لقاء في القطر الجزء الثاني

مرَّ أسبوع على تلك المقابلة لم تتحدث فيه مروة مع أحد حتى مع والدتها وفقط كانت تصلى صلاة الاستخارة . حتى دخلت عليها والدتها بعد مرور أسبوع للتحدث معها قليلاً ..

عفاف : انا مش فاهمة ايه لزمة تقفلى على نفسك ومتكلميش حد .. هو احنا حندبحك يابنتى ده جواز ..
مروة : لا ياماما انا بس بفكر وبصلى وكنت محتاجة ابقى لوحدى عشان ماخدش قرار عن ضغط او سرعة ..
عفاف : بالله عليكى يامفترية انتى شوفتى حد قالك لا غصب عنك حتتجوزيه ..
مروة : ياماما مقصدش انا بتكلم عن نفسى ..
عفاف : طيب ياميرو ووصلتى لايه ..
مروة : كلمى أمجد ياماما وقوليله يجى عشان يتفق على كل حاجة ..
عفاف ( فى سعادةٍ طاغية ) : بجد .. يجد يامروة .. بجد ياحبيبتى وافقتى ..
مروة : ايوة ياماما واهى حتبقى فترة تعارف فى الاول وربنا يسهلها ..
عفاف : الحمد لله ليك يارب .. الحمد لله .. لما اقوم افرح ابوكى ..

وفى منزل حاتم يرن هاتف المنزل فترد عواطف عليه لتجد أختها عفاف ..

عواطف : اهلا ياعفاف .. ازيك ياحبيبتى وازى مروة وازى جوزك ؟
عفاف : الحمد لله كلنا كويسين .. حقولك على خبر بمليون جنيه ..
عواطف : خييير يارب …
عفاف : خطوبة مروة الخميس الجاى …
عواطف ( فى صدمة ) : بتقولى ايييييييييييييه ؟ ازاى ده حصل ولمين ..
عفاف : لحتة شاب ياعواطف بس ايه زى القمر ومركزه زى الفل وشاريها اوى اوى .. وكمان صاحب حاتم ..
عواطف : يانهار اسود .. كمان صاحب سى زفت .. يعنى سى زفت هو اللى جابهولها ؟
عفاف : ياستير يارب .. ايه بس اللى حيسود النهار ياعواطف .. الملافظ سعد .. ومش حاتم هو اللى جابهولها ده أمجد شافها فى خطوبة أيمن صاحبهم وخطوبة حاتم وآية وكان حيتجنن عليها .. ده مكلمنى من يوم خطوبة حاتم وآية اصلا ..
عواطف : ياسلام . وايه اللى اخر الموضوع اكتر من شهر كدة ..
عفاف : هو اصله مهندس بترول كلمنى وجه البيت وقعد معاها وسافر بعد كدة شهر لشغله ورجع وقعدوا تانى وبعد كدة اتفقنا .. لسة متفقين النهاردة والله ياعواطف .. انا مبسوطة اوى .. اخيرا البنت حتتجوز وحطمن عليها ..
عواطف : طب وحاتم ياعفاف .. هو احنا مش اتفقنا ..
عفاف : انتى اتهبلتى ياعواطف .. الاتفاق ده كان زمان اوى وخلاص حاتم خطب واحدة تانية ..
عواطف : بس خلاص حيسيبها ..
عفاف : لا حول ولا قوة إلا بالله .. ليه حصل ايه بس ياعواطف ؟
عواطف : انا بزهقها فى عيشتها عشان تسيبه وان شاء الله الخطوبة تتفشكل ..
عفاف : ياستير يارب ياعواطف بقى انتى بتهدى حياة ابنك عشان يتجوز من بنتى .. تصدقى انتى طلعتى ملكيش أمان والحمد لله ان مفيش نصيب بين مروة وحاتم والا كانت ايامها معاكى اسود ايام فى حياتها .. بقولك ايه الخطوبة يوم الخميس فى البيت .. وانتى حرة بعد كدة .. سلام …