لقاء في القطر الجزء الثاني

ولكن والدتها .. عفاف .. تشعر بحرقة قلب ابنتها ويحترق قلبها لأجلها .. كيف يمكنها مساعدة ابنتها .. كيف يمكنها أن تُزَوِّج ابنتها لرجل وابنتها تحب آخر .. وأثناء حديث العقل معها يأتيها صوت رجل ..

أمجد : حضرتك والدة الانسة مروة ؟
عفاف : ايوة انا .. خير ؟
أمجد : انا يشرفنى اتقدم لها وكنت عايز معاد من حضرتك اجى البيت فيه واتقدم بشكل رسمى ..
عفاف : نعـــــــــــــم ..

تلاحظ آية وقوف أمجد بجانب والدة مروة ويتحدث معها … وكادت أن تسأل مروة ما بال ذلك الرجل يلاحق مروة والآن والدتها ولكن يأتيها صوت حاتم ..

حاتم : مبروك لأجمل آية شوفتها فى حياتى ..
آية ( فى خجل ) : الله يبارك فيك ياحاتم ..
حاتم : الجميل كان بيبص على ايه ؟
آية : فى واحد واقف مع طنط مامة مروة ونفس الراجل ده كان واقف امبارح بيتكلم مع مروة ولما سألت مروة امبارح قالت لى واحد مجنون .. هو جنانه وصله هنا ازاى ؟
حاتم : .. بصى ياستى الواحد ده يبقى أمجد صاحبى وشاف مروة امبارح وعجبته .. ودلوقتى بيكلم مامتها عشان يتقدم لمروة ..
آية : ايه ده هو لحق قالك ؟
حاتم : طبعا قالى من امبارح واحنا فى خطوبة أيمن اصلا ..
يأتيهما صوت أيمن قائلاً ..
أيمن : سامع حد بيجيب فى سيرتى ..
آية : لسة بنقول اسمك ياأيمن ..
أيمن : ليه بقى .. يارب بس يكون بالخير ..
فاطمة : اكيد طبعا بالخير ياأيمن مش برده بيحبوك ..
أيمن ( فى همس لفاطمة ) : هما بس اللى بيحبونى ..
فاطمة ( فى همس ) : ششششششششششش هيسمعوك ..
أيمن : ولا يهمنى اللى عايز يسمع يسمع .. المهم ياحاتم بتجيبوا سيرتى ليه بقى ؟
حاتم : آية اخدت بالها من أمجد واهتمامه بمروة فقلت لها عليه وانك عارف ..
أيمن : اااااااااه .. خلاص ماشى .. المهم بقى الف مليون مبروك ليكم ياعرسان .. بجد انتو تعبتوا قلبنا لحد ما اتخطبتوا ..
حاتم ( غامزاً ) : معلش بقى مش حاجة تيجى سهل زيك انت وفاطمة ياعم ..
أيمن : ياستير يارب انت بتحسدنا واللا ايه ياض انت ..
آية : .. احلى صحوبية هى اللى بينكم دى .. ناقر ونقير ..
أيمن ( غامزاً ) : وأحلى حب هو اللى ما بين حاتم وآية .. برده ناقر ونقير ..

حاتم : ياللا يابنى روح خد خطيبتك واتشمسوا فى البلكونة شوية وخلونى بقى استفرد بخطيبتى شوية ..
فاطمة : بقى كدة ياسى حاتم .. ماشى ماشى .. ثم نتشمس بالليل ازاى بقى ..
حاتم : أيمن الله يكرمك ابقى فهم فاطمة اللغة بتاعتنا ..
أيمن : من عنية ياعريس ..