برغبتها الجزء الثاني
سامر غمض عينه بيدعي القعدة تخلص على خير، وحلمي بص بغضب لأكرم اللي ضغط على دراعه يهديه. سامر قام لمكتبه يرد على التليفون، وفجأة سمعوا صوت تكسير باب المكتب. “عودة”.. الصمت عم المكان ما قطعوش غير صرخة أكرم لما لقى حلمي وقع عليه ومغمى عليه. الكل جري يحاول يفوقه ولما يئسوا خدوه على المستشفى.
الدكتور طمنهم بابتسامة: “هو بخير، السكر والضغط نزلوا بس من التوتر، شوية وهيخلص المحلول ويخرج معاكم”. الكل هدي، ونبيلة كانت تتمنى الأرض تنشق وتبلعها من كتر الخجل. حلمي فاق وبدأ يتكلم بتعب، لقى الحاج شريف قاعد جنبه بيطمن عليه. حلمي بص لنبيلة اللي واقفة ورا بكسوف ومعاها سامر اللي كان ساكت تماماً، وقال بعصبية: “أنتوا الاتنين برا! مش عايز أشوف وشكم، هتقتلوني.. اخرجواااا”.
الرجالة حاولوا يهدوه، والحاج شريف قال بشراسة: “ما قالك غورا من قدامه! هتقتلوا الراجل؟” خرجوا فعلاً وقعدوا في الانتظار. لما الباب اتقفل، حلمي قام بمساعدة شريف وأكرم وراحوا ورا عادل اللي واقف ورا الباب يتصنت عليهم. سامر اتأوه من وجع رجله وهو قاعد، نبيلة قالت بقلق: “يا لهوي مالك؟” قال بهدوء: “مفيش، بس عشان اتحركنا بسرعة.. تعودت”.
رجعوا للصمت تاني، وبعدين قال: “أنتي كسرتي باب المكتب ودخلتي زي الثور الهايج بتصرخي بكلام غريب، خدتي بالك؟” بربشت بعينها بإرتباك وبصت الناحية التانية، وفجأة افتكرت السبب وبصتله بغضب ومسكت ياقته: “أيوة فكرتني، وعملت كده فعلاً.. إزاي تتجرأ تفكر في واحدة تانية؟”
بعد إيدها وهو بيبص للممر الفاضي وقال بغضب: “أنتي اتجننتي؟ جواز إيه؟ أنا مافكرتش أصلاً، ده عمي شريف اللي عرض عليا غيداء وماعرفش أنتي عرفتي منين بس أنا رفضت.. يا غبية”. بص الناحية التانية وكمل: “وبعدين مش أنتي اللي اختفيتي من ليلة الحفلة لما شوفتي حالتي؟ رد فعلك ده خلاني أرفض الجواز أكتر من الأول”.
هي بصتله بتفاجؤ، وهو كمل بشرود: “كنت رافض عشان مراتي ما تفتكرش إني واخدها تخدم ولادي وتخلي حياتي جحيم، ودلوقتي انتبهت إني مابقتش سامر القوي بتاع زمان، دلوقتي عندي رجل بحمد ربنا إنها بتتحرك حتى لو بصعوبة”. الكل ورا الباب اتأثروا، ونبيلة دموعها نزلت. كمل وقال: “مش هكدب عليكي، لما باباكي وأكرم طلبوا يقابلوني اتوترت، وكنت ناوي أبعد عنك، بس لما لقيت الكلام ودي رجعلي الأمل.. بس أنتي جيتي النهاردة زي المجانين وبوظتي الدنيا، أبوكي هيقتلني.. أوه نبيلة!”
