت ريحانة في حديث ياسمين بصيص أمل فسألتها قائلة: هتقبلي أن أقعد عندك لفترة لحد ما هو يزهق تدوير ويمل مني ولا أشوف مكان تاني.
تنهدت ياسمين قائلة: البيت بيتك يا ريحانة يا ريتني كنت أقدر أعمل ليكي حاجة أكتر من كده..بس أنتِ رافضة حتى نورا تعرف، ومعاكي حق أنا قلتلها بلاش زيدان يا نورا.
هزت ريحانة رأسها ترفض قائلة: لا اوعي يا طنط نورا دلوقتي تعتبر معاه وفي صفه وهتلومني زيها زيه وهتحاول ترجعني ليه بأي طريقة.
ولكن أوقفت ريحانة حديثها وعقدت ما بين حاجبيها قائلة: ليه قلتي لنورا بلاش زيدان رغم إنك يوم الفستان كنتِ فرحانة.
قطبت ياسمين جبينها قائلة: وهي نورا مش قالتلك الكلام اللي قلته ليها.
هزت ريحانة رأسها بنفي لتزفر ياسمين بحنق قائلة: بصي نورا جت قالتلي ريحانة هتتجوز سألتها مين قالت زيدان يعني مش كفايه اتجوزتي ابن أخو شكران راحه تتجوزي ابنها لا كده كتير.
: صممت أقولها سبب رفضي..قلت ويا ريتني ما قلت كان ردها عليا زي السكينة التلمة بلاش تتهمي العالم وأنتِ جواكي وقاحة وطبعَا قعدت تقلب.
هزت ريحانة رأسها بعدم فهم لتبتسم ياسمين بمرارة قائلة: الموضوع بقاله كتييير زمان كنت مخطوبة لوالد زيدان ..طبعًا أنا بنت شريكه وهي بنت السواق بتاعنا..بس ايه طالبة في الطب وطبعًا كل هدومي وكل ما أملك بيعطيهم ليها بس يعني مش أول ما بجيبهم مش تشكر ربنا لا دي تروح تدور على خطيبي اللي أنا وهو بنحب بعض من واحنا صغيرين وطبعا بطريقة رخيصة كان بيشوفها عندنا كتير وطبعًا كانت راسمة وش الملاك وكانت بتحكيله اني بعايرها وهو كان خايف على مشاعري وخايف يقولي على عيب في..مرة اتجرأت وراحت له في حوار عبيط إن أنا طردتها هي وأبوها ولازم يشوف لها شغل لأن دي أخر سنه ليها كان بيظبط البيت بتاعنا وكان هناك لوحده..راحت وعملت الفيلم بتاعها العبيط قام يعمل لمون..قالتله عنك يا باشا..وعملته هي ولكي أن تتخيلي فاق لقاها عريانة.
شهقت ريحانة قائلة: ومش خايفه ليخلى بيها.
تعالت ضحكات ياسمين قائلة: عادي طالما زي ما هي في غيره يقع بنفس الفخ بس هو كان أرض حلوة أوي..وعادى الكل واتجوزها معرفش بقى هو حبها زيادة ولا ايه مش يهمني.
والطبيعي صدقت إنه حصل ما بينهم حاجة بعد فترة اتجوزت وخلفت نورا واتقابلنا في حفلة عمل جه وقف جمبي وقالي سامحيني ده كان فخ اكتشفته بعد ما اتجوزتها هي فكرت إن وقفتنا بنعيد اللي فات وقعت بيني وبين أبو نورا. بدأ الراجل يكرهني وبعدين زهق مني لجأ للتعاطي، ومات الله يسامحه ويسامحها يا ريتها سكتت خافت بعد ما مات يلف عليا أبو زيدان من جديد قامت مسلطة عليا ميشو اللي محدش يعرفه بقا إن ميشو ده زي قصي بس في حاجة دي طبيعة في ميشو مش مجرد دوا غلط كان ممكن أفضحه وأبرأ نفسي بس أنا فيا منك كتير عندي حتة رحمة ونفسي أشتالها وأخلص وأرتاح بس سيباها لنورا يمكن تحن عليا.
تنهدت ريحانة بتعب قائلة: نورا بتحب بتحب أمير دراعه اليمين بتحبه رغم عيوبه وبتثق فيه.
واستطردت بسخرية قائلة:..أنا نفسي بستعجب على نورا القوية تقع الوقعة دي ازاي؟
